ଫୁଲବାଣୀ,୫।୮(ରାକେଶ କୁମାର ରାଉତ ) ମାଓବାଦୀଙ୍କ ସହ ସମ୍ପର୍କ ଅଭିଯୋଗରେ ଗୋଚ୍ଛାପଡା ପୋଲିସ ଜଣେ ଯୁବକଙ୍କୁ ଗିରଫ କରିଛି। ଗିରଫ ଯୁବକ ଜଣକ ହେଲେ ପକାରୀ ପଞ୍ଚାୟତ ସରୁପଡା ଗ୍ରାମର ମନବୋଧ ଦିଗାଲ। ସେ ପ୍ରାୟ ତିନି ବର୍ଷ ହେଲା ମାଓ ସଙ୍ଗଠନ ପାଇଁ କାମ କରୁଥିଲେ ବୋଲି ପୁଲିସ କହିଛି। ଅଭିଯୁକ୍ତ ପାଖରୁ ପୁଲିସ ୨ଟି ମାଓବାଦୀ ବ୍ୟାନର, ୮ଟି ପୋଷ୍ଟର, ୪ଟି ଜିଲେଟିନ ଷ୍ଟିକ ଓ ଗୋଟିଏ ଆଇଇଡି ଜବତ କରିଛି।
ସୂଚନାଯୋଗ୍ୟ, ଗତ ୨୦୨୧ ମସିହାରୁ ମନବୋଧ ମାଓ ସଙ୍ଗଠନ ସହ ସମ୍ପର୍କ ରଖିଥିବା ନେଇ ଏକ ମାମଲା ଗୋଚ୍ଛାପଡା ଥାନାରେ ରୁଜୁ ହୋଇଥିଲା। ପୋଲିସ ଏ ନେଇ ତଦନ୍ତ କରୁଥିଲା। ଗୁରୁବାର ରାତିରେ ପୋଲିସ ମନବୋଧକୁ ଗିରଫ କରିବା ସହିତ ତା ନିକଟରୁ ମାଓ ସାମଗ୍ରୀ ଜବତ କରିଛି। ମନବୋଧ ବେସରକାରୀ ଗାଡିର ଡ୍ରାଇଭର ଭାବେ କାମ କରୁଥିଲେ। ତାଙ୍କୁ ଆଜି କୋର୍ଟ ଚାଲାଣ କରାଯାଇଥିବା ସଦର ଏସଡିପିଓ ସୁପ୍ରସନ୍ନ ମଲିକ ସୂଚନା ଦେଇଛନ୍ତି। ଆହୁରି କିଛି ଲୋକଙ୍କ ନାମରେ ଏଭଳି ଅଭିଯୋଗ ଥିବା ଏବଂ ସେ ନେଇ ତଦନ୍ତ ଚାଲିଥିବା ପୁଲିସ କହିଛି।
