ଆପଣ ନିଶ୍ଚିତ ଭାବରେ ଏକଛତ୍ରବାଦୀ ଶାସକଙ୍କ ନାଁ ଶୁଣିଥିବେ। କିନ୍ତୁ ଜାଣନ୍ତି କି ଆମେରିକାରେ ମଧ୍ୟ ଜଣେ ଏକଛତ୍ରବାଦୀ ଶାସକ ଅଛନ୍ତି। ଯିଏ ଆମେରିକାର ମରୁଭୂମିରେ ଏକ ଦେଶ ସ୍ଥାପନ କରି ନିଜକୁ ଏହାର ରାଷ୍ଟ୍ରପତି ଘୋଷଣା କରିଛନ୍ତି। ସେ ନିଜେ ନିୟମ କରିଛନ୍ତି। ନିଜ ହିସାବରେ କରନ୍ତି ଶାସନ। କେବଳ ଏତିକି ନୁହେଁ, ଏହା ମଧ୍ୟ ଜର୍ମାନୀ ସହିତ ଦୀର୍ଘ ସମୟ ଧରି ଯୁଦ୍ଧ କରୁଛି। କାରଣ ଏହି ନୂତନ ଦେଶ ଦାବି କରୁଛି ଯେ, ପୂର୍ବ ଜର୍ମାନୀ ଏହାର ଅଂଶ ଅଟେ। ଜାଣନ୍ତୁ ଏ ବିଷୟରେ…
ଏହି ଦେଶ ଆମେରିକାର ନେଭାଡା ମରୁଭୂମିରେ ରହିଛି। ଏହାର ନାମ ହେଉଛି ମଲୋସିଆ ରିପବ୍ଲିକ୍। ଏହା ଦୁନିଆର ସବୁଠାରୁ ଛୋଟ ରାଷ୍ଟ୍ର। ଏଠାରେ ନିୟମ ପାଗଳତାର ସୀମା ଅତିକ୍ରମ କରିବାକୁ ଯାଉଛି। ଏକଛତ୍ରବାଦୀ ଶାସକ କେଭିନ ବାଉଗ ଏହି ଦେଶ ଚଳାଉଛନ୍ତି। ତାଙ୍କର ପିଲାଦିନର ସ୍ବପ୍ନ ଥିଲା ରାଜ୍ୟ ପ୍ରତିଷ୍ଠା କରିବା। ଏଥିପାଇଁ ତାଙ୍କ ବନ୍ଧୁ ଜେମ୍ସ ସ୍ପିଲମ୍ୟାନଙ୍କ ସହ ସେ ୨୬ ମେ’ ୧୯୭୭ରେ ଏହାକୁ ପ୍ରତିଷ୍ଠା କରିଥିଲେ। ତା’ପରେ ବାଉଗ ନିଜକୁ ଏହାର ଡାଇରେକ୍ଟର ବୋଲି କହୁଥିଲେ କିନ୍ତୁ ପରେ ୧୯୯୯ରେ ସେ ନିଜକୁ ଏହାର ରାଷ୍ଟ୍ରପତି ଘୋଷଣା କରିଥିଲେ।
କାର୍ସନ ନଦୀ ନିକଟ ଡେଟନ ଭ୍ୟାଲିରେ ଅବସ୍ଥିତ ଏହି ଗଣତନ୍ତ୍ରର ରାଜଧାନୀ ହେଉଛି ବୋଷ୍ଟନ ଟାଉନ। ଯାହା ଏହାର ଜଣେ ନେତାଙ୍କ ନାମରେ ନାମିତ। ମୋଟ ୦.୦୦୫୩ ବର୍ଗ କିଲୋମିଟର ବ୍ୟାପିଥିବା ମଲୋସିଆ ରିପବ୍ଲିକ୍ରେ ଦୁଇଟି ଛୋଟ ସ୍ଥାନ ଅଛି, ଗୋଟିଏ ବାଉଗଙ୍କ ଘର ଏବଂ ଅନ୍ୟଟି ଡେଟନଙ୍କ ଜମି। ଏହି ଗଣତନ୍ତ୍ରର ନିଜସ୍ବ ଡାକ ସେବା, ବ୍ୟାଙ୍କ, ପର୍ଯ୍ୟଟନ ସେବା, ନୌସେନା, ସ୍ପେସ ପ୍ରୋଗ୍ରାମ, ରେଳ, ଅନ୍ଲାଇନ ଚଳଚ୍ଚିତ୍ର ଥିଏଟର ମଧ୍ୟ ଅଛି ।
କିଛି ଦିନ ପୂର୍ବରୁ ଏକ ୟୁଟ୍ୟୁବର୍ ଓ୍ବଣ୍ଟନ ଡନ୍ ଏହି ଅଞ୍ଚଳ ପରିଦର୍ଶନ କରିଥିଲେ। ସେ କେଭିନଙ୍କୁ ମଧ୍ୟ ଭେଟି ସମଗ୍ର ଅଞ୍ଚଳ ଦେଖିଥିଲେ। କେଭିନ୍ ତାଙ୍କୁ କହିଥିଲେ, ଜେମ୍ସ ରାଜା ଏବଂ ମୁଁ ପ୍ରଧାନମନ୍ତ୍ରୀ। କିନ୍ତୁ ସେ ଚାଲିଗଲେ। ମୁଁ ବଜାୟ ରଖିଛି ଯେ, ଏହା ଆମର ଦେଶ। ଏହି ରାଜ୍ୟରେ କେବଳ ତିନିଜଣ ସ୍ଥାୟୀ ବାସିନ୍ଦା ଅଛନ୍ତି। ରାଷ୍ଟ୍ରପତି କେଭିନ ବାଉଗ, ତାଙ୍କ ସ୍ତ୍ରୀ ପ୍ରଥମ ଲେଡି ଆଡ୍ରିଏନେ ଏବଂ ଝିଅ ଆଲେକ୍ସିସ ଏଠାରେ ଅଛନ୍ତି। ଯେଉଁମାନେ ସୁରକ୍ଷା ପରିଚାଳନା କରନ୍ତି।