ପୃଥିବୀରେ ଥିବା ବିଭିନ୍ନ ଧର୍ମ ମଧ୍ୟରେ ବୌଦ୍ଧଧର୍ମ ଅନ୍ୟତମ। ଏହି ଧର୍ମ ପ୍ରତି ସାରା ପୃଥିବୀରେ ଗୁରୁତ୍ୱ ଓ ସମ୍ମାନ ରହିଛି। ବୌଦ୍ଧ ମନ୍ଦିରରେ ପୂଜା କରୁଥିବା ବ୍ୟକ୍ତିଙ୍କୁ ସାଧାରଣତଃ ଭିକ୍ଷୁକ କୁହାଯାଏ। ସେମାନେ ବହୁତ ନିଷ୍ଠାର ସହ ଜୀବନଯାପନ କରନ୍ତି। ମଦ, ମାଂସଠାରୁ ସେମାନେ ବହୁତ ଦୂରରେ। ହେଲେ ଏମିତି ଏକ ବୌଦ୍ଧ ମନ୍ଦିର ଅଛି, ଯେଉଁଠି ଦେଖିବାକୁ ମିଳିବ ଲକ୍ଷ ଲକ୍ଷ ମଦ ବୋତଲ। ଏକଥା ଶୁଣି ନିଶ୍ଚୟ ସେହି ମନ୍ଦିର ଓ ସେଠାକାର ପୂଜକଙ୍କ ଉପରେ ଖରାପ ଭାବନା ଆସିବ। ତେବେ ପ୍ରକୃତ କଥା ହେଉଛି ଏହି ବୌଦ୍ଧ ମନ୍ଦିର ଲକ୍ଷ ଲକ୍ଷ ମଦ ବୋତଲରେ ତିଆରି। ସାଧାରଣତଃ ଲୋକେ ମଦ ପିଇବା ପରେ ବୋତଲ ଫିଙ୍ଗି ଦିଅନ୍ତି। କିନ୍ତୁ ଥାଇଲାଣ୍ଡରେ ଏହି ବୋତଲ ସଂଗ୍ରହ କରି ତାକୁ ରିସାଇକଲ କରି ସେଥିରେ ଏହି ମନ୍ଦିର ତିଆରି କରିଛନ୍ତି। ଏହା ପ୍ରମାଣିତ କରେ ଯେ, ଯଦି ଚିନ୍ତାଧାରା ସକାରାତ୍ମକ ତେବେ ନକାରାତ୍ମକତାକୁ ବି ବଦଳାଇ ଦିଆଯାଇପାରେ। ବୌଦ୍ଧ ଭିକ୍ଷୁକମାନେ ମଦ ବୋତଲରେ ମନ୍ଦିର ଗଢି ତାକୁ ସକାରାତ୍ମକ ରୂପ ଦେଇଛନ୍ତି। ବିଶେଷକରି ସମୁଦ୍ରରେ ବଢୁଥିବା ମଦ ବୋତଲର ଆବର୍ଜନାକୁ ନେଇ ବୌଦ୍ଧ ଭିକ୍ଷୁକମାନେ ଚିନ୍ତିତ ହୋଇ ସେହି ମଦ ବୋତଲ ସଂଗ୍ରହ କରି ତାକୁ ମନ୍ଦିର ଗଢ଼ିବାରେ ବିନିଯୋଗ କଲେ। ଥାଇଲାଣ୍ଡର ସିସ୍କେଟ ପ୍ରାନ୍ତରେ ତିଆରି ଉକ୍ତ ମନ୍ଦିରର ନାମ ହେଉଛି ‘ଓ୍ବାଟ ପ ମହା ଚେଦି କଓ୍ବେ’। ଏହି ମନ୍ଦିରର ନିର୍ମାଣ ପ୍ରାୟ ୧୦ ଲକ୍ଷ ମଦ ବୋତଲରେ ତିଆରି। ଏଥିରେ ସବୁଜ ଓ ମାଟିଆ ରଙ୍ଗର ମଦ ବୋତଲକୁ ଅଧିକ ବ୍ୟବହାର କରାଯାଇଛି। କାଚ ବୋତଲରେ ତିଆରି କାରୁକାର୍ଯ୍ୟ ମନ୍ଦିରର ସୌନ୍ଦର୍ଯ୍ୟ ଦ୍ୱିଗୁଣିତ କରିଥାଏ। ମନ୍ଦିରର ବାଥରୁମ୍ଠାରୁ ଆରମ୍ଭ କରି ପ୍ରାର୍ଥନା ଗୃହ ସବୁକିଛି ମଦ ବୋତଲରେ ତିଆରି। ଏହା ଏକ ପ୍ରସିଦ୍ଧ ଦାର୍ଶନିକ ସ୍ଥଳରେ ପରିଣତ ହୋଇଯାଇଛି।