ଭୁବନେଶ୍ୱର, ୧୨।୨ (ତପନ ସ୍ବାଇଁ): ଏଫ୍ଆଇଏଚ୍ ପୁରୁଷ ହକି ପ୍ରୋ ଲିଗ୍ରେ ରବିବାର ଅଷ୍ଟ୍ରେଲିଆ ସଂଘର୍ଷପୂର୍ଣ୍ଣ ବିଜୟ ହାସଲ କରିଛି। କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ମ୍ୟାଚରେ ଏହି ଦଳ ୪-୩ ଗୋଲରେ ସ୍ପେନ୍କୁ ହରାଇ ଦେଇଛି। ଅଷ୍ଟ୍ରେଲିଆ ପକ୍ଷରୁ ଶାର୍ପ ଲଚଲାନ ୯ ଓ ୫୨ତମ ମିନିଟରେ ୨ଟି ଏବଂ ଜ୍ୟାକ ହ୍ବିଟନ ୧୯ ଓ ବ୍ଲେକ୍ ଗୋଭର୍ସ ୨୫ତମ ମିନିଟରେ ଗୋଟିଏ ଲେଖାଏ ଗୋଲ ଦେଇଥିଲେ।
ସ୍ପେନ୍ର ମାର୍କ ମିରାଲେସ ୨୯, ନିକୋଲାସ ଆଲଭାରେଜ ୩୬ ଓ ପଲ ଭାର୍ଡେଲ କାବ୍ରି ୩୭ତମ ମିନିଟରେ ଗୋଟିଏ ଲେଖାଏ ଗୋଲ ପରିଶୋଧ କରିଥିଲେ। ଏଠାରେ ବିଜୟ ସହ ଅଷ୍ଟ୍ରେଲିଆ ଏହାର ବିଜୟ ଅଭିଯାନ ଆରମ୍ଭ କରିଛି। ଅନ୍ୟପକ୍ଷରେ ସ୍ପେନ୍ କ୍ରମାଗତ ଦ୍ୱିତୀୟ ପରାଜୟ ବରଣ କରିଛି। ଏହି ଦଳ ଶନିବାର ଭାରତ ନିକଟରୁ ୧-୪ ଗୋଲରେ ପରାସ୍ତ ହୋଇଥିଲା।
ମ୍ୟାଚରେ ସ୍ପେନ୍ ମାତ୍ର ୨ଟି ପେନାଲ୍ଟି କର୍ନର ପାଇଥିବାବେଳେ ଏଥିରୁ ଗୋଟିଏକୁ ଗୋଲରେ ପରିଣତ କରିବାରେ ସକ୍ଷମ ହୋଇଥିଲା। ଅନ୍ୟପକ୍ଷରେ ଅଷ୍ଟ୍ରେଲିଆ ୬ଟି ପେନାଲ୍ଟି କର୍ନର ସୁଯୋଗ ସୃଷ୍ଟି କରିଥିଲା। ଏଥିରୁ ଖେଳାଳିମାନେ ୨ଟି ଗୋଲ ଦେବାରେ ସକ୍ଷମ ହୋଇଥିଲେ। ସ୍ପେନ୍ର ଡି ଇଗ୍ନାସିଓ-ସିମୋ ଏଡୁଆର୍ଡ ୨୩ ଓ ରୋଡ୍ରିଗ୍ବେଜ ଇଗ୍ନାସିଓ ୨୪ତମ ମିନିଟରେ ଗ୍ରୀନ୍ କାର୍ଡ ପାଇଥିଲେ। ଅଷ୍ଟ୍ରେଲିଆର ଟମ୍ କ୍ରେଗ୍ ୨୦ ଓ କି ଓ୍ବିଲଟ ୬୦ତମ ମିନିଟରେ ୟେଲୋ କାର୍ଡ ପାଇଥିଲେ।