ଅହମଦାବାଦ,୧୯।୧୧: ଦିନିକିଆ କ୍ରିକେଟ ବିଶ୍ୱକପ୍ର ଫାଇନାଲରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଲଢ଼େଇ ହେବ। ଭାରତ ଅପରାଜେୟ ଭାବରେ ଫାଇନାଲରେ ପ୍ରବେଶ କରିଥିବା ବେଳେ ଅଷ୍ଟ୍ରେଲିଆ ଏହାର ପ୍ରଥମ ଦୁଇ ମ୍ୟାଚ୍ରେ ଭାରତ ଓ ଦକ୍ଷିଣ ଆଫ୍ରିକା ନିକଟରୁ ହାରି ଯାଇଥିଲା। ତେବେ ବିଜୟଧାରାକୁ ଫେରିବା ସହିତ ଦଳ ଫାଇନାଲରେ ପ୍ରବେଶ କରିଛି। ରବିବାରର ଏହି ମ୍ୟାଚ୍କୁ ବିଗତ ଦଶନ୍ଧିର ମହାମୁକାବିଲା ଭାବରେ ଅଭିହିତ କରାଯାଉଥିବା ବେଳେ ଏହା ମଧ୍ୟରେ ହେବାକୁ ଥିବା କିଛି ଛୋଟ ଲଢେଇ ଉପରେ ସଭିଙ୍କ ନଜର ରହିଛି। ବିରାଟ କୋହଲି ଓ ଆଡାମ ଜାମ୍ପାଙ୍କ ଲଢେଇ ସହିତ ରୋହିତ ଶର୍ମା ଓ ମିଚେଲ ଷ୍ଟାର୍କଙ୍କ ବ୍ୟକ୍ତିଗତ ମୁକାବିଲା ଉପରେ ରହିବ ବିଶ୍ୱର ସମସ୍ତ କ୍ରୀଡାପ୍ରେମୀଙ୍କ ନଜର।
ବିରାଟ କୋହଲି ବନାମ ଆଡାମ ଜାମ୍ପା: ଚଳିତ ବିଶ୍ୱକପ୍ରେ ସର୍ବାଧିକ ରନ୍ ସ୍କୋରର ରହିଛନ୍ତି ବିରାଟ କୋହଲି। ବିଶ୍ୱର ପ୍ରଥମ ଖେଳାଳି ଭାବରେ ବିଶ୍ୱକପ୍ ଇତିହାସରେ ୭୦୦ରୁ ଅଧିକ ରନ୍ ସ୍କୋର କରିବାର ଗୌରବ ହାସଲ କରିଛନ୍ତି କୋହଲି। ତେବେ ଅଷ୍ଟ୍ରେଲୀୟ ସ୍ପିନର ଆଡାମ ଜାମ୍ପାଙ୍କ ବିପକ୍ଷରେ ତାଙ୍କର ବ୍ୟାଟିଂ ଦେଖିବାରେ ଫ୍ୟାନଙ୍କ ଉତ୍ସାହ ଦ୍ୱିଗୁଣିତ ହୋଇଛି। ଚଳିତ ବିଶ୍ୱକପ୍ରେ କୋହଲିଙ୍କ ଷ୍ଟ୍ରାଇକ ରେଟ୍ ୯୦.୬୯ ରହିଥିବା ବେଳେ ଆଭରେଜ ୧୦୧.୫୭ ରହିଛି। କୋହଲିଙ୍କ ବ୍ୟାଟିଂରେ ସାମାନ୍ୟତମ ଦୁର୍ବଳତା ମଧ୍ୟ ବାରି ହେଉନାହିଁ। ତେବେ ଅତୀତରେ କୋହଲି ଅନେକ ଥର ଜାମ୍ପାଙ୍କ ବଲ୍ରେ ଆଉଟ ହୋଇଛନ୍ତି। ତେବେ ଚଳିତ ବିଶ୍ୱକପ୍ର ଫାଇନାଲ ମ୍ୟାଚରେ କୋହଲି ନିଜର ପ୍ରତିଶୋଧ ପୂରା କରିବାକୁ ଚାହିଁବେ। ୧୨ ବର୍ଷ ପରେ ଭାରତ ଏହାର ତୃତୀୟ ବିଶ୍ୱକପ୍ ଟାଇଟଲ ହାସଲ କରିବାକୁ ହେଲେ କୋହଲିଙ୍କ ବ୍ୟାଟରୁ ରନ୍ ଆସିବା ନିହାତି ଆବଶ୍ୟକ। ଚଳିତ ବିଶ୍ୱକପ୍ର ଫର୍ମକୁ ଦେଖିଲେ ରବିବାରର ମ୍ୟାଚରେ କୋହଲିଙ୍କୁ ଫେଭରିଟ୍ ବୋଲି ବିବେଚନା କରାଯିବ।
ରୋହିତ ବନାମ ଷ୍ଟାର୍କ: ଫାଇନାଲ ମ୍ୟାଚ୍ର ମିନି ଲଢେଇ ମଧ୍ୟରେ ଭାରତୀୟ ଦଳର ଅଧିନାୟକ ରୋହିତ ଶର୍ମା ଓ ମିଚେଲ୍ ଷ୍ଟାର୍କଙ୍କ ମୁକାବିଲା ଉପରେ ମଧ୍ୟ ସମସ୍ତଙ୍କ ନଜର ରହିବ। ଚଳିତ ବିଶ୍ୱକପ୍ରେ ୫୫୦ରୁ ଅଧିକ ରନ୍ ସ୍କୋର କରି ସାରିଥିବା ରୋହିତ ଶର୍ମା ସମସ୍ତ ମ୍ୟାଚ୍ରେ ପ୍ରଥମ ବଲରୁ ହିଁ ଆକ୍ରମଣାତ୍ମକ କ୍ରିକେଟ ଖେଳୁଛନ୍ତି। ପାଓ୍ବାର ପ୍ଲେ ଓଭରରେ ଭାରତୀୟ ଦଳକୁ ଏକ ଦୃଢ ଆରମ୍ଭ ପ୍ରଦାନ କରିବା ସହ ରୋହିତ ଦଳକୁ ଆଗକୁ ବଢାଉଛନ୍ତି। ରୋହିତଙ୍କ ଆକ୍ରମଣାତ୍ମକ ବ୍ୟାଟିଂ କାରଣରୁ କୋହଲି ଓ ଗିଲ୍ଙ୍କୁ ଇନିଂସ ଗଢିବା ପାଇଁ ସମୟ ମଧ୍ୟ ମିଳୁଛି। ମାତ୍ର ବାମହାତୀ ଦ୍ରୁତ ବୋଲରଙ୍କ ବିରୋଧରେ ରୋହିତଙ୍କ ରେକର୍ଡ ଏତେ ଭଲ ନ ଥିବାରୁ ଷ୍ଟାର୍କ ଏହାର ଫାଇଦା ଉଠାଇବାକୁ ପ୍ରୟାସ କରିବେ। ଉଭୟ ଦଳ ମଧ୍ୟରେ ଖେଳା ଯାଇଥିବା ପ୍ରଥମ ମ୍ୟାଚ୍ରେ ମଧ୍ୟ ଷ୍ଟାର୍କଙ୍କ ବଲ୍ରେ ଆଉଟ ହୋଇଥିଲେ ରୋହିତ।
କୁଲ୍ଦୀପ ବନାମ ମ୍ୟାକ୍ସଓ୍ବେଲ: ସ୍ପିନରଙ୍କୁ ବଡ ଶଟ୍ ମାରିବାରେ ସିଦ୍ଧହସ୍ତ ଅଷ୍ଟ୍ରେଲିଆର ଗ୍ଲେନ୍ ମ୍ୟାକ୍ସଓ୍ବେଲ। ତେବେ ମ୍ୟାକ୍ସଓ୍ବେଲଙ୍କ ବିପକ୍ଷରେ ଭାରତୀୟ ଚାଇନାମ୍ୟାନ କୁଲ୍ଦୀପ ଯାଦବଙ୍କ ଉପରେ ନଜର ରହିବ। କୁଲ୍ଦୀପ ପ୍ରଥମ ମ୍ୟାଚରେ ମ୍ୟାକ୍ସଓ୍ବେଲଙ୍କୁ ବୋଲ୍ଡ କରିଥିବା ବେଳେ ସେ ଏହାର ପ୍ରତିଶୋଧ ନେବାକୁ ପ୍ରୟାସ କରିବେ। ରବିବାର ଭାରତର ସଫଳତା ଅନେକାଂଶରେ କୁଲ୍ଦୀପଙ୍କ ଉପରେ ନିର୍ଭରଶୀଳ ରହିବ।
ବୁମ୍ରା ବନାମ ଓ୍ବାର୍ନର: ଅଷ୍ଟ୍ରେଲୀୟ ଓପନର ଡେଭିଡ୍ ଓ୍ବାର୍ନର ଓ ଭାରତୀୟ ସ୍ପିଡ୍ଷ୍ଟର ଯଶପ୍ରୀତ୍ ବୁମ୍ରାଙ୍କ ମଧ୍ୟରେ ଲଢେଇ ଉପରେ ସମସ୍ତଙ୍କ ନଜର ରହିବ। ୧୪ ମ୍ୟାଚ୍ରେ ଉଭୟ ଖେଳାଳି ମୁହାଁମୁହିଁ ହୋଇଥିବା ବେଳେ ବୁମ୍ରା ଥରେ ମଧ୍ୟ ତାଙ୍କୁ ଆଉଟ କରିବାରେ ସଫଳ ହୋଇନାହାନ୍ତି। ଚଳିତ ବିଶ୍ୱକପ୍ର ୧୦ ମ୍ୟାଚ୍ରୁ ବୁମ୍ରା ୩.୯୮ର ଇକୋନୋମି ସହ ୧୮ ଉଇକେଟ ନେବାରେ ସଫଳ ହୋଇଛନ୍ତି। ତେବେ ଓ୍ବାର୍ନର ତାଙ୍କ ବିପକ୍ଷରେ ୧୩୦ ବଲ୍ ଖେଳି ୧୧୭ ରନ୍ ସଂଗ୍ରହ କରିଛନ୍ତି। ଚଳିତ ବିଶ୍ୱକପ୍ରେ ମଧ୍ୟ ଓ୍ବାର୍ନର ୫୨୮ ରନ୍ ସହିତ ଅଷ୍ଟ୍ରେଲିଆର ଟପ୍ ସ୍କୋରର ରହିଛନ୍ତି।