ଭୁବନେଶ୍ୱର,୨୨ା୯(ଅନିଲ ଦାସ): ଦୁର୍ନୀତି ଓ ଜନ ବିରୋଧୀ କାର୍ଯ୍ୟ ପାଇଁ ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଏବଂ ରେମୁଣା ବିଧାୟକ ସୁଧାଂଶୁ ଶେଖର ପରିଡ଼ାଙ୍କୁ ବିଜେଡିରୁ ଗୁରୁବାର ବହିଷ୍କାର କରାଯାଇଛି। ବିଧାନସଭାର ସ୍ବଳ୍ପକାଳୀନ ମୌସୁମୀ ଅଧିବେଶନ ଶୁକ୍ରବାରଠାରୁ ଆରମ୍ଭ ହେଉଛି। ବ୍ୟାଙ୍କ ଋଣ ଜାଲିଆତି ଏବଂ ସରକାରୀ ଅର୍ଥ ହଡ଼ପ ପ୍ରସଙ୍ଗକୁ ନେଇ ବିରୋଧୀ ସରକାରଙ୍କୁ ଜୋରଦାର ଆକ୍ରମଣ କରିବା ପୂର୍ବରୁ ବିଜେଡି ନିଜର ଦୁଇ ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ବିରୋଧୀଙ୍କୁ ଏକପ୍ରକାର ଚେକ୍ ଦେଇଛି। ବିରୋଧୀ ଏହାର ମୌକା ଉଠାଇବାକୁ ଯୋଜନା କରୁଥିବା ବେଳେ ପାଦେ ଆଗକୁ ଯାଇ ଶାସକ ଦଳ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ଅନ୍ୟ ପକ୍ଷରେ ଦଳରୁ ବହିସ୍କାର ହୋଇଥିଲେ ମଧ୍ୟ ଉଭୟ ବିଧାୟକଙ୍କ ବିରୋଧରେ ଦଳବଦଳ ଆଇନ ଲାଗୁ ହେବ ନାହିଁ। ଉଭୟଙ୍କ ବିଧାୟକ ସଦସ୍ୟତା ବଳବତ୍ତର ରହିବ। ବିଜେଡି ପକ୍ଷରୁ ନିଜ ଦଳର ବିଧାୟକଙ୍କୁ ବହିଷ୍କାର ନେଇ ବାଚସ୍ପତିଙ୍କୁ ସରକାରୀ ଦଳ ମୁଖ୍ୟ ସଚେତକଙ୍କ ଜରିଆରେ ଅବଗତ କରାଯିବ। ଏହା ପରେ ସେହି ବିଧାୟକମାନେ ଆଉ ବିଜେଡି ସହ ବସିପାରିବେ ନାହିଁ। ବାଚସ୍ପତି ସେମାନଙ୍କୁ ସ୍ବତନ୍ତ୍ର ସିଟ୍ ବ୍ୟବସ୍ଥା କରିବେ।
ବରିଷ୍ଠ ଆଇନଜୀବୀ ବିଶ୍ୱପ୍ରିୟ କାନୁନ୍ଗୋ କହିଛନ୍ତି, ବିଜେଡିରୁ ବହିଷ୍କୃତ ବିଧାୟକଙ୍କ କ୍ଷେତ୍ରରେ ଦଳ ବିରୋଧୀ ଆଇନ(ଆଣ୍ଟି ଡିଫେକ୍ସନ ଲ’) ଲାଗୁ ହେବ ନାହିଁ। ବହିଷ୍କୃତ ବିଧାୟକ ଦଳରୁ ଇସ୍ତଫା କିମ୍ବା ଅନ୍ୟ ଦଳରେ ଯୋଗ ନ ଦେବା ଯାଏ ସେମାନଙ୍କ ସଦସ୍ୟ ପଦ ଯଥାପୂର୍ବ ରହିବ। ବାଚସ୍ପତି ସେମାନଙ୍କୁ ସ୍ବତନ୍ତ୍ର ସିଟ୍ ଅନୁମୋଦନ କରିବେ। ଏହି କାରଣରୁ ବିଜେଡିରୁ ବହିଷ୍କୃତ ହୋଇଥିବା ଗୋପାଳପୁର ବିଧାୟକ ଏବଂ ଚିଲିକା ବିଧାୟକଙ୍କ ସଦସ୍ୟତା ଏବେ ବି କାଏମ ରହିଛି। ପୂର୍ବତନ ଆଇନ ମନ୍ତ୍ରୀ ତଥା କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ଦଳରୁ ବହିଷ୍କୃତ ହେଲେ ମଧ୍ୟ ବିଧାୟକଙ୍କ ସଦସ୍ୟତା ରହିପାରିବ। ଦଳର ହୁଇପ୍ ଅମାନ୍ୟ, ଇସ୍ତଫା କିମ୍ବା ଦଳ ବଦଳ ନ କରିବା ଯାଏ ବିଧାୟକମାନଙ୍କର ସଦସ୍ୟତା ପୂର୍ବପରି କାଏମ ରହିବ। ତେବେ ସେମାନଙ୍କ ପାଇଁ ବାଚସ୍ପତି ସ୍ବତନ୍ତ୍ର ସିଟ୍ ବ୍ୟବସ୍ଥା କରିପାରିବେ।