ଛତ୍ରପୁର,୨୯।୩(ଡି.ଏନ୍.ଏ): ଗଞ୍ଜାମ ଜିଲା ଛତ୍ରପୁର ତହସିଲ କାଳିପଲ୍ଲୀଠାରେ ପ୍ରସ୍ତାବିତ ସ୍ମାର୍ଟକେମ୍ ଟେକ୍ନୋଲୋଜି କମ୍ପାନୀ ବିରୋଧରେ ହାଇକୋର୍ଟରେ ପୁଣି ଏକ ଜନସ୍ବାର୍ଥ ମାମଲା ଦାୟର ହୋଇଛି ା ଏହାକୁ ମିଶାଇ ୩ ଟି ମାମଲା ହାଇକୋର୍ଟରେ ରୁଜୁ ହେଲାଣି ା ଉକ୍ତ ମୂଳ କେଶ ସହ ଆଉ ୨ କେଶର ଏକତ୍ରିତ ପରିବର୍ତ୍ତି ଶୁଣାଣି କରିବାକୁ ପାଇଁ ହାଇକୋର୍ଟ ଏପ୍ରିଲ ୧୮ ତାରିଖରେ ଦିନ ଧାର୍ଯ୍ୟ କରିଛନ୍ତି ା ଏନେଇ ଭାରତୀୟ ବିକାଶ ପରିଷଦ ର ସଭାପତି ସୁରେନ୍ଦ୍ର ପାଣିଗ୍ରାହୀ ମଙ୍ଗଳବାର ଏକ ପ୍ରେସ ବାର୍ତ୍ତାରେ ସୂଚନା ଦେଇଛନ୍ତି ା କମ୍ପାନୀ ରେଜିଷ୍ଟ୍ରେସନ ପାଇଁ ବିନା ଜନଶୁଣାଣିରେ ଜିଲାପାଳ ଏନଓସି ପ୍ରମାଣପତ୍ର ପ୍ରଦାନ ଓ ମିଥ୍ୟା ରିପୋର୍ଟ, କିଛି ତଥ୍ୟ ଲୁଚାଇ ବିନା ଜନଶୁଣାଣିରେ ପରିବେଶ ପ୍ରମାଣପତ୍ର ବେନିୟମ ଭାବେ ପ୍ରଦାନ କରିଥିବା ଯୋଗୁଁ କମ୍ପାନୀ ବନ୍ଦ କରିବା ପାଇଁ ତୃତୀୟ ମାମଲା ଦାୟର ହୋଇଛି ା ମାଟିଖାଲ ର ଦଣ୍ଡପାଣି ପ୍ରଧାନ ଓ ଗୋପାଳ ପ୍ରଧାନ, ଆର୍ଯ୍ୟପଲ୍ଲୀର ଜି.ଭୀମ ବେହେରା, ଲକ୍ଷ୍ମୀପୁରର ଜେ. ରାଣୀ ଏବଂ ଭାରତୀୟ ବିକାଶ ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀଙ୍କ ପକ୍ଷରୁ ମାମଲା (ଡବ୍ଲ୍ୟୁପିସି ନଂ-୮୭୮୭/୨୩) ହୋଇଛି ା ଏଥିପୂର୍ବରୁ ଭାରତୀୟ ବିକାଶ ପରିଷଦ ପକ୍ଷରୁ ପ୍ରଥମ ମାମଲା (ଡବ୍ଲ୍ୟୁପିସି ନଂ-୨୯୧୧୫/୨୨) ଏବଂ ବଡପୁଟି, ହରିପୁଣ, ତିଆରବସା , କାଳିପଲ୍ଳୀ ଓ ଅନ୍ୟାନ୍ୟ ଗ୍ରାମବାସୀଙ୍କ ପକ୍ଷରୁ ଦ୍ୱିତୀୟ ମାମଲା (ଡବ୍ଲ୍ୟୁପିସି ନଂ-୮୭୮୫/୨୩) ରୁଜୁ ହୋଇଥିଲା ା ପ୍ରଥମ ମାମଲା ର ଶୁଣାଣି ମାର୍ଚ୍ଚ ୨୩ ତାରିଖରେ ହାଇକୋର୍ଟରେ ଶୁଣାଣି ହୋଇଥିଲା ା ସେଥିରେ ମହକିଲ ଯୁକ୍ତି ବାଢିଥିଲେ ଯେ ୨୦୨୩ ଜାନୁଆରୀ ୧୮ରେ ସମସ୍ତ ପକ୍ଷକୁ କୈଫୟତ ନୋଟିସ ଓ ପିଟିଶନ କପି ଗ୍ରହଣ କରି ଏକମାସ ମଧ୍ୟରେ ଲିଖିତ ଉତ୍ତର ଦେବାକୁ କୁହାଯାଇଥିଲା। ଗଞ୍ଜାମ ଜିଲାପାଳ ଓ କେନ୍ଦ୍ର ସରକାରଙ୍କ ପରିବେଶ ବିଭାଗ ଲିଖିତ ଉତ୍ତର ଦେଇନାହାନ୍ତି ା ଏଥିସହ ଗୋପାଳପୁର ଇଣ୍ଡଷ୍ଟ୍ରିଆଲ ପାର୍କ, ଚମାଖଣ୍ଡିରେ କୌଣସି ସ୍ବାର୍ଟକେମ୍ ଟେକ୍ନୋଲୋଜି କମ୍ପାନୀ ଅଫିସ ନାହିଁ ବୋଲି ଛତ୍ରପୁର ପୋଷ୍ଟଅଫିସ ନୋଟିସ ଫେରାଇ ଦେଇଥିଲେ। ଏଣୁ ସ୍ମାର୍ଟକେମ୍ ଟେକ୍ନୋଲୋଜି ପୁଣେର ମୁଖ୍ୟ କାର୍ଯ୍ୟାଳୟର ଜେନେରାଲ ମ୍ୟାନେଜର ଓ ଚମାଖଣ୍ଡି ବ୍ରାଞ୍ଚ ଅଫିସକୁ ନୋଟିସ ୩ ଦିନ ମଧ୍ୟରେ ରେଜିଷ୍ଟ୍ରି ପୋଷ୍ଟ ମାଧ୍ୟମରେ ପଠାଇବା ପାଇଁ ହାଇକୋର୍ଟ ନିର୍ଦ୍ଦେଶ ପ୍ରଦାନ କରିଥିଲେ। ଏହାପରେ ସ୍ମାର୍ଟକେମ୍ କମ୍ପାନୀ ବିରୋଧରେ ଆଉ ୨ ମାମଲା ଦାୟର ହୋଇଥିବାରୁ ମୂଳ କେଶ ସହିତ ଏହାର ଏକତ୍ରିତ ଶୁଣାଣି ପାଇଁ ଏପ୍ରିଲ ୧୮ ତାରିଖରେ ଦିନ ଧାର୍ଯ୍ୟ ହୋଇଛି ା