ଅନୁଗୋଳ ଅଫିସ,୭ା୪: ଅନୁଗୋଳ ସହରସ୍ଥିତ ଗୋପବନ୍ଧୁ ଉଦ୍ୟାନରେ ବିଶିଷ୍ଟ ଗାନ୍ଧିବାଦୀ ତଥା ପୂର୍ବତନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀଙ୍କ ତ୍ରୁଟିପୂର୍ଣ୍ଣ ପ୍ରତିମୂର୍ତ୍ତି ସ୍ଥାପନକୁ ନେଇ ବିବାଦ ସୃଷ୍ଟି ହେବା ପରେ ରାଜ୍ୟ ସରକାରଙ୍କ ପକ୍ଷରୁ ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଗୁରୁବାର ଅନୁଗୋଳ ଗସ୍ତରେ ଆସିଥିଲେ। ଉକ୍ତ ଟିମ୍ ଗୋପବନ୍ଧୁ ଉଦ୍ୟାନ ଓ ବାଜି ରାଉତ ଛାତ୍ରାବାସ ପରିଦର୍ଶନ କରିବା ସହ ବିବାଦ ନେଇ ନବକୃଷ୍ଣଙ୍କ ଝିଅ ତଥା ସର୍ବୋଦୟ ନେତ୍ରୀ କ୍ରିଷ୍ଣା ମହାନ୍ତି ଓ ଅନ୍ୟ ଗାନ୍ଧିବାଦୀଙ୍କ ସହିତ ଆଲୋଚନା କରିଥିଲେ। ବାଜି ରାଉତ ଛାତ୍ରାବାସର ବିଭିନ୍ନ ସମସ୍ୟା ଅନୁଧ୍ୟାନ କରିଥିଲେ। ସହରର ଏକ ଉପଯୁକ୍ତ ସ୍ଥାନରେ ନବକୃଷ୍ଣଙ୍କ ଭବ୍ୟ ପ୍ରତିମୂର୍ତ୍ତି ସ୍ଥାପନ କରାଯିବ। ଏଥିସହ ବାଜି ରାଉତ ଛାତ୍ରାବାସର ଉନ୍ନତୀକରଣ କରାଯାଇ ଏହାକୁ ଏକ ଶିକ୍ଷଣୀୟ ସ୍ଥାନର ରୂପ ଦିଆଯିବ ବୋଲି ଟିମ୍ର ନେତୃତ୍ୱ ନେଉଥିବା ସଂସ୍କୃତି ବିଭାଗ ନିର୍ଦ୍ଦେଶକ ରଞ୍ଜନ ଦାଶ ପ୍ରକାଶ କରିଛନ୍ତି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଆସିଥିବା ଏହି ଉଚ୍ଚସ୍ତରୀୟ ପ୍ରତିନିଧି ଦଳ ଅନୁଗୋଳରେ ପହଞ୍ଚିବା ପରେ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ସହ ବିଭିନ୍ନ ସ୍ଥାନ ପରିଦର୍ଶନ କରିଥିଲେ। ସହରରେ ହୋଇଥିବା ବିଭିନ୍ନ ଉନ୍ନତୀକରଣ କାର୍ଯ୍ୟ, ବ୍ଲାକ ଡାଇମଣ୍ଡ, ଗୋପବନ୍ଧୁ ପାର୍କ ଓ ବାଜି ରାଉତ ଛାତ୍ରାବାସ ଯାଇ ସ୍ଥିତି ପରଖିଥିଲେ। କିଭଳି ଭାବେ ନବକୃଷ୍ଣ ଚୌଧୁରୀଙ୍କ ଭବ୍ୟ ପୂର୍ଣ୍ଣାବୟବ ପ୍ରତିମୂର୍ତ୍ତି ସ୍ଥାପନ ସହ ଛାତ୍ରାବାସର ପୁନରୁଦ୍ଧାର କରାଯାଇପାରିବ ସେ ବିଷୟରେ ଛାତ୍ରାବାସ ପରିଚାଳକ ସର୍ବୋଦୟ ନେତ୍ରୀ କ୍ରିଷ୍ଣା ମହାନ୍ତିଙ୍କ ସହ ସଂସ୍କୃତି ବିଭାଗ ନିର୍ଦ୍ଦେଶକ, ସଂସ୍କୃତି ବିଭାଗ ଓ ଓବିସିସିର ଯୁଗ୍ମ ନିର୍ଦ୍ଦେଶକ ସୁବୋଧ ଆଚାର୍ଯ୍ୟ, ଆର୍ଟିଟେକଚର ଅକ୍ଷୟ ଗେରୁଆ, ଶିଳ୍ପୀ ଜୟନ୍ତ ଦାସ ଆଲୋଚନା କରିଥିଲେ। ଏହି ଆଲୋଚନା ବେଳେ ବାଜି ରାଉତ ଛାତ୍ରାବାସ ସଭାପତି ଶୈଳେଜ ରବି, ସୂର୍ଯ୍ୟନାରାୟଣ ନାଥ, ମାନସ ପଟ୍ଟନାୟକ, ଆଦ୍ୟଶ୍ଳୋକ ମିଶ୍ର ପ୍ରମୁଖ ଉପସ୍ଥିତ ଥିଲେ। ଏ ସମ୍ପର୍କରେ ଛାତ୍ରାବାସ ପରିଚାଳକ କ୍ରିଷ୍ଣା ମହାନ୍ତି କହିଛନ୍ତି, ସମସ୍ତ ଅଭାବ ଅସୁବିଧା ସମ୍ପର୍କରେ ଉଚ୍ଚସ୍ତରୀୟ ପ୍ରତିନିଧି ଦଳକୁ ଅବଗତ କରାଯାଇଛି। ସବୁକିଛି ଧୀରେ ଧୀରେ ହେବ। ଏ ନେଇ ଆଶା ସଞ୍ଚାର ହୋଇଛି। ସଂସ୍କୃତି ବିଭାଗ ନିର୍ଦ୍ଦେଶକ ଦାଶ କହିଛନ୍ତି, ସହରର ଉନ୍ନୟନମୂଳକ କାର୍ଯ୍ୟ ସହ ଛାତ୍ରାବାସ, ପ୍ରତିମୂର୍ତ୍ତି ସ୍ଥାପନ ସ୍ଥଳ ବୁଲି ଦେଖିଲୁ। ଛାତ୍ରାବାସରେ ଥିବା ଅସୁବିଧା ସମ୍ପର୍କରେ ଅବଗତ ହେଲୁ। ଏହାର ଉନ୍ନତୀକରଣ ନେଇ ବିଭିନ୍ନ ପ୍ରସ୍ତାବ ଛାତ୍ରାବାସ ପକ୍ଷରୁ ପାଇଛୁ। ସେସବୁ ତର୍ଜମା କରିବା ପରେ ବିକାଶର ଏକ ନକ୍ସା ପ୍ରସ୍ତୁତ କରାଯାଇ ମୁଖ୍ୟମନ୍ତ୍ରୀଙ୍କ ଦ୍ୱାରା ଅନୁମୋଦନ କରାଯିବ। ତ୍ରୁଟିପୂର୍ଣ୍ଣ ପ୍ରତିମୂର୍ତ୍ତି ପରିବର୍ତ୍ତନ କରିଦିଆଯାଇଛି। ଯେଉଁମାନଙ୍କ ଅବହେଳା ଯୋଗୁ ଏସବୁ ହୋଇଛି, ସେମାନଙ୍କ ବାବଦରେ ମୁଖ୍ୟମନ୍ତ୍ରୀ ନିଷ୍ପତ୍ତି ନେବେ। ନବକୃଷ୍ଣଙ୍କ ଏକ ଭବ୍ୟ ପ୍ରତିମୂର୍ତ୍ତି ଉପଯୁକ୍ତ ସ୍ଥାନରେ ସ୍ଥାପନ କରାଯିବ। ବାଜି ରାଉତ ଛାତ୍ରାବାସର ଉନ୍ନତୀକରଣ ସହ ଏହାକୁ ଏକ ଶିକ୍ଷଣୀୟ ସ୍ଥାନ କରିବାକୁ ପଦକ୍ଷେପ ନିଆଯିବ।