ଅମରପାଲି,୩ା୯(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ବହଳପଦର ପଞ୍ଚାୟତର ସୁରଧାପାଲି (ହୋତାପାଲି )ଗ୍ରାମରେ ସପ୍ତାହକ ମଧ୍ୟରେ କିଡ୍ନୀ ରୋଗରେ ଆକ୍ରାନ୍ତ ହୋଇ ଦୁଇ ଜଣ ଆଦିବାସୀ ମହିଳାଙ୍କ ମୃତ୍ୟୁ ଘଟିଥିଲା । ଏନେଇ ଗତ ୨୨ତାରିଖ ଧରିତ୍ରୀରେ ‘କିଡନୀ ଆକ୍ରାନ୍ତ ଆଦିବାସୀ ମହିଳାଙ୍କ ମୃତ୍ୟୁ’ ଏବଂ ଗତ ୨୭ତାରିଖରେ ‘ସ୍ବାମୀ ମରିଥିଲେ,ସ୍ତ୍ରୀ ବି କିଡନୀ ରୋଗରେ ମଲେ’ଶୀର୍ଷକ ଦୁଇଟି ତଥ୍ୟଭିତ୍ତିକ ଖବର ପ୍ରକାଶ ପାଇଥିଲା। ଏହି ଖବର ପ୍ରକାଶ ପାଇବା ପରେ ବୀରମହାରାଜପୁର ଉପଖଣ୍ଡ ଡାକ୍ତରଖାନାର ଏକ ମେଡିକାଲ ଟିମ୍ ହୋତାପାଲି ଗ୍ରାମରେ ପହଞ୍ଚି ତଦନ୍ତ ଆରମ୍ଭ କରିଛି। ମେଡିକାଲ ଟିମ୍ରେ ଆୟୁର୍ବେଦିକ ଡାକ୍ତର ଅମିତ କୁମାର ମୁଦୁଲି, ଜନସ୍ବାସ୍ଥ୍ୟ ସଂପ୍ରସାରଣ ଅଧିକାରିଣୀ ସ୍ବର୍ଣ୍ଣପ୍ରଭା ଜୁଏଡ,ଭାରପ୍ରାପ୍ତ ସ୍ବାସ୍ଥ୍ୟ ପରିଦର୍ଶକ ଗିରିଧାରୀ ସାହୁ ଓ ସ୍ଥାନୀୟ ଆଶାକର୍ମୀ ଶୁଭ୍ରାଙ୍ଗୀ ଲାକ୍ରା ପ୍ରମୁଖ ହୋତାପାଲିକୁ ଯାଇ କିଡ୍ନୀ ରୋଗରେ ମୃତକଦ୍ବୟଙ୍କ ଘରକୁ ଯାଇ ସେମାନଙ୍କ ମୃତ୍ୟୁର କାରଣ ଓ ସେମାନେ କେଉଁଠି ଓ କିପରି ଚିକିତ୍ସା ହେଉଥିଲେ ତାହାର ତଥ୍ୟ ସଂଗ୍ରହ କରିଛନ୍ତି। ଏହାସହିତ ଗ୍ରାମର କିଡ୍ନୀ ଆକ୍ରାନ୍ତ ସନ୍ଦେହ ଥିବା ବ୍ୟକ୍ତିଙ୍କ ରକ୍ତ ନମୁନା ସଂଗ୍ରହ କରିଛନ୍ତି। ପାନୀୟ ଜଳ ଯୋଗୁ କିଡ୍ନୀ ରୋଗ ବ୍ୟାପୁଥିବା ସନ୍ଦେହ କରି ଗ୍ରାମର ସମସ୍ତ ନଳକୂପର ଜଳ ନମୂନା ମଧ୍ୟ ସଂଗ୍ରହ କରିଥିବା ଜଣାପଡିଛି। ଯେଉଁମାନେ କିଡନୀ ଆକ୍ରାନ୍ତ ହୋଇଛନ୍ତି ସେମାନଙ୍କୁ ମାଗଣା ଚିକିତ୍ସା କରାଯିବାର ବ୍ୟବସ୍ଥା କରାଯିବ ବୋଲି ଜଣାପଡିଛି। ସୂଚନାଯୋଗ୍ୟ, ହୋତାପାଲି ଗ୍ରାମରେ ଗତ ୨୧ତାରିଖରେ ମେରି ଏକ୍କା(୫୦) ଓ ଗତ ୨୫ତାରିଖରେ ଗାନ୍ଦ ମିଞ୍ଜ(୫୨)ନାମକ ଆଦିବାସୀ ମହିଳାଙ୍କ କିଡ଼ନୀ ରୋଗରେ ମୃତ୍ୟୁ ହୋଇଥିଲା। ଏପରି କି ମୃତ ଗାନ୍ଦଙ୍କ ସ୍ବାମୀ ବୁଧୁ ମିଞ୍ଜଙ୍କ ପ୍ରାୟ ୧୧ମାସ ପୂର୍ବରୁ କିଡନୀ ରୋଗରେ ଆକ୍ରାନ୍ତ ହୋଇ ମୃତ୍ୟୁ ହୋଇଥିଲା। ମୃତ ଗାନ୍ଦଙ୍କ ଏକମାତ୍ର ପୁଅ ଦାଦନ ଖଟୁଥିବା ବେଳେ ବଡ ଝିଅ ମାଙ୍ଗ୍ରୀତା(୧୬)ମାଟ୍ରିକ ପାସ କରି ମଧ୍ୟ ଅର୍ଥାଭାବରୁ ପାଠ ପଢି ପାରୁନାହିଁ। ସାନ ଝିଅ ଗୀତା (୧୩)ସାଗଯୋରୀ ପ୍ରକଳ୍ପ ହାଇସ୍କୁଲରେ ନବମ ଶ୍ରେଣୀରେ ପଢୁଥିଲେ ମଧ୍ୟ ଏବେ ତାଙ୍କ ପାଠପଢାରେ ସନ୍ଦେହ ଦେଖାଯାଇଛି। ଏଭଳି ପରିସ୍ଥିତିରେ କିଡ୍ନୀ ଆକ୍ରାନ୍ତ ମୃତକଙ୍କ ପରିବାରକୁ କ୍ଷତିପୂରଣ ଦେବା ସହିତ ଆକ୍ରାନ୍ତଙ୍କୁ ମାଗଣା ସ୍ବାସ୍ଥ୍ୟସେବା ଯୋଗାଇ ଦେବାକୁ ସାଧାରଣରେ ଦାବି ହେଉଛି।