ଢେଙ୍କାନାଳ ଅଫିସ, ୮।୨ ନିର୍ବାଚନ ମଣ୍ଡଳୀରେ ବିଜେଡିର ପତିଆରା ଥିଲେ ମଧ୍ୟ ୨୦୧୭ରେ ହାତରୁ ଖସିଯାଇଥିଲା ଢେଙ୍କାନାଳ ଜିଲା ଗଁଦିଆ ବ୍ଲକର ୧ନଂ. ଜିଲା ପରିଷଦ ଜୋନ୍। ଭାଜପା ପ୍ରାର୍ଥୀ ମମତା ସ୍ବାଇଁ ବିଜେଡିର ବନ୍ଦିତା ପଣ୍ଡାଙ୍କୁ ୩ ହଜାରରୁ ଅଧିକ ଭୋଟରେ ପରାସ୍ତ କରି ଦଖଲ କରିଥିଲେ ଏହି ଆସନ। ଏଭଳି ଝଟ୍କା ଶାସକ ଦଳ ପାଇଁ ଥିଲା ଅପ୍ରତ୍ୟାଶିତ। ଏଭଳି ପରାଜୟ ପଛର ପ୍ରମୁଖ କାରଣ ଭାବେ ଦଳୀୟ ଗୋଷ୍ଠୀ କନ୍ଦଳକୁ ଦାୟୀ କରିଥିଲେ ଦଳୀୟ ନେତା। ଚଳିତ ନିର୍ବାଚନରେ ପୁଣି ମମତାଙ୍କ ଉପରେ ଭାଜପା ଭରସା କରିଛି। ଜିଲା ଭାଜପା ମହିଳା ମୋର୍ଚ୍ଚା ସଭାନେତ୍ରୀ ପଦବୀରେ ଥିବାରୁ ତାଙ୍କର ଆଞ୍ଚଳିକ ରାଜନୀତିରେ ଦଖଲ ମଧ୍ୟ ରହିଛି। ସେହିପରି ନୂଆ ପ୍ରାର୍ଥୀ ଭାବେ ବିଶ୍ୱନାଥ ଚିନ୍ନାରାଙ୍କୁ ବିଜେଡି ମଇଦାନକୁ ଓହ୍ଲାଇଛି। କଂଗ୍ରେସ ପ୍ରାର୍ଥୀ କରିଥିବା ଛାୟାକାନ୍ତ ପାଣିଗ୍ରାହୀ ମଧ୍ୟ ନୂଆ ମୁହଁ। ସେହିପରି ପ୍ରଥମ ଥର ପାଇଁ ଏହି ଆସନରେ ଆମ୍ ଆଦ୍ମୀ ପାର୍ଟି (ଏଏପି) ଲଢୁଛି। ଦଳ ବିଜୟ ପାତ୍ରଙ୍କୁ ପ୍ରାର୍ଥୀ କରିଛି। ତେଣୁ ଚଳିତ ପଞ୍ଚାୟତ ନିର୍ବାଚନରେ ନୂଆ-ପୁରୁଣା ପ୍ରାର୍ଥୀଙ୍କ ମଧ୍ୟରେ ତୁମୁଳ ପ୍ରତିଦ୍ୱନ୍ଦ୍ୱିତା ହେବ ବୋଲି ରାଜନୈତିକ ମହଲରେ ଆଲୋଚନା ହେଉଛି।
ଚଳିତ ପଞ୍ଚାୟତ ନିର୍ବାଚନରେ ଅଣସଂରକ୍ଷିତ ଥିବା ଗଁଦିଆ ବ୍ଲକ ୧ନଂ. ଜୋନ୍ର ମୋଟ ଭୋଟର ସଂଖ୍ୟା ୨୫,୧୦୭। ତନ୍ମଧ୍ୟରୁ ଏହି ଜୋନ୍ ଅଧୀନରେ ଆସୁଥିବା ବାଇଁସିଆ ପଞ୍ଚାୟତର ଭୋଟର ସଂଖ୍ୟା ୬ ହଜାର ୭୩୮, ଯୋରନ୍ଦା ପଞ୍ଚାୟତର ୬ ହଜାର ୨୨୭, କାଲୁରିଆ ପଞ୍ଚାୟତର ୫ ହଜାର ୭୫୫, କରମୂଳ ପଞ୍ଚାୟତର ୬ ହଜାର ୩୮୭ ଭୋଟର ରହିଛନ୍ତି। ଗତ ନିର୍ବାଚନରେ ବ୍ଲକର ୪ ଜୋନ୍ ମଧ୍ୟରେ ୧ନଂ.କୁ ବାଦ୍ଦେଲେ ଅନ୍ୟ ସମସ୍ତ ଜୋନ୍ରେ ବିଜେଡି ପ୍ରାର୍ଥୀ ବିଜୟୀ ହୋଇଥିଲେ। ତେଣୁ ଚଳିତ ନିର୍ବାଚନରେ ଏହି ଆସନ ଶାସକ ଦଳ ପାଇଁ ସମ୍ମାନର ପ୍ରଶ୍ନ ହୋଇଛି। ସେହିପରି ଭାଜପା ମଧ୍ୟ ପୂର୍ବ ସଫଳତାର ପୁନରାବୃତ୍ତି କରିବ ବୋଲି ଦୃଢ଼ୋକ୍ତି ପ୍ରକାଶ କରିଛି।
ପ୍ରଥମ ପର୍ଯ୍ୟାୟରେ ୧୬ ତାରିଖରେ ଏହି ଜୋନ୍ରେ ମତଦାନ ହେବାକୁ ଥିବାବେଳେ ସବୁଦଳର ପ୍ରାର୍ଥୀ ପ୍ରଚାର ଜୋର୍ଦାର କରିଛନ୍ତି। ବିଧାୟକ ସୁଧୀର କୁମାର ସାମଲ ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାରର ମଙ୍ଗ ଧରିଛନ୍ତି। ନିଜର ସାଙ୍ଗଠନିକ ଦକ୍ଷତାକୁ ନେଇ ସେ ଘର ଘର ବୁଲି ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗୁଛନ୍ତି। ସେହିପରି ଜିଲା ଭାଜପା ସଭାପତି ନରେଶ ଚନ୍ଦ୍ର ମହାପାତ୍ର ମଧ୍ୟ ମଇଦାନକୁ ଓହ୍ଲାଇଛନ୍ତି। ସେ ରବିବାର ମମତାଙ୍କ ପାଇଁ ଭୋଟ ମାଗିଛନ୍ତି। କଂଗ୍ରେସ ଏବଂ ଏଏପି ପ୍ରାର୍ଥୀ ମଧ୍ୟ ନିଜ ନିଜର ଦଳୀୟ ନେତୃବୃନ୍ଦଙ୍କୁ ନେଇ ଭୋଟ ଭିକ୍ଷା କରୁଛନ୍ତି।