ଢେଙ୍କାନାଳ ଅଫିସ,୧୪ା୭
ବ୍ରାହ୍ମଣୀ ନଦୀରେ ସେତୁଟିଏ ହେଲେ ଏହା ଢେଙ୍କାନାଳ ଜିଲା ପରଜଙ୍ଗ ବ୍ଲକ ସହ ସିଧାସଳଖ ଓଡାପଡା ବ୍ଲକକୁ ଯୋଡ଼ିପାରନ୍ତା। ୫୫ନଂ ଏବଂ ୫୩ନଂ ଜାତୀୟ ରାଜପଥ ମଧ୍ୟରେ ସଂଯୋଗ ରକ୍ଷା କରିପାରନ୍ତା। ଢେଙ୍କାନାଳ ସଦର ମହକୁମାରୁ ଓଡାପଡା ବ୍ଲକ ଖଡଗପ୍ରସାଦ ଦେଇ ପରଜଙ୍ଗକୁ ଗମନାଗମନର ଉନ୍ନତ ମାର୍ଗଟିଏ ଫିଟାଇପାରନ୍ତା। ହେଲେ ଏସବୁ ଅଟକି ଯାଇଛି ପ୍ରସ୍ତାବରେ। ଦୁଇ ବର୍ଷ ହେଲା ନାବାର୍ଡରୁ ଅନୁମୋଦନ ମିଳୁ ନ ଥିବାରୁ ଏହି ବହୁ ପ୍ରତୀକ୍ଷିତ ବଡ଼କମର ସେତୁ ଏବେ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି।
ପୂର୍ତ୍ତ ବିଭାଗର ସୂଚନା ଅନୁଯାୟୀ, ଢେଙ୍କାନାଳ ଜିଲା ପରଜଙ୍ଗ ବ୍ଲକ ବଡକମର ଓ ଓଡାପଡା ବ୍ଲକ ଖଡଗପ୍ରସାଦ ମଧ୍ୟରେ ଥିବା ବ୍ରାହ୍ମଣୀ ନଦୀ ଉପରେ ଏହି ସେତୁ ନିର୍ମାଣ ପାଇଁ ଦୀର୍ଘଦିନରୁ ଦାବି ହୋଇ ଆସୁଥିଲା। ଫଳରେ ୧୫୩ କୋଟି ଟଙ୍କା ବ୍ୟୟରେ ୧୨୦୦ ମିଟର ଲମ୍ବ ଓ ୧୧ ମିଟର ଚଉଡାର ସେତୁ ନିର୍ମାଣ ନିମନ୍ତେ ସରକାରଙ୍କ ଯୋଜନା ରହିଥିଲା। ୨୦୧୮-୧୯ ଆର୍ଥତ୍କ ବର୍ଷ ମଧ୍ୟରେ ଦୁଇଥର ଏହାର ପ୍ରସ୍ତାବ ଅନୁମୋଦନ ନିମନ୍ତେ ନାବାର୍ଡ ନିକଟକୁ ପଠାଯାଇଥିଲା। କିନ୍ତୁ ଏଯାଏ କିଛି ବି ପଦକ୍ଷେପ ନିଆଯାଇ ନାହିଁ। ଉକ୍ତ ପ୍ରସ୍ତାବ ଅନୁମୋଦନ ଲାଭ କଲେ ପରଜଙ୍ଗ ବ୍ଲକ ଓ ଓଡାପଡା ବ୍ଲକ ମଧ୍ୟରେ ସିଧାସଳଖ ସମ୍ପର୍କ ରକ୍ଷା ହୋଇପାରିବ। ଢେଙ୍କାନାଳରୁ ପରଜଙ୍ଗ ରାସ୍ତା ୨୫ କିମି ହ୍ରାସ ପାଇପାରିବ। ସେହିପରି ପରଜଙ୍ଗ ବ୍ଲକର ବଡକମର ଓ ଓଡ଼ାପଡ଼ା ବ୍ଲକର ଖଡଗପ୍ରସାଦ ଗ୍ରାମବାସୀ ବିଭିନ୍ନ ସମୟରେ ହେଉଥିବା ପର୍ବପର୍ବାଣିରେ ଏକାଠି ହୋଇପାରିବେ। ଓଡାପଡା ବ୍ଲକ ଅଞ୍ଚଳରେ ବହୁ ଶିଳ୍ପାନୁଷ୍ଠାନ ଗଢି ଉଠିଥିବାରୁ ସେଠାରେ କାମ କରୁଥିବା ପରଜଙ୍ଗ ଅଞ୍ଚଳର ଲୋକମାନେ ମଧ୍ୟ ସୁବିଧାରେ ଯାତାୟାତ କରିପାରିବେ। ଏଥିପାଇଁ ସେମାନଙ୍କୁ ଆଉ ଡଙ୍ଗା ଉପରେ ନିର୍ଭର କରିବାକୁ ପଡ଼ନ୍ତା ନାହିଁ କି ବ୍ରାହ୍ମଣୀ ଡଙ୍ଗାବୁଡ଼ି ପରି ଦୁର୍ଘଟଣା ଭବିଷ୍ୟତରେ ଘଟିବାର ଆଶଙ୍କା ରୁହନ୍ତା ନାହିଁ। ଏ ସଂକ୍ରାନ୍ତରେ ପୂର୍ତ୍ତ ବିଭାଗ ନିର୍ବାହୀଯନ୍ତ୍ରୀ ମନୋରଞ୍ଜନ ବିଶ୍ୱାଳ କହିଛନ୍ତି, ୨୦୧୮-୧୯ ଆର୍ଥତ୍କ ବର୍ଷ ମଧ୍ୟରେ ବ୍ରାହ୍ମଣୀ ନଦୀ ଉପରେ ବଡକମର ସେତୁ ନିର୍ମାଣ ପାଇଁ ନାବାର୍ଡର ଅନୁମୋଦନ ନିମନ୍ତେ ଦୁଇଥର ପ୍ରସ୍ତାବ ଯାଇଛି। ପ୍ରସ୍ତାବ ଅନୁମୋଦିତ ହୋଇ ଆସିଲେ ସେତୁ ନିର୍ମାଣ କାର୍ଯ୍ୟ ଯଥାସମ୍ଭବ ଆରମ୍ଭ ହେବ।