ମହାକାଳପଡ଼ା, ୧୪ା୨(ଡି.ଏନ୍.ଏ.): ପ୍ରେମ ଶାଶ୍ୱତ ଓ ଚିରନ୍ତନ ସତ୍ୟ। ପ୍ରେମ ମାନେନା ଜାତି, ଧର୍ମ, ବର୍ଣ୍ଣ। ନିର୍ବିଶେଷରେ ଗୋଟିଏ ହୃଦୟ ସହ ଅନ୍ୟ ଏକ ହୃଦୟର ଘଟେ ମିଳନ। ପ୍ରେମ ସୁନ୍ଦର ଓ ଅସୁନ୍ଦରକୁ ପଛରେ ପକାଇ ମନ ସହିତ ହୁଏ ମନର ମିଳନ। ପ୍ରେମ କେତେବେଳେ କେଉଁ ମୁହୂର୍ତ୍ତରେ କାହା ଜୀବନରେ ଅକସ୍ମାତ୍ ଚାଲିଆସେ ତାହା ବୁଝିବା ପୂର୍ବରୁ ମନ ସହ ମନ, ଆତ୍ମା ସହ ଆତ୍ମା, ଆଖି ସହ ଆଖିର ହୋଇଯାଏ ମିଳନ। ତା’ପରେ ଛାଏଁ ଛାଏଁ ସୃଷ୍ଟି ହୁଏ ପ୍ରେମ। ଏମିତି ଏକ ଭିନ୍ନକ୍ଷମ ପ୍ରେମୀଯୁଗଳଙ୍କ କାହାଣୀ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ଗ୍ରାମରେ। ଭିନ୍ନକ୍ଷମ(ବାମନ) ରତନ ମିସ୍ତ୍ରି (୩୮)ଙ୍କ ଶରୀରର ଉଚ୍ଚତା ସାଢ଼େ ୩ ଫୁଟ୍। ଜୀବନଜୀବିକା ପାଇଁ ଗଁାମୁଣ୍ଡ ଛକରେ ଏକ ପାନ ଦୋକାନ କରି ଦୈନିକ ଦୁଇଶହ ଟଙ୍କା ରୋଜଗାର କରନ୍ତି। ନିଜର ୪ ପ୍ରାଣୀ କୁଟୁମ୍ବଙ୍କ ଲାଗି ମୁଠେ ଦାନା ଯୋଗାଡ଼ କରନ୍ତି। ଜୀବନସାଥୀ ଭାବେ ୨୦୧୨ରେ ରାମନଗର ଅଞ୍ଚଳର ଅଞ୍ଜଳି ମିସ୍ତ୍ରି (୩୦)ଙ୍କୁ ବିବାହ କରିଥିଲେ। ଅଞ୍ଜଳି ମଧ୍ୟ ଭିନ୍ନକ୍ଷମ ସ୍ବାମୀ ରତନଙ୍କୁ ପାଇ ଖୁସି ଅନୁଭବ କରିଥାନ୍ତି। ରତନଙ୍କ ପରିବାର କହିଲେ, ବଡ଼ପୁଅ ଓମ୍ (୯), ସାନପୁଅ ରୋହିତ (୩), ସ୍ତ୍ରୀ ଅଞ୍ଜଳି। ବଡ଼ପୁଅ ଓମ୍ ଜନ୍ମରୁ ମୂକ, ବଧିର। ଚାଲିବାରେ ଶାରୀରିକ ଅକ୍ଷମତା ଦେଖିବାକୁ ମିଳେ। ଏତେ ଦୁଃଖକଷ୍ଟ ସହି ରତନ ନିଜ ପରିବାର ମୁହଁରେ ଟିକେ ଖୁସି ଆଣିବାକୁ ବହୁ ପରିଶ୍ରମ କରନ୍ତି। ସରକାରୀ ଭାବେ ଏହି ଭିନ୍ନକ୍ଷମ ପରିବାରକୁ ମୁଣ୍ଡ ଗୁଞ୍ଜିବା ପାଇଁ ଖଣ୍ଡେ ଛାତଘର ମିଳିନାହିଁ। ନୁଆଁଣିଆ ଚାଳଛପର ଘରେ ଦିନରେ ସୂର୍ଯ୍ୟ ଓ ରାତିରେ ଜହ୍ନ ବିଛୁରିତ ହୋଇ ପଡ଼େ। ଏହି ପରିବାରକୁ ପ୍ରଶାସନ ଭତ୍ତାଟିଏ ଦେଇ କାମସାରି ଦେଇଛନ୍ତି। ଏତେ ଅଭାବ ଅସୁବିଧା ସତ୍ତ୍ୱେ ସ୍ତ୍ରୀ ଅଞ୍ଜଳି ମୁହଁରୁ ଟିକିଏ ସ୍ନେହ, କାଣିଚାଏ ହସ ଦେଖିଲେ ସବୁ ଦୁଃଖ ଲାଘବ ହୋଇଯାଏ ବୋଲି କହିଛନ୍ତି ଭିନ୍ନକ୍ଷମ ସ୍ବାମୀ ରତନ। ତେବେ ଭିନ୍ନକ୍ଷମ ରତନ ଆଜି ନିଜର ନୀତି ଆଦର୍ଶ ପାଇଁ ଅଞ୍ଚଳର ବିଭିନ୍ନ ବର୍ଗର ଲୋକଙ୍କ ସ୍ନେହ ଆଦରର ପାତ୍ର ହୋଇପାରିଛନ୍ତି।