ବାରିପଦା ଅଫିସ,୨୭ା୨: ମୟୂରଭଞ୍ଜ ଜିଲା ବାରିପଦାରେ ସୋମବାର ପୂର୍ବାହ୍ନ ୧୧ଟା ୧୦ ମିନିଟ୍ରେ ଆକାଶରେ ପ୍ରଚଣ୍ଡ ଶବ୍ଦକୁ ନେଇ ଜିଲାବାସୀ ଆତଙ୍କିତ ହୋଇ ପଡ଼ିଛନ୍ତି। ଶବ୍ଦର ବେଗକୁ ନେଇ ଘରଦ୍ୱାର ଥରିବା ସହ ଲୋକମାନେ ଭୟଭୀତ ହୋଇଯାଇଛନ୍ତି । ଜିଲାର ବେତନଟୀ, ବାରିପଦା, ମୋରଡ଼ା,ରାସଗୋବିନ୍ଦପୁର,ବଡ଼ସାହି,ଗୋପବନ୍ଧୁ ନଗର,ଖୁଣ୍ଟା, ଉଦଳା, କପ୍ତିପଦା,ଠାକୁରମୁଣ୍ଡା ଆଦି ବିଭିନ୍ନ ବ୍ଲକ ଅଞ୍ଚଳରେ ଛାତିଥରା ଶବ୍ଦରେ ଭୟର ବାତାବରଣ ଖେଳିଯାଇଛି।ପଥର ବ୍ଲାଷ୍ଟିଂରେ ଏପରି ଶବ୍ଦ ହେଉଥିବା ନେଇ ଆଲୋଚନା ହେଉଥିବା ବେଳେ ପଡ଼ୋଶୀ ବାଲେଶ୍ବର ଜିଲାସ୍ଥିତ ଚାନ୍ଦିପୁର କ୍ଷେପଣାସ୍ତ୍ର ପରୀକ୍ଷା କେନ୍ଦ୍ରରେ ସୁପରସନିକ ଜେଟ୍ ଯିବା ପରେ ବାୟୁର ଶୂନ୍ୟସ୍ଥାନ ପୂରଣ ଜନିତ ଶବ୍ଦ ବୋଲି ଅନୁମାନ କରାଯାଉଛି। ତେବେ ଏ ସମ୍ପର୍କରେ ଜିଲା ଜରୁରିକାଳୀନ ଅଧିକାରୀ ତଥା ଡେପୁଟି ଜିଲାପାଳ ସୁଜୟ କୁମାର ପତି କହନ୍ତି, ଏହି ଶବ୍ଦ ପଛରେ କୌଣସି ବୈଜ୍ଞାନିକ କାରଣ ଜଣାପଡ଼ିନାହିଁ।