ସାରସକଣା, ୫ା୬-ମହାମାରୀ କରୋନା କାଳରେ ସାମ୍ନାକୁ ଆସୁଛି ଅନେକ କରୁଣ ଦୃଶ୍ୟ। ମୟୂରଭଞ୍ଜ ଜିଲା ସାରସକଣା ବ୍ଲକ ଝାରପୋଖରିଆ ପଞ୍ଚାୟତ ବମ୍ବେଛକ ବଜାରରେ ଜଣେ ମାନସିକ ବିକୃତ ମହିଳା ଭୋକ ବିକଳରେ ରାସ୍ତାକଡ଼ ଡଷ୍ଟବିନ୍ରୁ ଖାଦ୍ୟ ସାଉଁଟି ଖାଉଥିତ୍ବା ଦେଖିବାକୁ ମିଳିଥିଲା। ଯେ କେହି ଏହି ଦୃଶ୍ୟ ଦେଖିବ ବିଚଳିତ ହୋଇଉଠିବ। କରୋନା ସମୟରେ ଏଭଳି ଦୃଶ୍ୟ ସରକାରଙ୍କ ଯୋଜନା ଉପରକୁ ଆଙ୍ଗୁଳି ନିଦ୍ଦେର୍ର୍ଶ କରୁଛି। ବୁଲା ଗୋରୁଙ୍କ ପାଇଁ ସରକାର ଅର୍ଥ ଯୋଗାଇ ଦେଉଥିବା ବେଳେ ମାନସିକ ବିକାରଗ୍ରସ୍ତଙ୍କ କଥା ଭୁଲିଯିବା ଦୁଃଖର ବିଷୟ। ଉଲ୍ଲେଖଯୋଗ୍ୟ ଯେ, ସଂକ୍ରମଣ ଚେନ୍ ଭାଙ୍ଗିବାକୁ ସପ୍ତାହରେ ୫ ଦିନ ଲକଡାଉନ୍ ଓ ଶନିବାର, ରବିବାର ଦୁଇ ଦିନ ଶଟ୍ଡାଉନ୍ ଘୋଷଣା କରିଛନ୍ତି ରାଜ୍ୟ ସରକାର। ଶଟଡାଉନ୍ କାରଣରୁ ଦୋକାନ ବଜାର ସମ୍ପୂର୍ଣ୍ଣ ଭାବେ ବନ୍ଦ ରହୁଛି। ତେବେ ଏସବୁ ମଧ୍ୟରେ ସବୁଠାରୁ ପ୍ରଭାବିତ ହେଉଛନ୍ତି ମାନସିକ ବିକାରଗ୍ରସ୍ତ ବ୍ୟକ୍ତି। ସ୍ଥାନୀୟ କିଛି ସ୍ବେଚ୍ଛାସେବୀ ସେମାନଙ୍କୁ ଖାଇବାକୁ ଦେଉଥିବା ବେଳେ ଅନେକ ସମୟରେ ସେମାନେ ଭୋକିଲା ରହୁଛନ୍ତି। ବ୍ଲକ ତଥା ଜିଲା ପ୍ରଶାସନ ମଧ୍ୟ ଏକ୍ଷେତ୍ରରେ ନୀରବ ରହିବା ଆଶ୍ଚର୍ଯ୍ୟଚକିତ କରିଛି।
