ସମସ୍ତେ ଚାହାନ୍ତି ନିଜର ଏକ ସୁନ୍ଦର ଘର ହେଉ। ଯାହାକୁ ସେମାନେ ନିଜ ମନ ମୁତାବକ ଡିଜାଇନ୍ କରିବେ ଓ ନିଜ ମନ ମୁତାବକ ସଜାଇବେ। ହେଲେ କାହାର ଏଇ ସ୍ବପ୍ନ ସତ ହେଇପାରେ ତ କାହାର ନୁହେଁ। ତେବେ ପଶ୍ଚିମବଙ୍ଗରେ ରହୁଥିବା ମିଣ୍ଟୁ ରୟ ନାମକ ଜଣେ କୃଷକ ନିଜ ସ୍ବପ୍ନର ଘରକୁ ରୂପ ଦେବାରେ ସଫଳ ହୋଇପାରିଛନ୍ତି। ସେ ଚାହୁଁଥିଲେ ତାଙ୍କର ଘର ଟାଇଟାନିକ ଜାହାଜ ପରି ହେବ। ହଁ, ସେଇ ବିଶ୍ୱ ପ୍ରସିଦ୍ଧ ଟାଇଟାନିକ ଜାହାଜ, ଯାହା ପ୍ରଥମ ଯାତ୍ରାରେ ହିଁ ବୁଡି ଯାଇଥିଲା। ସେହି ଜାହାଜ ଆକାରର ଘରକୁ ପୁରା କରିବା ପାଇଁ ସେ ନିଜେ ଉକ୍ତ ଘରର ଡିଜାଇନ୍ କଲେ। ଆର୍ଥିକ ଅଭାବ ପାଇଁ କିଛି ବର୍ଷ ଏହାର ନିର୍ମାଣ କାର୍ଯ୍ୟ ବନ୍ଦ ମଧ୍ୟ ହୋଇଥିଲା। ସେ ଯେତେବେଳେ ଜାଣିଲେ ଯେ, ମିସ୍ତ୍ରୀଙ୍କୁ ମଜୁରି ଦେବାକୁ ସେ ଅସମର୍ଥ, ସେତେବେଳେ ନିଜେ ସେହି କାମ କରିବାକୁ ନିଷ୍ପତ୍ତି ନେଲେ। ଆଉ ତିନି ବର୍ଷ ନେପାଳ ଯାଇ ରାଜମିସ୍ତ୍ରୀ କାମର ତାଲିମ ନେଲେ। ଫେରିଲା ପରେ ସେ ନିଜେ ରାଜମିସ୍ତ୍ରୀ ସାଜି ସ୍ବପ୍ନର ଘରକୁ ରୂପ ଦେଲେ। ୨୦୧୦ରେ ଏହି ଘରର ତିଆରି କାମ ଆରମ୍ଭ ହୋଇଥିଲା। ୩୯ ଫୁଟ ଲମ୍ବା ଓ ୧୩ ଫୁଟ ଚଉଡା ଏହି ଘରର ଉଚ୍ଚତା ପ୍ରାୟ ୩୦ ଫୁଟ। ଉକ୍ତ ଘରଟି ଏବେ ଏହି ଅଞ୍ଚଳରେ ମୁଖ୍ୟ ଆକର୍ଷଣ ପାଲଟିଛି। ହେଲେ ଏହାର କାମ ଏ ପର୍ଯ୍ୟନ୍ତ ସମ୍ପୂର୍ଣ୍ଣ ହୋଇ ନାହିଁ। ୟା’ ମଧ୍ୟରେ ୧୫ ଲକ୍ଷ ଟଙ୍କା ଖର୍ଚ୍ଚ ହୋଇସାରିଲାଣି। ଚାଷ କରି ଯାହା ରୋଜଗାର ହେଉଛି ସେଥିରେ ସେ ଧୀରେ ଧୀରେ ଏହାର ନିର୍ମାଣ କରୁଛନ୍ତି। ଆଗାମୀ ବର୍ଷ ଏହାର କାମ ସମ୍ପୂର୍ଣ୍ଣ ହେବ ବୋଲି ମିଣ୍ଟୁ କୁହନ୍ତି। ଏହି ଘରର ଉପର ମହଲାରେ ସେ ଏକ ରେଷ୍ଟୁରାଣ୍ଟ କରିବାର ଯୋଜନା ବି କରିଛନ୍ତି।