ବାଲିଆପାଳ,୧୨।୮(ସ୍ବ.ପ୍ର.): ଲଘୁଚାପ ଜନିତ ଲଗାଣ ବର୍ଷାରେ ବାଲିଆପାଳ ବ୍ଲକ ବୋଳଙ୍ଗ ପଞ୍ଚାୟତ ଦ୍ୱାରିକା ହାଟକୁ ଯିବା ମୁଖ୍ୟ ରାସ୍ତାର କେନାଲ ପୋଲ ପାଖ ରାସ୍ତା ଧୋଇଯାଇଛି। ଫଳରେ ଯାତାୟାତ ଠପ୍ ହୋଇଯାଇଛି।
ଉକ୍ତ ରାସ୍ତା ଦେଇ ବିଭିନ୍ନ ଗ୍ରାମରୁ ଲୋକମାନେ ଦ୍ୱାରିକା ହାଟକୁ ବେପାର ବାଣିଜ୍ୟ କରିବା ସହିତ ନିଜର ଜୀବିକା ନିର୍ବାହ ପାଇଁ ଯା’ଆସ କରନ୍ତି। ପ୍ରବଳ ବର୍ଷା ଯୋଗୁ ଏହି ରାସ୍ତାର କେନାଲ ପୋଲକୁ ସଂଯୋଗ କରୁଥିବା ସ୍ଥାନ ସମ୍ପୂର୍ଣ୍ଣ ଧସି ନଷ୍ଟ ହୋଇଯାଇଛି। ଫଳରେ ବୋଲଙ୍ଗ ପଞ୍ଚାୟତରୁ ଦ୍ୱାରିକା, ମହାନ୍ତି ଛକ, କଷାଫଳ, ଲଙ୍ଗଳେଶ୍ୱର, ବୋଲଙ୍ଗ ଚକକୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ପିଇବା ପାଣି ମଧ୍ୟ ଆଣିବାକୁ ଏଠାରେ ଲୋକମାନେ ନଳକୂପକୁ ଯାଇପାରୁନାହାନ୍ତି। ଗାଡ଼ି, ମୋଟରସାଇକେଲ, ସାଇକେଲରେ ଲୋକମାନେ ଯାଇ ପାରୁନାହାନ୍ତି। ବୋଲଙ୍ଗ ପଞ୍ଚାୟତ ସରପଞ୍ଚ ଜ୍ୟୋସ୍ନାରାଣୀ ମଲ୍ଲିକ, ସରପଞ୍ଚଙ୍କ ପ୍ରତିନିଧି କାର୍ତ୍ତିକ ମଲ୍ଲିକ, ସମିତିସଭ୍ୟା ତପନ ରାଉତ, ବୋଳଙ୍ଗା ପଞ୍ଚାୟତର ବିଜେଡ଼ି ପଞ୍ଚାୟତ ସଭାପତି ଯୋଗେନ୍ଦ୍ର ମହାପାତ୍ର, ପୁଳିନ ବେହେରା, ବାଦଲ ବେହେରା, ବିଦ୍ୟାଧର ସାମଲ, ଗଣେଶ ଦାସ, ଶମ୍ଭୁନାଥ ପାତ୍ର, ଗୌତମ ପାତ୍ର, ତପନ ମହାନ୍ତି, ଭାସ୍କର ବେହେରା, ସୁକୁମାର ସାହୁ, ଚନ୍ଦନ ପାତ୍ର, ବାଗାମ୍ବର ସାହୁ, ବାବୁଧର ସାହୁଙ୍କ ସହିତ ସମସ୍ତ ପଞ୍ଚାୟତବାସୀ ରାଜ୍ୟ ସରକାର ଏବଂ ଜିଲା ପ୍ରଶାସନ ଉକ୍ତ ରାସ୍ତା ପ୍ରତି ଦୃଷ୍ଟି ଦେଇ ତୁରନ୍ତ ପଥରପ୍ୟାଚିଂ କରି ମରାମତି କରିବା ପାଇଁ ଦାବି କରିଛନ୍ତି।
