ଭୁବନେଶ୍ୱର,୨୫ା୧(ବ୍ୟୁରୋ): ରାଜଧାନୀ ଓ ଏହାର ଆଖପାଖ ଅଞ୍ଚଳରେ ପାନୀୟ ଜଳ ସମସ୍ୟା ଧୀରେ ଧୀରେ ଉତ୍କଟ ହେବାରେ ଲାଗିଛି। ନଦୀରେ ପାଣି ଶୁଖିଯିବା ବେଳେ ଭୂତଳ ଜଳସ୍ତର ମଧ୍ୟ ତଳକୁ ଖସୁଛି। ଜଳ ସଂରକ୍ଷଣ କରିବା ଅତ୍ୟନ୍ତ ଜରୁରୀ ହୋଇ ପଡ଼ିଛି। ସରକାର ରାଜ୍ୟର ବିଭିନ୍ନ ନଦୀରେ ଇନ୍ଷ୍ଟ୍ରିମ ଷ୍ଟୋରେଜ ପ୍ରୋଜେକ୍ଟ ଯୋଜନା କାର୍ଯ୍ୟକାରୀ କରୁଛନ୍ତି। ଏହିକ୍ରମରେ ଭୁବନେଶ୍ୱର ନିକଟ ଦେଇ ପ୍ରବାହିତ ହୋଇଥିବା କୁଆଖାଇ ନଦୀରେ ଇନ୍ଷ୍ଟ୍ରିମ ଷ୍ଟୋରେଜ ପ୍ରୋଜେକ୍ଟ କାର୍ଯ୍ୟକାରୀ କରାଯିବ। ଏ ବାବଦରେ ୧୨୭.୩୨ କୋଟି ଟଙ୍କା ଖର୍ଚ୍ଚ ହେବ। ଏହା କାର୍ଯ୍ୟକାରୀ ହେଲେ ଖୋର୍ଦ୍ଧା ଜିଲାର ବାଲିଅନ୍ତା ଓ ଭୁବନେଶ୍ୱର ମହାନଗର ନିଗମକୁ ପାନୀୟ ଜଳ ମିଳିପାରିବ। ତେବେ ଅଧିକ ପାଣି ଧରିବା ଭଳି ବଡ ବ୍ୟାରେଜ ନିର୍ମାଣ କରିବାକୁ ଉତ୍ତର ଭୁବନେଶ୍ୱର ଉନ୍ନୟନ ପରିଷଦ ପକ୍ଷରୁ ଦାବି କରାଯାଇଛି। ଏ ନେଇ ପରିଷଦ ସଭାପତି ପ୍ରଭାତ ଦାଶଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳୀ ଜଳ ସମ୍ପଦ ମନ୍ତ୍ରୀ ଟୁକୁନି ସାହୁଙ୍କୁ ତାଙ୍କ ସରକାରୀ ବାସଭବନରେ ମଙ୍ଗଳବାର ସାକ୍ଷାତ କରି ଆଲୋଚନା କରିଛନ୍ତି। ବ୍ୟାରେଜ ନିର୍ମାଣ ହେଲେ କୁଆଖାଇର ଉପରମୁଣ୍ଡରୁ ପ୍ରାୟ ୧୦ କିଲୋମିଟର ପର୍ଯ୍ୟନ୍ତ ନଦୀରେ ପାଣି ଜମି ରହିବ। ଏହାଦ୍ୱାରା ପାନୀୟ ଜଳ ସହିତ ଚାଷକୁ ମଧ୍ୟ ପାଣି ମିଳିପାରିବ। ବ୍ୟାରେଜ କେଉଁଠି ଓ କେତେବଡ଼ ନିର୍ମାଣ କରାଯିବ ସେ ନେଇ ପରିଷଦକୁ ଜଣାଇ ଦିଆଯିବ ବୋଲି ମନ୍ତ୍ରୀ କହିଛନ୍ତି।