ଭୁବନେଶ୍ୱର,୯।୯ (ଅନୁରାଧା ମହାରଣା): ଫାର୍ମାସିଷ୍ଟ ପଦବୀ ଏବଂ ବହୁମୁଖୀ ପୁରୁଷ ସ୍ବାସ୍ଥ୍ୟକର୍ମୀ ପଦବୀ ପୂରଣ ଦାବିରେ ଓଡିଶା ପଞ୍ଜୀକୃତ ଫାର୍ମାସିଷ୍ଟ ମହାସଂଘ ପକ୍ଷରୁ ଶୁକ୍ରବାର ବିକ୍ଷୋଭ କରାଯାଇଛି। ଓଡ଼ିଶାର ସମସ୍ତ ୪୫ହଜାର ପଞ୍ଜୀକୃତ ଫାର୍ମାସିଷ୍ଟ ଏବଂ ୨୧ହଜାର ଫାର୍ମାସି ଛାତ୍ରୀଛାତ୍ରଙ୍କୁ ନେଇ ଗଠିତ ଏହି ସଂଘର ସଦସ୍ୟମାନେ ୟୁନିଟ୍-୧ସ୍ଥିତ ସବ୍ କୋଅର୍ଡିନେଟ୍ ଷ୍ଟାଫ୍ ସିଲେକ୍ସନ କମିଶନ ସମ୍ମୁଖରେ ପରିବା ବିକି ପ୍ରତିବାଦ କରିଛନ୍ତି। ସେମାନଙ୍କ ଅଭିଯୋଗ ଅନୁସାରେ, ଓଡ଼ିଶା ଅଧସ୍ତନ କର୍ମଚାରୀ ଚୟନ ଆୟୋଗ(ଓଏସ୍ଏସ୍ଏସ୍ସି)ର ନିଯୁକ୍ତି କ୍ୟାଲେଣ୍ଡରରେ ୧ହଜାରରୁ ଊର୍ଦ୍ଧ୍ୱ ଫାର୍ମାସିଷ୍ଟ ପଦବୀ ଏବଂ ୧୪ଶହରୁ ଅଧିକ ବହୁମୁଖୀ ପୁରୁଷ ସ୍ବାସ୍ଥ୍ୟ କର୍ମୀ ପଦବୀରେ ନିଯୁକ୍ତି ନେଇ ଚଳିତବର୍ଷ ମେରେ ବିଜ୍ଞପ୍ତି ପ୍ରକାଶ ପାଇବ ବୋଲି ଉଲ୍ଲେଖ ଥିଲା। ମାତ୍ର ପ୍ରତି ମାସରେ ଓଏସ୍ଏସ୍ଏସ୍ସି ସେହି ବିଜ୍ଞପ୍ତିକୁ ଘୁଞ୍ଚାଇ ଚାଲିଛନ୍ତି ବୋଲି ସଂଘ ସଭାପତି ଦିପ୍ତୀରଞ୍ଜନ ସ୍ବାଇଁ କହିଛନ୍ତି। ହଜାର ହଜାର ଫାର୍ମାସିଷ୍ଟଙ୍କ ଜୀବନ ଜୀବିକା ସହ ଓଏସ୍ଏସ୍ଏସ୍ସି କର୍ତ୍ତୃପକ୍ଷ ଖେଳୁଥିବା କହି ଆନ୍ଦୋଳନକାରୀମାନେ କ୍ଷୋଭ ପ୍ରକାଶ କରିଛନ୍ତି। ଫାର୍ମାସିଷ୍ଟ ପଦବୀ ଏବଂ ବହୁମୁଖୀ ପୁରୁଷ ସ୍ବାସ୍ଥ୍ୟକର୍ମୀଙ୍କୁ ନିଯୁକ୍ତି ଦିଆଯାଉ ନ ଥିବାରୁ ରାଜ୍ୟର ସ୍ବାସ୍ଥ୍ୟ ସେବା ବାଧାପ୍ରାପ୍ତ ହେଉଅଛି। ସେପ୍ଟେମ୍ବରରେ ନିଯୁକ୍ତି ନେଇ ବିଜ୍ଞପ୍ତି ପ୍ରକାଶ ନ ହେଲେ, ଏହାର ବିରୋଧରେ ଓଡିଶା ପଞ୍ଜୀକୃତ ଫାର୍ମାସିଷ୍ଟ ମହାସଂଘ ତରଫରୁ ଓଏସ୍ଏସ୍ଏସ୍ସି କାର୍ଯ୍ୟାଳୟ ସମ୍ମୁଖରେ ଅହୋରାତ୍ର ଶାନ୍ତିପୂର୍ଣ୍ଣ ଆନ୍ଦୋଳନ କରାଯିବ ବୋଲି ସଂଘ ପକ୍ଷରୁ ସୂଚନା ଦିଆଯାଇଛି।