ଭୁବନେଶ୍ୱର,୨୪।୫(ବ୍ୟୁରୋ): ପାକିସ୍ତାନର ଗୋଇନ୍ଦା ସଂସ୍ଥା ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ (ଆଇଏସ୍ଆଇ)ର ଏଜେଣ୍ଟଙ୍କୁ ମୋବାଇଲ୍ ଓଟିପି ଶେୟାରିଂ ମାମଲାରେ ଜେରା ହେଉଥିବା ୩ ଅଭିଯୁକ୍ତଙ୍କ ମଙ୍ଗଳବାର ୩ ଦିନିଆ ରିମାଣ୍ଡ ଅବଧି ସରିଛି। ତେଣୁ ଅଭିଯୁକ୍ତ ପଠାଣିସାମନ୍ତ ଲେଙ୍କା, ସରୋଜ କୁମାର ନାୟକ ଓ ସୌମ୍ୟ ପଟ୍ଟନାୟକଙ୍କୁ କ୍ରାଇମ୍ବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ପୁଣି ଜେଲରେ ହାଜର କରିଛି। ତେବେ ଏହି ରିମାଣ୍ଡ ଅବଧି ସମୟରେ ଏସ୍ଟିଏଫ୍କୁ ମାମଲା ସଂକ୍ରାନ୍ତରେ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିବା ସୂଚନା ମିଳିଛି। ସୂଚନା ଅନୁଯାୟୀ, ଅଭିଯୁକ୍ତମାନେ ଥିବା ସୋସିଆଲ୍ ମିଡିଆ ଗ୍ରୁପ୍ରେ ମୋବାଇଲ୍ ସିମ୍ର ଓଟିପି ନିଲାମ ହୁଏ। ଯିଏ ଅଧିକ ଟଙ୍କା ଦିଏ, ତାଙ୍କୁ ଓଟିପି ପଠାଯାଇଥାଏ। ଏହି ଓଟିପି ବାବଦକୁ ଅଭିଯୁକ୍ତଙ୍କ ଆକାଉଣ୍ଟକୁ ବିଭିନ୍ନ ପର୍ଯ୍ୟାୟରେ ଦିଲ୍ଲୀ, ରାଜସ୍ଥାନ, ପଶ୍ଚିମବଙ୍ଗ ଆଦି ରାଜ୍ୟରୁ ବିପୁଳ ଟଙ୍କା ଆସିଥିବା ଏନ୍ପିସିଆଇ (ନ୍ୟାଶନାଲ୍ ପେମେଣ୍ଟ୍ସ କର୍ପୋରେଶନ୍ ଅଫ୍ ଇଣ୍ଡିଆ)ରୁ ତଥ୍ୟ ମିଳିଛି। ତେଣୁ ଟଙ୍କା ପଠାଇଥିବା ଲୋକଙ୍କୁ ଏସ୍ଟିଏଫ୍ ଧରିବାକୁ ପ୍ରୟାସ ଆରମ୍ଭ କରିଛି। ସମ୍ପୃକ୍ତ ଲୋକମାନେ ଆଇଏସ୍ଆଇ ଏଜେଣ୍ଟଙ୍କ ଲିଙ୍କ୍ରେ ଥିବା ମଧ୍ୟ ଏସ୍ଟିଏଫ୍ ସନ୍ଦେହ କରୁଛି। ଏସ୍ଟିଏଫ୍ ଏନେଇ ତଦନ୍ତ ଜାରି ରଖିଛି। ଏପରିକି ଏସ୍ଟିଏଫ୍ ଅନ୍ୟ ରାଜ୍ୟକୁ ଯାଇ ଟଙ୍କା ପଠାଇଥିବା ଲୋକଙ୍କୁ ଧରିବ ବୋଲି ସୂଚନା ମିଳିଛି।
ଅଭିଯୁକ୍ତମାନେ ଅନ୍ୟ ନଁାରେ ମୋବାଇଲ ସିମ୍ ଆଣି ବିଭିନ୍ନ ସୋସିଆଲ ମିଡିଆ ଗ୍ରୁପ୍ ଦ୍ୱାରା ଆଇଏସ୍ଆଇ ଏଜେଣ୍ଟଙ୍କୁ ଓଟିପି ଶେୟାର କରି ବିପୁଳ ଟଙ୍କା ପାଉଥିଲେ। ଆଇଏସ୍ଆଇ ଏଜେଣ୍ଟମାନେ ଉକ୍ତ ଓଟିପିକୁ ବ୍ୟବହାର କରି ହ୍ବାଟ୍ସଆପ୍, ଟେଲିଗ୍ରାମ, ଫେସ୍ବୁକ୍, ଇନ୍ଷ୍ଟାଗ୍ରାମ, ଟୁଇଟର୍ ଆଦି ସୋସିଆଲ ମିଡିଆ ଏବଂ ଆମାଜନ୍, ଫ୍ଲିପ୍କାର୍ଟ ଭଳି ଶପିଂ ଆପ୍ରେ ଆକାଉଣ୍ଟ ଅପରେଟ୍ କରୁଥିବା ଜଣାପଡ଼ିଛି। କିଛିଦିନ ତଳେ ଏଭଳି ଏକ ହ୍ବାଟ୍ସଆପ୍ ଗ୍ରୁପ୍ର ସନ୍ଧାନ ଏସ୍ଟିଏଫ୍ ପାଇଥିଲା। ସେଥିରେ ବହୁ ସଦସ୍ୟ ଥିବାବେଳେ ଏସ୍ଟିଏଫ୍ ଉପରୋକ୍ତ ୩ ଅଭିଯୁକ୍ତଙ୍କ ପରିଚୟ ପାଇବା ପରେ ସେମାନଙ୍କୁ ଗିରଫ କରି ଗତ ମେ ୧୪ରେ କୋର୍ଟଚାଲାଣ କରିଥିଲା।