ବାଲେଶ୍ୱର, ୮।୭ (ମାନସ ବିଶ୍ୱାଳ): ବାଲେଶ୍ୱର ଫକୀରମୋହନ ମେଡିକାଲ କଲେଜ ଏବଂ ଜିଲା ମୁଖ୍ୟ ଚିକିତ୍ସାଳୟରେ ଥିବା ରକ୍ତଭଣ୍ଡାରରୁ ରକ୍ତ ନେଉଥିବା ଥାଲାସେମିଆରେ ପୀଡ଼ିତ ଜଣେ ୧୩ ବର୍ଷର ବାଳକ ଏବେ ଏଚ୍ସିଭି ପଜିଟିଭ ଏବଂ ଏଚ୍ଆଇଭି ପଜିଟିଭରେ ଆକ୍ରାନ୍ତ। ପିଲାକୁ ଜନ୍ମର ୬ ମାସ ଠାରୁ ରକ୍ତ ଦେଇ ବଞ୍ଚାଇ ଆଣିଥିବା ମା’ବାପା ଏବେ ଚିନ୍ତାରେ। ତାଙ୍କ ଅଭିଭାବକ ଜିଲା ରକ୍ତଭଣ୍ଡାରର ସ୍ବଚ୍ଛତା ଉପରେ ଅଙ୍ଗୁଳି ନିର୍ଦ୍ଦେଶ କରିଛନ୍ତି।
ଉକ୍ତ ବାଳକଙ୍କ ଅଭିଭାବକଙ୍କ କହିବା ଅନୁଯାୟୀ, ଗତ ମାର୍ଚ୍ଚରୁ ସେ ଲଗାତାର ଜିଲା ରକ୍ତଭଣ୍ଡାରରୁ ରକ୍ତ ନେଇଆସୁଥିଲେ। ଜୁନ୍ ୩୦ ତାରିଖରେ ମଧ୍ୟ ସେ ରକ୍ତ ନେଇଥିଲେ। ଉକ୍ତ ରାତିରେ ଜ୍ୱର ଆସିଲା ଏବଂ ଡାକ୍ତରଙ୍କ ପରାମର୍ଶ ଅନୁସାରେ ଔଷଧ ଖାଇଲେ ମଧ୍ୟ ଜ୍ୱର ଛାଡ଼ି ନ ଥିଲା। ଯାହା ଫଳରେ ତାଙ୍କ ବାପା ଗତ ୩ ତାରିଖ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲକୁ ନେଇଥିଲେ। ସେଠାରେ ରକ୍ତ ପରୀକ୍ଷା ପରେ ତାଙ୍କ ପୁଅକୁ ଏଚ୍ସିଭି ଆଉ ଏଚ୍ଆଇଭି ପଜିଟିଭ ରୋଗ ସଂକ୍ରମଣ ହୋଇଛି ବୋଲି ଜାଣିବାକୁ ପାଇଥିଲେ। ଏଥିପାଇଁ ତାଙ୍କ ପରିବାର ଲୋକେ ଜିଲା ରକ୍ତଭଣ୍ଡାରକୁ ଦାୟୀ କରିଛନ୍ତି। ବାଲେଶ୍ୱରରେ ସରକାରୀ ମେଡିକାଲ କଲେଜ ହୋଇ ମଧ୍ୟ ଅନେକ ଥାଲାସେମିଆ ଆକ୍ରାନ୍ତ ପିଲା ଓ ରୋଗୀ ପ୍ରତ୍ୟେକ ଥର ଏଭଳି ସଂକ୍ରମିତ ହେଉଛନ୍ତି। ତେଣୁ ଏ ଦିଗରେ ପ୍ରଶାସନ ଓ ହସ୍ପିଟାଲ କର୍ତ୍ତୃପକ୍ଷ ଉଚିତ୍ ପଦକ୍ଷେପ ନେବାକୁ ପରିବାର ପକ୍ଷରୁ ଦାବି କରାଯାଇଛି।
ରକ୍ତଭଣ୍ଡାର ଦାୟିତ୍ୱରେ ଥିବା ଡା. ବସନ୍ତ ଉପାଧ୍ୟାୟ କହନ୍ତି, ଜିଲାରେ ୫ଶହରୁ ଅଧିକ ଥାଲାସେମିଆ ରୋଗୀ ୮ଶହ ୟୁନିଟ୍ରୁ ଅଧିକ ରକ୍ତ ନେଉଛନ୍ତି। ରକ୍ତ ସଂଗ୍ରହ ପରେ ପ୍ରଥମେ ଏଲିଡ଼ା ଟେଷ୍ଟ, ପରେ ନାଗ୍ଟିସିଆରରେ ଟେଷ୍ଟ କରାଯାଇ ଥାଲାସେମିଆ ରୋଗୀଙ୍କୁ ରକ୍ତ ଦିଆଯାଉଛି। ଗତ ୨ ବର୍ଷ ହେବ ଏହି ପ୍ରକ୍ରିୟା ଜାରି ରହିଛି। ଫଳରେ କୌଣସି ରୋଗୀ ଅସୁବିଧାରେ ସମ୍ମୁଖୀନ ହେଉ ନାହାନ୍ତି। ଉପରୋକ୍ତ ଅଭିଯୋଗ ଆମ ପାଖରେ ପହଞ୍ଚତ୍ନାହଁି। ଉକ୍ତ ବାଳକ କେମିତି ଓ କେଉଁଠୁ ରକ୍ତ ନେଇଛି ତାହା ତଦନ୍ତ କଲେ ଜଣାପଡ଼ିବ ବୋଲି ପ୍ରକାଶ କରିଛନ୍ତି।