ସମ୍ବଲୁପୁର,୨୭ା୯(ବ୍ୟୁରୋ):ନିଜ ପ୍ରେମକୁ ପାଇବା ପାଇଁ ବର୍ତ୍ତମାନ ସମୟରେ ଯୁବତୀଯୁବକ ଭିନ୍ନ ଭିନ୍ନ ପନ୍ଥା ଅବଲମ୍ବନ କରୁଛନ୍ତି। କେହିକେହି ଠାକୁରଙ୍କ ନିକଟରେ ଗୁହାରି ପଡ଼ୁଛନ୍ତି। ନିଜର ମନସ୍କାମନା ପୂର୍ଣ୍ଣ ପାଇଁ ମାନସିକ ମଧ୍ୟ ରଖୁଛନ୍ତି। ହେଲେ ଏବେ ଜଣେ ଯୁବତୀ ମନ୍ଦିର ହୁଣ୍ଡି ବାକ୍ସରେ ଏକ ଚିଠି ପକାଇ ନିଜର ପ୍ରେମ ବିବାହକୁ ସାକାର କରାଇଦେବାକୁ ମା’ସମଲେଇଙ୍କୁ ନିବେଦନ କରିଥିବା ଜାଣିବାକୁ ମିଳିଛି। ଏହି ଘଟଣା ଏବେ ଜିଲାରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ସୂଚନା ଅନୁଯାୟୀ ରବିବାର ପୂର୍ବାହ୍ନରେ ସମ୍ବଲପୁର ଅଧିଷ୍ଠାତ୍ରୀ ମା’ ସମଲେଇ ମନ୍ଦିରରେ ହୁଣ୍ଡି ଖୋଲାଯାଇଥିଲା। ଏଥିରୁ ଟଙ୍କା, ସିନ୍ଦୂର, ବେଲପତ୍ର ଭଳି ସାମଗ୍ରୀ ସହ ୪ ଗୋଟି ହାତଲେଖା ଚିଠି ବାହାରିଥିଲା। ଏଥିମଧ୍ୟରୁ ତେଲୁଗୁ ଓ ବଙ୍ଗଳା ଭାଷାରେ ୨ଟି ଏବଂ ଓଡ଼ିଆରେ ଲେଖାଥିବା ୨ଟି ଚିଠି ରହିଥିଲା। ଓଡ଼ିଆରେ ଲେଖା ହୋଇଥିବା ଚିଠିରେ ଜଣେ ଯୁବତୀ ଉଲ୍ଲେଖ କରିଛନ୍ତି, ”ଜୟ ମଁା ସମଲେଇ, ମଁା ଗୋ ମୋର ଜୁହାର ଗ୍ରହଣ କରିବୁ, ମୁଇଁ ତୋର ନିକେ ଗୁଟେ ଆଶା ନେଇ ଆସିଛେ। ତୁଇ ମାଁ ଗୋ ମୋର ପ୍ୟାର ରବୀନ୍ଦ୍ର ସାଙ୍ଗରେ ସମସ୍ତଙ୍କ ସହମତିରେ ବିବାହ କରାଇ ଦେ। ଜୟ ମଁା ଜଗତ୍ଜନନୀ କି ଜୟ“ ବୋଲି ଉଲ୍ଲେଖ ରହିଛି। ସେହିପରି ଅନ୍ୟ ଏକ ଚିଠିରେ ଜଣେ ଯୁବକ ନିଟ୍ ପରୀକ୍ଷାରେ ସଫଳତା ପାଇବା ଆଶାରେ ମା’ଙ୍କୁ ନିବେଦନ କରିଛନ୍ତି। ଏ ସମ୍ପର୍କରେ ମନ୍ଦିର ଟ୍ରଷ୍ଟ ସଭାପତି ସଞ୍ଜୟ ବାବୁ କହିଛନ୍ତି, ଅଧିକାଂଶ ସମୟରେ ଏଭଳି ଚିଠି ହୁଣ୍ଡିରୁ ବାହାରିଥାଏ। ମା’ଙ୍କ ପାଖରେ ଭକ୍ତମାନେ ଗୁହାରି କରିବା ପାଇଁ ଭିନ୍ନ ପନ୍ଥା ଆପଣେଇଥାନ୍ତି। ଝିଅ ବିବାହ, ଚାକିରି, ବଦଳି, ଚାକିରିରେ ପଦୋନ୍ନତି, ପରିବାରରେ ଶାନ୍ତି ଆଣିଦେବା, ଦମ୍ପତିଙ୍କ ମନୋମାଳିନ୍ୟ ବନ୍ଦ କରାଇବା ଭଳି ଅନେକ ସମସ୍ୟା ଉପରେ ଭକ୍ତମାନେ ଚିଠି ଲେଖି ଗୁହାରି କରନ୍ତି। ଚିଠି ଦେବା ସହିତ ନଡିଆ, ଫୁଲ ଦେବାକୁ କହି ମା’ଙ୍କ ନିକଟରେ ମାନସିିକ କରନ୍ତି। ଏହା ନୂଆ କଥା ନୁହେଁ। ହେଲେ ଜଣେ ଯୁବତୀ ତାଙ୍କ ମନର କଥାକୁ ମା’ଙ୍କୁ ଜଣାଇବା ପାଇଁ ହୁଣ୍ଡି ମାଧ୍ୟମରେ ପତ୍ର ଲେଖି ପକାଇବା ତାଙ୍କର ମା’ଙ୍କ ପ୍ରତି ସମର୍ପଣ ଭାବକୁ ବୁଝାଉଛି। ହୁଣ୍ଡିରୁ ନଗଦ ୪ ଲକ୍ଷ ୫୯ ହଜାର ଟଙ୍କା ବାହାରିଥିଲା। ପ୍ରାୟ ୨ମାସ ପରେ ହୁଣ୍ଡି ଖୋଲାଯାଇଥିଲା ବୋଲି ସେ କହିଥିଲେ। ଅନ୍ୟମାନଙ୍କ ମଧ୍ୟରେ ଟ୍ରଷ୍ଟ ସଦସ୍ୟ ପ୍ରଫୁଲ୍ଲ ହୋତା, ହେମନ୍ତ ମିଶ୍ର, ଦେବୋତ୍ତର ବିଭାଗ ଅଧିକାରୀ, ପୋଲିସ ଅଧିକାରୀ, ସ୍ଥାନୀୟ ସ୍ବେଚ୍ଛାସେବୀ ଉପସ୍ଥିତ ଥିଲେ।