ପୁରୁଷୋତ୍ତମପୁର/ଗଞ୍ଜାମ,୨ା୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର-ହୁମ୍ମା ମୁଖ୍ୟ ରାସ୍ତାର କାଳୁଆବାଡ଼ି ଛୋଟାବସା ମଧ୍ୟ ରାସ୍ତା ପାଶର୍ବରେ ଥିବା ଏକ ଧାନ ବିଲରେ ଜଣେ ବ୍ୟକ୍ତିଙ୍କ ଅର୍ଦ୍ଧଦଗ୍ଧ ମୃତଦେହ ପଡ଼ିଛି। ଘଟଣାସ୍ଥଳରେ ଏକ ପୁରୁଷଙ୍କ ଚପଲ ରହିଛି। ଏହି ଚପଲକୁ ନେଇ ଅଭିଯୁକ୍ତ ପୁରୁଷ ହୋଇଥାଇପାରନ୍ତି ବୋଲି ସନ୍ଦେହ କରାଯାଉଛି। ହେଲେ ଏହି ବ୍ୟକ୍ତିଙ୍କ ପରିଚୟ ମିଳି ପାରି ନ ଥିବା ବେଳେ ଚପଲକୁ ନେଇ ନିକଟସ୍ଥ ଏକ ଗ୍ରାମର ବ୍ୟକ୍ତି ବୋଲି ଲୋକେ ସନ୍ଦେହ କରୁଛନ୍ତି। ଏଭଳି କିଏ କେଉଁ କାରଣରୁ ହତ୍ୟା କରି ପୋଡ଼ିଦେଇଛି, ନା ନିଜେ ସେ ଆତ୍ମହତ୍ୟା କରିବା ଲାଗି ପୋଡ଼ି ହୋଇଛନ୍ତି ତାହା ସ୍ପଷ୍ଟ ହୋଇପାରି ନାହିଁ। ରାସ୍ତାକଡ଼ରେ ଏଭଳି ଦରପୋଡ଼ା ଅବସ୍ଥାରେ ପଡିଥିବାର କିଛି ଲୋକ ଦେଖିବାକୁ ପାଇଥିଲେ। ଘଟଣାସ୍ଥଳଟି ଦୁଇଟି ଥାନା ରମ୍ଭା ଓ ପୁରୁଷୋତ୍ତମପୁରର ସୀମା ଅଟେ। ଏହାର ଖବର ପାଇ ପୁରୁଷୋତ୍ତମପୁର ଥାନା ଆଇଆଇସି ପ୍ରିୟସ ରଞ୍ଜନ ଛୋଟରାୟ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ତଦନ୍ତ ପରେ ଘଟଣାର ପ୍ରକୃତ କାରଣ ଜଣାପଡ଼ିବ।
