ରସୁଲପୁର,୩୧ା୭(ରଞ୍ଜିତ ରାଉତ):ରସୁଲପୁର ବ୍ଲକ ଅଧୀନରେ ୧୭୩ ରାଜସ୍ବ ଗ୍ରାମ ରହିଛି। ମାତ୍ର ଏସବୁ ଗ୍ରାମରେ ଆଉ ପଲ୍ଲିସଭା ବସୁନାହିଁ। ୨୦୧୫ ପରଠାରୁ ଏଭଳି ସ୍ଥିତି କେବଳ ରସୁଲପୁର ବ୍ଲକ ନୁହେଁ ରାଜ୍ୟର ବିଭିନ୍ନ ବ୍ଲକରେ ଦେଖିବାକୁ ମିଳିଛି। ଉନ୍ନୟନ କାର୍ଯ୍ୟ ପାଇଁ ଯୋଜନା ପ୍ରସ୍ତୁତ ହେଉ ଅବା ଉନ୍ନୟନ କାର୍ଯ୍ୟକୁ ତୃଣମୂଳସ୍ତରରେ କାର୍ଯ୍ୟକାରୀ କରିବା ପାଇଁ ପଲ୍ଲିସଭା ହେଉନାହିଁ। ପଲ୍ଲିର ଲୋକେ ସେମାନଙ୍କ ଗଣତାନ୍ତ୍ରିକ ଅଧିକାର ସାବ୍ୟସ୍ତ କରିବାର ସୁଯୋଗ ପାଇପାରୁନାହାନ୍ତି। ପଞ୍ଚାୟତ ଓ ବ୍ଲକ କାର୍ଯ୍ୟାଳୟର ୪ କାନ୍ଥ ମଧ୍ୟରେ ଗାଁର ଉନ୍ନତି ସମ୍ପର୍କରେ ନିଷ୍ପତ୍ତି ନିଆଯାଉଛି। ସରକାରୀ ଅଧିକାରୀମାନଙ୍କ ନିର୍ଦ୍ଦେଶରେ ଉନ୍ନୟନ କାର୍ଯ୍ୟ ହେଉଛି। ଏ ଦିଗରେ ରାଜ୍ୟ ସରକାରଙ୍କ ପକ୍ଷରୁ ଜାରି ନିର୍ଦ୍ଦେଶନାମାକୁ କାର୍ଯ୍ୟକାରୀ କରାଯାଇ ଏଭଳି କରାଯାଉଛି। ଉକ୍ତ ନିର୍ଦ୍ଦେଶାନାମା ମୁତାବକ ପଲ୍ଲିସଭା ବଦଳରେ ସରକାରୀ ବାବୁମାନଙ୍କୁ ଉନ୍ନୟନ କାର୍ଯ୍ୟ କରିବାର କ୍ଷମତା ପ୍ରଦାନ କରାଯାଇଛି। ଆଇନର ଫାଙ୍କ ଭିତରେ ଗାଁ ଲୋକଙ୍କ ସ୍ବର ବନ୍ଧା ପଡ଼ିଛି ବୋଲି କୁହାଯାଉଛି। ଫଳରେ ଏହାକୁ ନେଇ ଜନ ଅସନ୍ତୋଷ ପ୍ରକାଶ ପାଇଛି।
୧୯୬୨ରେ ପଞ୍ଚାୟତିରାଜ ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବା ପାଇଁ ଆଇନ ପ୍ରଣୟନ ହୋଇଥିଲା। ସଶକ୍ତ ଗାଁ ଗଠନରେ ଜନସାଧାରଣଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଜାଣି ଆଇନରେ ବ୍ୟବସ୍ଥା କରାଯାଇଥିଲା। ସେଥିମଧ୍ୟରୁ ପଲ୍ଲିସଭା ଓ ଗ୍ରାମ ସଭା ଅନ୍ୟତମ ବ୍ୟବସ୍ଥା ବୋଲି ମନେ କରାଯାଇଥିଲା। ଏହି ପ୍ରକ୍ରିୟା ବଳରେ ଗାଁ ଲୋକେ ସଭା ଜରିଆରେ ସେମାନଙ୍କ ଗ୍ରାମର ଉନୟନ୍ନମୂଳକ କାର୍ଯ୍ୟର ପ୍ରସ୍ତାବମାନ ଆଗତ କରିବାର ସୁଯୋଗ ପାଇପାରିବେ। ବିଭିନ୍ନ ଯୋଜନାରେ ଆସୁଥିବା ଅନୁଦାନର ବ୍ୟୟବରାଦ କରାଯାଇ ସ୍ଥିରୀକୃତ ପ୍ରକଳ୍ପଗୁଡ଼ିକର ବାସ୍ତବତାରେ ରୂପାନ୍ତରଣ କରାଯିବ। ଅନୁମୋଦିତ ପ୍ରକଳ୍ପଗୁଡ଼ିକୁ କାର୍ଯ୍ୟକାରୀ ପାଇଁ ପଲ୍ଲିସଭା ଜରିଆରେ ଗ୍ରାମ୍ୟ ଶ୍ରମିକ ମୁଖିଆ ଚୟନ କରାଯାଇ ତାଙ୍କ ନାମରେ କାର୍ଯ୍ୟାଦେଶ ପ୍ରଦାନ କରାଯିବ। ହେଲେ ଏବେ ଗାଁରେ ପଲ୍ଲିସଭା ବସୁନାହିଁ। ରାଜ୍ୟ ସରକାରଙ୍କ ପକ୍ଷରୁ ଉନ୍ନୟନ କାର୍ଯ୍ୟ ତଦାରଖ ଦାୟିତ୍ୱ ବ୍ଲକ୍ ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀ ଓ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ଉପରେ ନ୍ୟସ୍ତ କରାଯାଉଛି। ପଞ୍ଚାୟତର ସମସ୍ତ ଉନ୍ନୟନ କାର୍ଯ୍ୟର କାର୍ଯ୍ୟାଦେଶ ଡିପାର୍ଟମେଣ୍ଟାଲ ଅର୍ଥାତ ବିଭାଗୀୟ ଅଧିକାରୀଙ୍କ ନାମରେ ରହୁଛି। ଆଉ ଗାଁ ଲୋକଙ୍କୁ ପଲ୍ଲିସଭା ଜରିଆରେ ପ୍ରକଳ୍ପ ହେଉ ଅବା ଗ୍ରାମ୍ୟ ଶ୍ରମିକ ମୁଖିଆ ଚୟନ କରିବାକୁ ସୁଯୋଗ ଦିଆଯାଉ ନାହିଁ। କେବଳ ଧର୍ମକୁ ଆଖିଠାର ପାଇଁ ପଞ୍ଚାୟତରେ ନାମକୁମାତ୍ର ଗ୍ରାମସଭା ଆୟୋଜନ କାର୍ଯ୍ୟକୁ କାଗଜକଲମରେ ରେକର୍ଡ ପ୍ରସ୍ତୁତ କରାଯାଉଛି। ଗାଁ ଉନ୍ନୟନ କାର୍ଯ୍ୟରେ ଜନସାଧାରଣଙ୍କ ସମ୍ପୃକ୍ତି ଅପେକ୍ଷାକୃତ କମି ଯାଉଥିବାରୁ ଲୋକଙ୍କ ଗଣତାନ୍ତ୍ରିକ ଅଧିକାର ପ୍ରଭାବିତ ହେଉଛି ବୋଲି ପଞ୍ଚାୟତର ଜନପ୍ରତିନିଧିମାନେ ମତବ୍ୟକ୍ତ କରିଛନ୍ତି।
ଗାଁରେ ପଲ୍ଲିସଭା ଆୟୋଜନ ହେଲେ ଅନେକ ମତାମତ ଆସିଥାଏ, ଠାଏଠାଏ ମତାନ୍ତର ବି ହୋଇଥାଏ। ଏସବୁ ସତ୍ୱେ ପ୍ରକଳ୍ପ ଚୟନରେ ବିଶେଷ ସୁବିଧା ହୋଇଥାଏ। ପଲ୍ଲିସଭା ବନ୍ଦ ଯୋଗୁ ତାହା ସମ୍ଭବପର ହୋଇପାରୁ ନାହିଁ ବୋଲି କୁହାଯାଉଛି। ଏ ସମ୍ପର୍କରେ ବିଡିଓ ଅବନିକାନ୍ତ ସାହୁଙ୍କୁ ପଚାରିବାରେ ସେ କହିଛନ୍ତି, ସରକାରୀ ନିର୍ଦ୍ଦେଶନାମାକୁ କାର୍ଯ୍ୟକାରୀ କରୁଛନ୍ତି। ସରକାରଙ୍କ ପକ୍ଷରୁ ଯାହାକିଛି ନିର୍ଦ୍ଦେଶ ନାମା ଆସୁଛି ତାକୁ ଠିକ୍ ଢଙ୍ଗରେ କାର୍ଯ୍ୟକାରୀ କରିବା ତାଙ୍କର କାର୍ଯ୍ୟ। ଆଇନରେ ପରିବର୍ତ୍ତନ କରିବାର କ୍ଷମତା ସେମାନଙ୍କର ନାହିଁ। ଏନେଇ ଆଗକୁ କୌଣସି ନିର୍ଦ୍ଦେଶ ଆସିଲେ ସେ ତାହାକୁ କାର୍ଯ୍ୟକାରୀ କରିବା ଦିଗରେ ପଦକ୍ଷେପ ନେବେ ବୋଲି ମତ ରଖିଛନ୍ତି।