ବମ୍ବେ: ଅଭିନେତା ସୋନୁ ସୁଡ। କରୋନା କାଳରେ କୌଣସି ଭଗବାନଙ୍କଠାରୁ କମ୍ ନୁହନ୍ତି। କାରଣ ଭଗବାନ ହୁଏତ ଡେରିରେ ଶୁଣନ୍ତି, ହେଲେ ସୋନୁଙ୍କୁ କିଛି କହିଲେ ତାହା ଶୀଘ୍ର ହୋଇଯାଏ। ସୋସିଆଲ ମିଡିଆରେ ଏଭଳି କାର୍ଯ୍ୟକୁ ନେଇ ତାଙ୍କୁ ସୁପରମ୍ୟାନ୍ ଭାବେ ଅବିହିତ କରାଯାଉଛି। ପ୍ରଥମେ ଅନ୍ୟ ରାଜ୍ୟରେ ଫସିଥିବା ପ୍ରବାସୀମାନଙ୍କୁ ସହାୟତାର ହାତ ବଢ଼ାଇଥିଲେ ସୋନୁ। ଏହାପରେ କେହି ବି ଅସୁବିଧାରେ ପଡ଼ିଲେ ସୋନୁ ତାଙ୍କୁ ସହାୟତାର ହାତ ବଢ଼ାଉଥିବା ଦେଖିବାକୁ ମିଳୁଛି। ନିକଟରେ ଆନ୍ଧ୍ରପ୍ରଦେଶର ଏକ କୃଷକ ପରିବାରକୁ ବଳଦ ବଦଳରେ ଟ୍ରାକ୍ଟର ଦେଇ ଚର୍ଚ୍ଚାକୁ ଆସିଥିଲେ। ଏବେ ବିହାରରେ ବନ୍ୟା ପ୍ରଭାବିତ ହୋଇଥିବା ଏକ ପରିବାରକୁ ସହଯୋଗ କରିବାକୁ ଆଗେଇ ଆସିଛନ୍ତି ସୋନୁ।
ବିହାରରେ ବନ୍ୟାରେ ଫସି ରହିଥିବା ଭୋଳା ନିଜର ପୁଅ ଏବଂ ୨ଟି ମଇଁଷିକୁ ହରାଇଛନ୍ତି। ଜଣେ ମହିଳା ତାଙ୍କୁ ସହାୟତା କରିବା ପାଇଁ ଗୁହାରି କରିଥିଲେ। ସେ ଭୋଳାଙ୍କୁ ଏକ ଗାଈ ଦେବାକୁ ଚାହାନ୍ତି। ଏଥିପାର୍ଇ ୫୦ରୁ ୬୦ହଜାର ଟଙ୍କା ଆବଶ୍ୟକ ବୋଲି ସେ କହିଥିଲେ। ହେଲେ ଏହାଜାଣିବା ପରେ ସୋନୁ ତାଙ୍କୁ ମଇଁଷି ଦେବାକୁ ନିଶ୍ଚିତ କରିଛନ୍ତି। ଫଳରେ ସେମାନେ କ୍ଷୀର ବିକ୍ରି କରି ଜୀବନଜୀବିକା ଚଳାଇପାରିବେ। ସନ୍ଧ୍ୟା ସୁଦ୍ଧା ତାଙ୍କ ପାଖରେ ମଇଁଷି ପହଞ୍ଚିଯିବ ବୋଲି ସୋନୁ ଟୁଇଟ୍ କରି କହିଛନ୍ତି। ଏହା ଏବେ ଭାଇରାଲ ହେବାରେ ଲାଗିଛି। ତାଙ୍କୁ ବହୁତ ପ୍ରଶଂସା କରାଯାଉଛି।
