ନୂଆଦିଲ୍ଲୀ, ୯ା୨:କଶ୍ମୀର ଉପରେ ସୋସିଆଲ ମିଡିଆରେ ବିବାଦୀୟ ପୋଷ୍ଟ କରି ଅଡ଼ୁଆରେ ପଡ଼ିଛନ୍ତି ଏକାଧିକ ବହୁରାଷ୍ଟ୍ରୀୟ କମ୍ପାନୀ। କାର୍ ନିର୍ମାଣକାରୀ ଦକ୍ଷିଣ କୋରିଆ କମ୍ପାନୀ ହ୍ୟୁଣ୍ଡାଇ, କିଆ, ଆମେରିକୀୟ ଫାଷ୍ଟଫୁଡ୍ କମ୍ପାନୀ କେଏଫ୍ସି ଏବଂ ପିଜ୍ଜା ହଟ୍ ସମେତ ଡୋମିନୋସ୍, ଓସାକା ବ୍ୟାଟେରୀ, ଆଇସୁଜୁ ଡି-ମାକ୍ସ, ବୋସ୍କୋ ଫାର୍ମାସ୍ୟୁଟିକାଲ କମ୍ପାନୀ ପ୍ରମୁଖ ପାକିସ୍ତାନରେ କଶ୍ମୀର ଏକତା ଦିବସ ପାଳନ ଉପଲକ୍ଷେ କରିଥିବା ପୋଷ୍ଟକୁ ଭାରତରେ ତୀବ୍ର ବିରୋଧ କରାଯାଇଛି। ବହୁ ସଂଖ୍ୟାରେ ଲୋକେ ଏହି କମ୍ପାନୀଗୁଡ଼ିକୁ ବଏକଟ୍ କରିବାକୁ ଟ୍ରେଣ୍ଡ୍ ଚଳାଇଛନ୍ତି। ସୁପ୍ରିମକୋର୍ଟ ଆଇନଜୀବୀ ବିନିତ ଜିନ୍ଦଲ କମ୍ପାନୀଗୁଡ଼ିକୁ ଭାରତରେ ବ୍ୟାନ୍ କରିବା ପାଇଁ ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କୁ ମଙ୍ଗଳବାର ଚିଠି ଲେଖି ଦାବି କରିଛନ୍ତି। ସେମାନେ କରିଥିବା ପୋଷ୍ଟ ଆପତ୍ତିଜନକ ଏବଂ ଏହା ଭାରତର ସାର୍ବଭୌମତ୍ୱକୁ ଚ୍ୟାଲେଞ୍ଜ କରୁଥିବା ବିନିତ କହିଛନ୍ତି। ଘୋର ବିରୋଧ ଓ ସମାଲୋଚନାର ଶିକାର ହେବା ପରେ କେଏଫ୍ସି ଓ ହ୍ୟୁଣ୍ଡାଇ ଏଭଳି ପୋଷ୍ଟ ପାଇଁ କ୍ଷମା ମାଗିଛନ୍ତି। ସେପଟେ ପିଜ୍ଜା ହଟ୍ ଏହା ଉପରେ ନିଜର ସ୍ପଷ୍ଟୀକରଣ ରଖିଛି।
ଗତ ୫ ତାରିଖରେ ପାକିସ୍ତାନ ଦ୍ୱାରା ପାଳନ ହେଉଥିବା ‘କଶ୍ମୀର ଏକତା ଦିବସ’ ଉପରେ ହୁଣ୍ଡାଇ ପାକିସ୍ତାନ ପକ୍ଷରୁ ଏକ ଟୁଇଟ କରାଯାଇଥିଲା। ‘କଶ୍ମୀରବାସୀଙ୍କ ବଳିଦାନକୁ ମନେପକାଇ ସେମାନଙ୍କ ସ୍ବାଧୀନତା ସଂଗ୍ରାମକୁ ଆଗେଇ ନେବା’ ବୋଲି ଏଥିରେ ଲେଖାଯାଇଥିଲା। ଏଭଳି ପୋଷ୍ଟ କରି କଶ୍ମୀରରେ ଆତଙ୍କବାଦୀ ହିଂସାକୁ ସ୍ବାଧୀନତା ସଂଗ୍ରାମର ଆଖ୍ୟା ଦିଆଯାଇଥିବା ଏବଂ ଏହା ଭାରତର ଅବିଚ୍ଛେଦ୍ୟ ଅଙ୍ଗ ହୋଇଥିଲେ ବି ହ୍ୟୁଣ୍ଡାଇ ଏହାର ସ୍ବାଧୀନତା ଦାବି କରିଥିବା ଅଭିଯୋଗ ହୋଇଛି। ଏହାକୁ ନେଇ ବିରୋଧ ତୀବ୍ର ହେବାପରେ ବିବାଦୀୟ ଟୁଇଟ୍କୁ ହଟାଇ ଦିଆଯାଇଥିଲା। ସେହିପରି କଶ୍ମୀର ଖୁବଶୀଘ୍ର ଏକ ସାର୍ବଭୌମ ରାଷ୍ଟ୍ର ହେଉ ବୋଲି କେଏଫ୍ସି ପକ୍ଷରୁ ପୋଷ୍ଟ କରାଯାଇଥିଲା। ଏହାକୁ ନେଇ କେଏଫ୍ସି ଓ ହ୍ୟୁଣ୍ଡାଇ ସୋମବାର କ୍ଷମା ପ୍ରାର୍ଥନା କରିଛନ୍ତି। ମଙ୍ଗଳବାର ହ୍ୟୁଣ୍ଡାଇ ପକ୍ଷରୁ ଏ ନେଇ ଆଉ ଏକ ବିବୃତି ଜାରି ହୋଇଛି। କେଏଫ୍ସିର କେତେକ ସୋସିଆଲ ମିଡିଆ ଚ୍ୟାନେଲରେ ଏପରି ପୋଷ୍ଟ କରାଯାଇଥିବାରୁ ଦୁଃଖିତ। ‘ଭାରତ ପ୍ରତି ଆମର ଯଥେଷ୍ଟ ସମ୍ମାନ ରହିଛି। ଗର୍ବର ସହ ଭାରତୀୟଙ୍କ ସେବା ପାଇଁ ଆମେ ପ୍ରତିବଦ୍ଧ’ ବୋଲି କେଏଫ୍ସି କହିଛି। ସେହିପରି ସୋସିଆଲ ମିଡିଆରେ ପୋଷ୍ଟ ହୋଇଥିବା ବିଷୟବସ୍ତୁକୁ ପିଜ୍ଜା ହଟ୍ ସମର୍ଥନ କରେ ନାହିଁ ବୋଲି କହିଛି। ମଙ୍ଗଳବାର ଦ୍ୱିତୀୟ ବିବୃତି ଜାରି କରି ହ୍ୟୁଣ୍ଡାଇ ପକ୍ଷରୁ କୁହାଯାଇଛି, ସେମାନଙ୍କ ବ୍ୟବସାୟ ନୀତି ଅନୁସାରେ ହ୍ୟୁଣ୍ଡାଇ ମୋଟର୍ସ କୌଣସି ନିର୍ଦ୍ଦିଷ୍ଟ ଅଞ୍ଚଳରେ ରାଜନୈତିକ କିମ୍ବା ଧାର୍ମିକ ପ୍ରସଙ୍ଗ ଉପରେ ମନ୍ତବ୍ୟ ଦିଏ ନାହିଁ। ଏହି ନୀତି ବିରୋଧରେ ଯାଇ ପାକିସ୍ତାନର ସ୍ବାଧୀନ ବିତରକ ନିଜ ଆକାଉଣ୍ଟରୁ କଶ୍ମୀର ସମ୍ବନ୍ଧୀୟ ପୋଷ୍ଟ କରିଛନ୍ତି ବୋଲି କମ୍ପାନୀ ଟୁଇଟ୍ କରିଛି।
ଦକ୍ଷିଣ କୋରିଆ ରାଷ୍ଟ୍ରଦୂତଙ୍କୁ ସମନ
କଶ୍ମୀର ଉପରେ ହ୍ୟୁଣ୍ଡାଇର ବିବାଦୀୟ ପୋଷ୍ଟକୁ କେନ୍ଦ୍ର କରି ଭାରତର ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ଦକ୍ଷିଣ କୋରିଆ ରାଷ୍ଟ୍ରଦୂତଙ୍କୁ ସମନ କରାଯାଇଛି। ରାଷ୍ଟ୍ରଦୂତ ଚାଙ୍ଗ୍ ଜେ-ବୋକ୍ଙ୍କୁ ଏହା ଉପରେ ସ୍ପଷ୍ଟୀକରଣ ମଗାଯାଇଛି। ସେହିପରି ସିଓଲରେ ଥିବା ଭାରତୀୟ ରାଷ୍ଟ୍ରଦୂତ ଶ୍ରୀପ୍ରିୟା ରଙ୍ଗନାଥନ ମଧ୍ୟ ହ୍ୟୁଣ୍ଡାଇ ମୁଖ୍ୟାଳୟକୁ କେତେଜଣ ଅଧିକାରୀଙ୍କୁ ପଠାଇଛନ୍ତି। ଭାରତର ଅଖଣ୍ଡତା ଉପରେ ଏହି ପ୍ରସଙ୍ଗ ଜଡ଼ିତ ଥିବାରୁ କମ୍ପାନୀ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ ବୋଲି ବହିର୍ବ୍ୟାପାର
ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତିରେ କୁହାଯାଇଛି। ଅନ୍ୟପକ୍ଷରେ ଦକ୍ଷିଣ କୋରିଆ ବହିର୍ବ୍ୟାପାର ମନ୍ତ୍ରୀ ଚୁଙ୍ଗ୍ ୟି-ୟୋଙ୍ଗ୍ ମଙ୍ଗଳବାର ଭାରତ ପ୍ରତିପକ୍ଷ ଏସ୍. ଜୟଶଙ୍କରଙ୍କ ସହ ଫୋନ୍ ଯୋଗେ କଥା ହୋଇଛନ୍ତି। ଏଥିରେ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ପ୍ରସଙ୍ଗ ସମେତ ହ୍ୟୁଣ୍ଡାଇର ବିବାଦୀୟ ପୋଷ୍ଟ ଉପରେ ଆଲୋଚନା ହୋଇଥିବା ଜଣାପଡ଼ିଛି। ହ୍ୟୁଣ୍ଡାଇ ପକ୍ଷରୁ କଶ୍ମୀର ଉପରେ କରାଯାଇଥିବା ପୋଷ୍ଟକୁ ନେଇ ୟି-ୟୋଙ୍ଗ୍ ଦୁଃଖ ପ୍ରକାଶ କରିଥିବା ଜୟଶଙ୍କର ଟୁଇଟ୍ କରିଛନ୍ତି।