ନୟାଗଡ଼,୨୪।୭(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ରକ୍ତଭଣ୍ଡାରରୁ ରକ୍ତ ରୋଗୀ ପାଉ ନ ଥିବାବେଳେ ଦଲାଲ ନେଉଥିବା ଅଭିଯୋଗ ହୋଇଆସୁଛି। କେତେଜଣ ଦଲାଲ ଡୋନର ସଂଗ୍ରହ କରି ରକ୍ତ ପ୍ୟାକେଟକୁ ୧୫ ଶହ ଟଙ୍କାରେ ବିକ୍ରି କରୁଛନ୍ତି। ଶନିବାର ଅପରାହ୍ନରେ ଜଣେ କ୍ୟାନସର ରୋଗୀଙ୍କ ସମ୍ପର୍କୀୟ ଦଲାଲଙ୍କଠାରୁ ୧୫୦୦ ଟଙ୍କାରେ ରକ୍ତ କିଣିଥିବା ଅଭିଯୋଗ ମିଳିଛି। ରକ୍ତ ବିକ୍ରି ଘଟଣାରେ ରକ୍ତଭଣ୍ଡାରର କର୍ମଚାରୀ ସମ୍ପୃକ୍ତି ଥିବା ଅଭିଯୋଗ ହେଉଛି। ଅନ୍ୟପକ୍ଷେ ରକ୍ତଭଣ୍ଡାରର ସିସିଟିଭି କାମ କରୁ ନ ଥିବାରୁ ଏଠାରେ ଘଟୁଥିବା ଅନିମୟିତତା ଲୁଚି ଯାଉଛି। ରକ୍ତଭଣ୍ଡାରର ସିସିଟିଭି ଅଚଳ ହୋଇଛି ନଁା ଜାଣି ଶୁଣି ଅଚଳ କରାଯାଇଛି ତାହା ତଦନ୍ତସାପେକ୍ଷ। ଏ ନେଇ ରାମଚନ୍ଦ୍ର ଷଡ଼ଙ୍ଗୀ କୁହନ୍ତି, ରକ୍ତଭଣ୍ଡାରରେ ରକ୍ତ ରୋଗୀଙ୍କୁ ମିଳୁନି। ତେବେ ଦଲାଲ କିପରି ରକ୍ତ ବିକ୍ରି କରୁଛନ୍ତି ତାହା ଆଶ୍ଚର୍ଯ୍ୟ ଲାଗୁଛି। ରକ୍ତ ବିକ୍ରି ପଛରେ ଏକ ର଼୍ୟାକେଟ କାମ କରୁଛି। ବିନା ଟେନସନରେ ଭଲ ରୋଜଗାର ହେଉଥିବାରୁ ରକ୍ତ ବିକ୍ରିକୁ ରୋକି ହେଉନି।
ରକ୍ତଭଣ୍ଡାରରେ ୧୦ ୟୁନିଟ୍ ରକ୍ତ
ଓଡ଼ିଶା ରେଡକ୍ରସ ରକ୍ତ ଭଣ୍ଡାର ନୟାଗଡ଼ରେ ୧୦ ୟୁନିଟ୍ ରକ୍ତ ଗଛିତ ଥିବା ଫଳକ କହୁଛି। ଏ ପଜିଟିଭ୍ ୧, ବି ପଜିଟିଭ ୭ଟି, ଓ ନେଗେଟିଭ ୨ଟି ଥିବା ଜଣାପଡ଼ିଛି। ତେବେ ରକ୍ତ ଭଣ୍ଡାରକୁ ଗଲେ ସବୁବେଳେ ଶୁଣିବାକୁ ମିଳୁଛି ରକ୍ତ ନାହିଁ। ଅଧିକାଂଶ ରୋଗୀ କଟକ, ଭୁବନେଶ୍ୱର ରେଫର ହେଉଛନ୍ତି। ଆଉ କିଛି ଦଲାଲଙ୍କ ବାଧ୍ୟବାଧ୍ୟକତାରେ ରକ୍ତ କିଣୁଛନ୍ତି। ଏ ନେଇ ସ୍ବେଚ୍ଛାସେବୀ ବିଭୂତି ପଟ୍ଟନାୟକ କୁହନ୍ତି, ରକ୍ତଦାନ ଶିବିର ହେଉଛି। କିଛି ଲୋକ ଆଗଭର ହୋଇ ରକ୍ତଦାନ ଶିବିର କରୁଛନ୍ତି। ଜିଲା ମୁଖ୍ୟ ଚିକିତ୍ସାଳୟ ପକ୍ଷରୁ ଲୋକଙ୍କ ମନରେ ସଚେତନ ସୃଷ୍ଟି କରାଇ ରକ୍ତଦାନ ଶିବିର କରାଯାଉନି। ଏଣୁ ରକ୍ତର ଅଭାବ ପ୍ରାୟ ସବୁଦିନ ଲାଗି ରହୁଛି। ରକ୍ତଦାନ ଶିବିର ସମୟରେ ରକ୍ତ କିଛିଦିନ ପାଇଁ ସୁବିଧାରେ ମିଳୁଛି। ଅନ୍ୟପକ୍ଷେ ରକ୍ତ ବିକ୍ରି ଅଭିଯୋଗରେ ଲଗାମ ଲଗାଇବା ନିହାତି ଦରକାର। ଏହାକୁ ପ୍ରଶାସନ ପକ୍ଷରୁ ଅସ୍ବୀକାର କରାଯାଉଥିଲେ ହେଁ ଦଲାଲ ରକ୍ତ ବିକ୍ରି କରୁଛନ୍ତି। ସେହିପରି ରକ୍ତଭଣ୍ଡାରର ସିଟିଭିକୁ ସଚଳ କରାଯିବା ଦରକାର। ଏହା ସଚଳ ହେଲେ ରକ୍ତ ବିକ୍ରି ଧରିବାରେ କିଛି ସହଯୋଗ ମିଳିପାରନ୍ତା ବୋଲି କହିଛନ୍ତି।
କିଏ ସେ ପାଣ୍ଡିଆନ
ରକ୍ତ ଭଣ୍ଡାରରରେ ଡୋନର ଦ୍ୱାରା ରକ୍ତ ସଂଗୃହିତ କରି ରକ୍ତ ବିକ୍ରି କରୁଥିବା ଦଲାଲର ନଁା ପାଣ୍ଡିଆନ ଓରଫ ପାଣ୍ଡିଆ ବୋଲି ଚର୍ଚ୍ଚା ହେଉଛି। ପାଣ୍ଡିଆନ ପାଖରେ ପହଞ୍ଚତ୍ଲେ ରକ୍ତଭଣ୍ଡାରରେ ରକ୍ତ ନ ଥିଲେ ମଧ୍ୟ ରକ୍ତ ସୁବିଧାରେ ମିଳି ଯାଉଛି। କେତେଜଣ ଔଷଧ ଦୋକାନୀ ପାଣ୍ଡିଆନର ଠିକଣା ଦେଇ ରୋଗୀଙ୍କ ସମ୍ପର୍କୀୟଙ୍କୁ ତାଙ୍କ ପାଖକୁ ପଠାଉଛନ୍ତି। ପ୍ରଶ୍ନ ଉଠୁଛି କିଏ ସେ ପାଣ୍ଡିଆନ। କାହା ପ୍ରୋତ୍ସାହନ ବା ଇଙ୍ଗିତରେ ବେଆଇନ ଭାବେ ରକ୍ତ ବିକ୍ରି ହୋଇ ଆସୁଛି। ଏ ନେଇ ରକ୍ତଭଣ୍ଡାର ଅଧିକାରୀ ଅଜୟ କୁମାର ବାହିନିପତିଙ୍କୁ ପଚାରିବାରେ ରକ୍ତ ବିକ୍ରି ଘଟଣାର ଅଭିଯୋଗ ମିଳି ନ ଥିଲା। ତେବେ ଘଟଣାର ତଦନ୍ତ କରାଯାଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି।