ଚୌଦ୍ୱାର/କଟକ ସଦର, ୧୩ା୧୨(ଡି.ଏନ୍.ଏ.): କେନ୍ଦ୍ରର ୩ ବିବାଦୀୟ କୃଷି ଆଇନ ପ୍ରତ୍ୟାହାର ଦାବିରେ ଚାଲିଥିବା ଚାଷୀ ଆନ୍ଦୋଳନକୁ ସମର୍ଥନ ଜଣାଇ ନିଖିଳ ଭାରତ କୃଷକ ସଂଘର୍ଷ ସମନ୍ବୟ ସମିତି, କୃଷକ ମୋର୍ଚ୍ଚା କଟକ ଜିଲା କମିଟି ଓ ଅନ୍ୟ ସଙ୍ଗଠନ ପକ୍ଷରୁ ଶନିବାର ୧୬ ନଂ. ଜାତୀୟ ରାଜପଥର ମଙ୍ଗୁଳି ଟୋଲ୍ଗେଟ୍ ନିକଟରେ ପୂର୍ବାହ୍ନ ୧୨ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏଥିସହ ବିକ୍ଷୋଭକାରୀମାନେ ବିନା ଶୁଳ୍କରେ ଗାଡିଗୁଡିକୁ ଟୋଲ୍ଗେଟ୍ ପାର୍ କରାଇଥିଲେ। ଜିଲା କୃଷକ ସଭା ସଭାପତି ମଧୁସୂଦନ ପତି, ସିପିଆଇ(ଏମ୍)ର ଜିଲା ସମ୍ପାଦକ ବଦ୍ରି ନାରାୟଣ ଦାସଙ୍କ ପରିଚାଳନାରେ ବିଷ୍ଣୁ ବେହେରା, ପ୍ରତାପ ମହାପାତ୍ର, କୃଷକ ନେତା ପିତାମ୍ବର ଲେଙ୍କା, ଯୁବ ଫେଡେରେଶନ୍ ନେତା ରିତିକ୍ ମହାପାତ୍ର, ଗଣତାନ୍ତ୍ରିକ ମହିଳା ସମିତି ଜିଲା ସମ୍ପାଦିକା ବୁଲି ସାହୁ, ଜୟନ୍ତୀ ଗାଗରାଇଙ୍କ ସମେତ ଦଳୀୟ କର୍ମୀ ଓ କୃଷକମାନେ ବିକ୍ଷୋଭରେ ସାମିଲ ହୋଇଥିଲେ।
ନବନିର୍ମାଣ କୃଷକ ସଙ୍ଗଠନ ପକ୍ଷରୁ ଶନିବାର କନ୍ଦରପୁର ଟୋଲ୍ଗେଟ୍ ନିକଟରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ନୂତନ କୃଷି ଆଇନ ପ୍ରତ୍ୟାହାର ଦାବିରେ ଦିନକ ପାଇଁ କୌଣସି ଯାନରୁ ଶୁଳ୍କ ଆଦାୟ ନ କରିବାକୁ ସଙ୍ଗଠନର କର୍ମକର୍ତ୍ତାମାନେ ଜିଦ୍ ଧରିଥିଲେ। ଫଳରେ ଶୁଳ୍କ ଆଦାୟ ନ କରିବା ଦାବିକୁ ଟୋଲ୍ଗେଟ୍ କର୍ତ୍ତୃପକ୍ଷ ମାନି ନେଇଥିଲେ। କଟକ ସଦର ବ୍ଲକ ସଂଯୋଜକ ରାମଚନ୍ଦ୍ର ରାଉତ, ଦେବୀ ପ୍ରସାଦ ମହାରଣା, ଶରତ ଚନ୍ଦ୍ର ମହାପାତ୍ର ଓ ଅଶୋକ ସାହୁ ପ୍ରମୁଖ ବିକ୍ଷୋଭର ନେତୃତ୍ୱ ନେଇଥିଲେ।