ବ୍ୟାଙ୍କକ୍ରେ କରୋନା ମହାମାରୀକୁ ନେଇ ଲଗାଯାଇଥିବା ପ୍ରତିବନ୍ଧକ ଟିକେ କୋହଳ ହେବା ପରେ ଜନଜୀବନ ସ୍ବାଭାବିକ ହୋଇଛି। ଲୋକେ ଏବେ ବନ୍ଦ ଘରୁ ବାହାରକୁ ବାହାରୁଛନ୍ତି। ଏହି ସମୟରେ ଏକ ଅଜବ ଦୃଶ୍ୟ ଦେଖି ଲୋକେ ଭୟଭୀତ ହୋଇପଡ଼ିଛନ୍ତି। ଏକ ଗଛ ଡାଳରେ ବିରାଟକାୟ ଅଜଗରକୁ ଦେଖି ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି।
ଏପରି ଦୃଶ୍ୟ ଦେଖିବାକୁ ମିଳିଛି ବ୍ୟାଙ୍କକ୍ର ବ୍ୟସ୍ତବହୁଳ ଅଞ୍ଚଳରେ। ଏହା ପଛରେ ଅନେକ କାରଣ ରହିଛି। ଅଧିକ ଜଙ୍ଗଲ କଟାଯିବାରୁ ଜୀବଜନ୍ତୁ ଖାଦ୍ୟ ଅନ୍ବେଷଣରେ ସହର ମଧ୍ୟକୁ ଚାଲିଆସୁଛନ୍ତି। ସାପକୁ ଦେଖି ଲୋକେ ଅଗ୍ନିଶମ ବାହିନୀକୁ ଖବର ଦେଇଥିଲେ। ଏହା ପରେ ଅଗ୍ନିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚି ସାପକୁ ଗଛରୁ ଉଦ୍ଧାର କରିବା ପାଇଁ ନାକେଦମ୍ ହୋଇପଡ଼ିଥିଲେ। ଦୀର୍ଘ ସମୟ ଚେଷ୍ଟା କରିବା ପରେ ଏକ ଲୁହା ରଡ୍ ସାହାଯ୍ୟରେ ସାପର ବେକକୁ ଧରିବାରେ ସକ୍ଷମ ହୋଇଥିଲେ।
ଏହି ସାପର ଲମ୍ବର ୧୧.୫ ଫୁଟ। ଓଜନ ୭୭ ପାଉଣ୍ଡ ଅର୍ଥାତ ୩୫ କିଲୋଗ୍ରାମ। ସାପକୁ ଦେଖିବା ପାଇଁ ପ୍ରବଳ ଗହଳି ହୋଇଥିଲା। ପରେ ସାପକୁ ଧରି ଏକ ଅଖାରେ ପୂରାଇ ଦମକଳବାହିନୀ କର୍ମଚାରୀମାନେ ଜନଗହଳିଠାରୁ ଦୂରକୁ ନେଇଯାଇଥିଲେ।
