ବ୍ରହ୍ମପୁର ଅଫିସ,୧ା୧୧-ପାଣି ମୋଟର ଚାଲୁ କରିବାକୁ କହିବାରୁ ଦମ୍ପତିିଙ୍କୁ ହତ୍ୟା ଉଦ୍ୟମ କରାଯାଇଥିଲା। ଉକ୍ତ ଅଭିଯୋଗକୁ ଆଧାର କରି ବଡବଜାର ଥାନା ପୋଲିସ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତ ଜଣଙ୍କ ଶାସ୍ତ୍ରୀନଗର ୪ର୍ଥ ଲେନ୍ରେ ରହୁଥିବା ନରସିଂହ ଦାସ। ପୋଲିସ ଅଭିଯୁକ୍ତଙ୍କଠାରୁ ଘଟଣା ବେଳେ ବ୍ୟବହାର କରାଯାଇଥିବା ମାରଣାସ୍ତ୍ର ଜବତ କରିଛି। ମାମଲା ନମ୍ବର ୨୮୯/୨୨ରେ ଅଭିଯୁକ୍ତଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି। ଏସ୍ଡିଜେଏମ୍ଙ୍କ ନିର୍ଦ୍ଦେଶରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ବୋଲି ଜଣାପଡିଛି।
ପ୍ରକାଶ ଯେ, ଶାସ୍ତ୍ରୀନଗର ୪ର୍ଥ ଲେନ୍ରେ ଥିବା ଏକ ୨ ମହଲା ଘରେ ନରସିଂହ ଦାସଙ୍କ ପରିବାର ଓ ପଙ୍କଜ ମହାପାତ୍ରଙ୍କ ପରିବାର ଘର ଭଡ଼ାରେ ରହୁଛନ୍ତି। ବିଭିନ୍ନ ଛୋଟମୋଟ କଥାକୁ ନେଇ ଉଭୟ ପରିବାରଙ୍କ ମଧ୍ୟରେ କଳହ ଲାଗି ରହିଥିଲା। ଦୁଇ ପରିବାରଙ୍କ ଘରକୁ ଜଳଯୋଗାଣ ପାଇଁ ଗୋଟିଏ ମୋଟର ରହିଛି। ଉକ୍ତ ପାଣି ମୋଟରଟି ଚାଲୁ କରିବା ପାଇଁ ରହିଥିବା ସୁଇଚଟି ନରସିଂହଙ୍କ ଘରେ ରହିଛି। ଅନ୍ୟପଟେ ସୋମବାର ପଙ୍କଜଙ୍କ ଟାଙ୍କିରେ ପାଣି ନ ଥିବାରୁ ସେ ମୋଟର ଲଗାଇବା ପାଇଁ ନରସିଂହକୁ କହିଥିଲେ। ଏହାକୁ କେନ୍ଦ୍ରକରି ନରସିଂହ ଓ ତାଙ୍କ ସ୍ତ୍ରୀ ଓ ପୁଅ ଶାବଳ ଓ ହାତୁଡ଼ିରେ ପଙ୍କଜଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏପରିକି ପଙ୍କଜଙ୍କ ସ୍ତ୍ରୀ ଦୀପ୍ତି ମହାପାତ୍ର ଏହାର ପ୍ରତିବାଦ କରିବାରୁ ତାଙ୍କୁ ମଧ୍ୟ ଆକ୍ରମଣ କରାଯାଇଥିଲା। ପରେ ଏନେଇ ଦୀପ୍ତି ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ଅନୁସନ୍ଧାନ କରି ଅଭିଯୁକ୍ତ ନରସିଂହଙ୍କୁ ଗିରଫ କରିଥିଲା ବୋଲି କହିଛି।