ଯେତେବେଳେ ଆପଣ ଛୋଟ ଥିବେ, ସେତେବେଳେ ନିଶ୍ଚିତ ଏକ କାହାଣୀ ପଢ଼ିଥିବେ। ତାହା ଥିଲା ସିଂହ ଏବଂ ମୂଷାର କାହାଣୀ। ଯେଉଁଥିରେ ମୂଷାଟି ଜାଲକୁ ଦାନ୍ତରେ କାଟି ଫସି ରହିଥିବା ସିଂହର ଜୀବନ ରକ୍ଷା କରିଥିଲା। ଠିକ୍ ସେମିତି ଧୋଲପୁର ଜିଲାରେ ଏପରି ଏକ ସତ ଘଟଣା ଦେଖିବାକୁ ମିଳିଛି। ସିକରୋଦା ଗ୍ରାମରେ ଏକ ମୂଷା ଆସି ରାତିରେ ଶୋଇଥିବା ପରିବାର ଉପରେ ଡେଇଁଥିଲା। ସେହି ସମୟରେ ଉକ୍ତ ପରିବାର ଲୋକେ ଉଠିପଡ଼ି ବାହାରକୁ ଦୌଡ଼ିଥିଲେ। ଜାଣନ୍ତୁ ପୂରା କାରଣ…
ପରିବାର ଲୋକେ ବାହାରକୁ ଆସିବା ପରେ ଦୁଇ ମହଲା ଘରର ଏକ ଅଂଶ ହଠାତ୍ ଭୁଶୁଡ଼ି ପଡ଼ିଲା। ଦୁର୍ଘଟଣାର କିଛି ମିନିଟ୍ ପୂର୍ବରୁ ପରିବାରର ୫ ଜଣ ସଦସ୍ୟ ଘରେ ଶୋଇଥିଲେ। ଏହି ସମୟରେ ଏକ ମୂଷା ଆସି ସେମାନଙ୍କ ଉପରେ ଡେଇଁବାକୁ ଆରମ୍ଭ କରିଥିଲା। ଫଳରେ ସମସ୍ତଙ୍କ ନିଦ ଭାଙ୍ଗି ଯାଇଥିଲା। ସମସ୍ତେ ବାହାରକୁ ଚାଲି ଆସିଥିଲେ।
ପରିବାର ସଦସ୍ୟଙ୍କଠାରୁ ମିଳିଥିବା ସୂଚନାନୁଯାୟୀ, ପରିବାର ଏବଂ ଘରକୁ ଆସିଥିବା ସମ୍ପର୍କୀୟମାନେ ବିଭିନ୍ନ କୋଠରିରେ ଶୋଇଥିଲେ। ତା’ପରେ ହଠାତ୍ ଏକ ମୂଷା ଡେଇଁ ସେମାନଙ୍କ ଉପରେ ପଡ଼ିଲା। ଯେଉଁଥିପାଇଁ ସେ ଉଠିପଡ଼ିଥିଲେ। ସେହି ସମୟରେ, ସେ ଅନୁଭବ କଲେ ଯେ; ସେଠାରେ କିଛି ଭାଙ୍ଗିବା ଶବ୍ଦ ହେଉଛି। ତେଣୁ ସେ ଭାବିଲେ ଚୋର ବୋଧେ ଚୋରି କରିବାକୁ ଆସିଛି।
ପରିବାରର ସମସ୍ତ ସଦସ୍ୟ ଉଠି ବାହାରକୁ ଦୌଡ଼ିଲେ। ଏହା ସହିତ ଘର ପଛପଟରେ ବନ୍ଧା ହୋଇଥିବା ପଶୁମାନଙ୍କୁ ମଧ୍ୟ ଖୋଲି ଦିଆଯାଇଥିଲା। ସେତେବେଳେ ଘରର ପଛ ଭାଗ ଭୁଶୁଡ଼ି ପଡ଼ିଥିଲା। ଯେଉଁଥିପାଇଁ ତାଙ୍କ ପରିବାର, ସମ୍ପର୍କୀୟ ଏବଂ ମୂଲ୍ୟବାନ ପଶୁମାନଙ୍କ ଜୀବନ ରକ୍ଷା ହୋଇଗଲା। ସେ କହିଥିଲେ, ମୂଷା ଦେବଦୂତ ଭାବରେ ଆସିଥିଲା, ଯେଉଁଥିପାଇଁ ସମସ୍ତଙ୍କ ଜୀବନ ରକ୍ଷା ହୋଇଗଲା।
ସୂଚନା ପାଇ ଘଟଣାସ୍ଥଳରେ ପହଞ୍ଚିଥିବା ପାଟଓ୍ବାରୀ ବିଦାରାମ କହିଛନ୍ତି, ଘର ଭୁଶୁଡ଼ିବା ଯୋଗୁ ୬ କ୍ୱିଣ୍ଟାଲ ଗହମ, ୫ କ୍ୱିଣ୍ଟାଲ ସୋରିଷ, ୯ କ୍ୱିଣ୍ଟାଲ ବାଜରା, ଫ୍ରିଜ, ଗ୍ରାଇଣ୍ଡର, ଏକ ଖଟ, ବାଇକ୍, ଷ୍ଟାର୍ଟର ଆଦି ନଷ୍ଟ ହୋଇଛି। ଏଥିସହ ୧.୫ ଲକ୍ଷ ମୂଲ୍ୟର ମେଶିନ ଏବଂ ଅନ୍ୟାନ୍ୟ ଘରୋଇ ସାମଗ୍ରୀ ନଷ୍ଟ ହୋଇଯାଇଛି।