ବଡବିଲ, ୩୧।୩(ସ୍ବ.ପ୍ର): କେନ୍ଦୁଝର ଜିଲା ବଡବିଲ ଡାକ ବଙ୍ଗଳା ଛକ ନିକଟରେ ମଙ୍ଗଳବାର ହଠାତ ଏକ ଚଳନ୍ତା କାରରେ ନିଆଁ ଲାଗି ଜଳିଯାଇଛି। ମାତ୍ର କାରରେ ଥିବା ଚାଳକ ଓ ଜଣେ ଆରୋହୀ ଅଳ୍ପକେ ବର୍ତ୍ତିଯାଇଛନ୍ତି।
ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ରାତି ପ୍ରାୟ ସାଢେ ୯ଟାରେ ସ୍ଥାନୀୟ ଏକ ଘରୋଇ ଫାଇନାନ୍ସ କମ୍ପାନୀର ବ୍ରାଞ୍ଚ ମ୍ୟାନେଜର ସୁରେନ୍ଦ୍ର କୁମାର ଦାସ ଓ ଜଣେ ଆରୋହୀ କାର(ଓଆର ୦୫ଏକ୍ସ ୦୮୧୧) ଯୋଗେ ବଜାର ଅଭିମୁଖେ ଯାଉଥିଲେ। ହଠାତ କାର ଭିତରେ ଧୂଆଁ ଭର୍ତ୍ତି ହୋଇଯିବାରୁ ଉଭୟ କାରରୁ ଓହ୍ଲାଇ ପଡିଥିଲେ। କାରର ଇଞ୍ଜିନ ନିକଟରୁ ନିଆଁ ବାହାରୁଥିବା ଦେଖି କାରରେ ଥିବା ପାଣି ସାହାଯ୍ୟରେ ନିଆଁ ଲିଭାଇବାକୁ ଚେଷ୍ଟା କରି ବିଫଳ ହୋଇଥିଲେ। ଖବର ପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ବହୁ ଚେଷ୍ଟା ପରେ ଆୟତ କରିବାକୁ ସକ୍ଷମ ହୋଇଥିଲେ। ତେବେ ନିଆଁକୁ ଆୟତ କରିବା ପୂର୍ବରୁ କାରଟି ସମ୍ପୂର୍ଣ୍ଣ ଜଳିଯାଇଥିଲା। ତେବେ କାରରେ କୌଣସି ସର୍ଟଶର୍କିଟ ଯୋଗୁ ନିଆଁ ଲାଗିଥିବା ଅନୁମାନ କରାଯାଇଛି। ମଝି ରାସ୍ତାରେ ନିଆଁ ଲାଗିଥିବାରୁ ପ୍ରାୟ ଅଧଘଣ୍ଟା ପର୍ଯ୍ୟନ୍ତ ରାଜ୍ୟ ରାଜପଥ ଜାମ ହୋଇଯାଇଥିଲା। ନିଆଁ ଲିଭିବା ପରେ ଯାତାୟାତ ସମ୍ଭବ ହୋଇଥିଲା।
