ଚଢ଼େଇଧରା,୭।୧୦(ଡି.ଏନ.ଏ.): ଯାଜପୁର ଜିଲା ଜେନାପୁର ଥାନା ଅଧୀନ ଗଙ୍ଗେଇଡୁବୁରୀ(ଲୁଣିବେର) କଳାପଥର ଖଣିଠାରୁ କିଛି ଦୂରରେ ପୋତା ଯାଇଥିବା ବିପୁଳ ବିସ୍ଫୋରକକୁ ବୁଧବାର ରାତିରେ ଜବତ କରାଯାଇଛି। ଏକ ପଡ଼ିଆରେ ବିସ୍ଫୋରକ ପୋତା ଯାଇଥିବା ଖବର ପାଇ ଜେନାପୁର ଥାନାଧିକାରୀ ଶ୍ରବଣ କୁମାର ମହାରଣା ପହଞ୍ଚତ୍ଥିଲେ। ପୋତା ଯାଇଥିବା ସ୍ଥାନକୁ ଠାବ କରିବା ପରେ ବୋମା ନିଷ୍କ୍ରିୟକାରୀ ଦଳଙ୍କ ସହାୟତାରେ ଏକ ଜେସିବି ମେଶିନ ଦ୍ୱାରା ଖନନ କରାଯାଇଥିଲା। ଖବର ଲେଖାହେବା ବେଳକୁ ୫୦ ବସ୍ତା ଏମୋନିୟମ ନାଇଟ୍ରେଟ୍ ସହିତ ଅନ୍ୟ କିଛି ବିସ୍ଫୋରକ ଜବତ ହୋଇଥିଲା। ତେବେ ଏତେ ପରିମାଣର ବିସ୍ଫୋରକ କିଏ କାହିଁକି ସେଠାରେ ପୋତିଛି ସେ ନେଇ ପୋଲିସ ତଦନ୍ତ ଚଳାଇଛି। ସାମଗ୍ରୀ ଜବତ ହୋଇଥିବା ସ୍ଥାନ ସରକାରୀ ଜମି ହୋଇଥିବା ବେଳେ ଏହା ସ୍ଥାନୀୟ ଅଞ୍ଚଳର କେହି ଜଣେ ବ୍ୟକ୍ତିଙ୍କ ଦ୍ୱାରା ଦଖଲ ହୋଇଥିବା ଶୁଣାଯାଉଛି। ଏହି ପାହାଡ଼ରେ ଅନେକ ଖାଦାନ ରହିଥିବାରୁ କିଏ ପୋତିଛନ୍ତି, ତାହା ବିନା ତଦନ୍ତରେ କହିହେବ ନାହିଁ ବୋଲି ଥାନାଧିକାରୀ ମହାରଣା କହିଛନ୍ତି। ତେବେ ଗତ ଘଟଣା ସହିତ ଏହି ଘଟଣାର ସାମଞ୍ଜସ୍ୟ ରହିଥିବା ସ୍ଥାନୀୟ ଲୋକେ କହିଛନ୍ତି। ଅନ୍ୟପକ୍ଷରେ ଜେନାପୁର ଥାନା ଅଞ୍ଚଳ ଏବେ ବାରୁଦ ଗଦାରେ ଛିଡା ହୋଇଥିବା ଚର୍ଚ୍ଚା ହେଉଛି। ସୂଚନାଯୋଗ୍ୟ, ଗତ ରବିବାର ବଉଳମାଳ ପଞ୍ଚାୟତର ସାତମାଣଠାରେ ଥିବା ଏକ ବିସ୍ଫୋରକ ଗୋଦାମକୁ ଜିଲା ପୋଲିସ ସିଲ୍ କରିଥିବା ବେଳେ ମାତ୍ରାଧିକ ବିସ୍ଫୋରକ ମହଜୁଦ ଅଭିଯୋଗରେ ମାମଲା ରୁଜୁ କରାଯାଇଛି। ଏହି ଘଟଣାରେ ସମ୍ପୃକ୍ତ ଅଭିଯୁକ୍ତ ଅଦ୍ୟାବଧି ପୋଲିସ ହେପାଜତକୁ ଆସି ପାରିନାହାନ୍ତି।
