ଯାଜପୁର ଜିଲା ବଡ଼ଚଣା ବ୍ଲକ ଅନ୍ତର୍ଗତ ବରୁଣାବନ୍ତ ପାହାଡ ପାଦଦେଶରେ ତଥା ଚଣ୍ଡିଖୋଲ ଛକଠାରୁ ମାତ୍ର ୪ କିମି ଦୂରରେ ରହିଛି ମହାବିନାୟକ ମନ୍ଦିର। ଏହି ପୀଠକୁ ବିଭିନ୍ନ ପ୍ରାନ୍ତରୁ ଭକ୍ତ ଆସିଥାନ୍ତି। ଏଠାକାର ନିଆରା କଥା ହେଲା ମହାପ୍ରଭୁଙ୍କ ମନ୍ଦିର ନିକଟରେ ସଦା ସର୍ବଦା ଝରଣା ଅବିରତ ବୋହିଯାଉଛି। ଏହାକୁ ନେଇ ଲୋକ କଥା ରହିଛି ଝରଣା କେବେ ଶୁଖି ନ ଥାଏ। କେବଳ ରାଜ୍ୟକୁ କୌଣସି ବିପତ୍ତି ପଡ଼ିଲେ ଏହାର ଦିନେ ଦୁଇ ଦିନ ପୂର୍ବରୁ ଝରଣା ଶୁଖି ଯାଇଥାଏ। ଏଠାରେ ୩ ଝରଣା ରହିଛି। ଝରଣା ପାଇଁ ବହୁ ସଂଖ୍ୟକ ମାଙ୍କଡ଼ ଅଛନ୍ତି। କିମ୍ବଦନ୍ତୀ ଅନୁଯାୟୀ ଦ୍ୱାପର ଯୁଗରେ ପଞ୍ଚୁ ପାଣ୍ଡବ ଯେତେବେଳେ ଅଜ୍ଞାତ ବାସରେ ଥିଲେ ସେତେବେଳେ ମାତା କୁନ୍ତୀ ପୁଅମାନଙ୍କ ମଙ୍ଗଳ କାମନା କରି ୧୦୮ ସ୍ବର୍ଣ୍ଣ ଚମ୍ପା ମହାବିନାୟକଙ୍କ ଉପରେ ଚଢ଼ାଇଥିଲେ। ସେଥିପାଇଁ ପାଞ୍ଚ ଭାଇ ଏକ ବର୍ଷ ଅଜ୍ଞାତ ବାସ ସାରି ଫେରି ଆସିଥିଲେ। ଏହା କେବେ ବା କେଉଁ ସମୟର ଠାକୁର ତାହା କେହି ଜାଣି ନ ଥିବା ବେଳେ ମନ୍ଦିର ନିର୍ମାଣ ସମ୍ପର୍କରେ ମଧ୍ୟ ଠିକ ତଥ୍ୟ ନାହିଁ। କେବଳ ଲୋକ କଥା ଅନୁଯାୟୀ ରାଜା ପ୍ରତାପ ରୁଦ୍ର ଦେବଙ୍କ ସମୟରେ ଏହା ନିର୍ମାଣ ହୋଇଛି। ପଞ୍ଚ ଦେବତାଙ୍କୁ ଗଣେ ନାରାୟଣେ ରୁଦ୍ରେ, ଅମ୍ବିକା ଭାସ୍କରେ ତଥା, ପଞ୍ଚଦେବ ସ୍ମରେ ନିତ୍ୟମ ମହା ପାପକ ନାଶନମ ମନ୍ତ୍ରରେ ପୂଜା କରାଯାଇଥାଏ।