ବାଲିଆ,୨୧।୮(ସ୍ବ.ପ୍ର.): ଜଗତ୍ସିଂହପୁର ଜିଲା କଣ୍ଟିଲୋ ନିକଟ ଦେବୀ ନଦୀରୁ ଶନିବାର ବିରଳ ପ୍ରଜାତିର ସାମୁଦ୍ରିକ ମାଛ ମିଳିଛି। ଏହି ଗ୍ରାମର କିଛି ମତ୍ସଜୀବୀ ଦେବୀ ନଦୀରେ ଜାଲ ପକାଉଥିବା ବେଳେ ଏହି ବିରଳ ପ୍ରଜାତିର ସାମୁଦ୍ରିକ ମାଛ ଜାଲରେ ପଡିଥିଲା। ମାଛଟି ସାଧାରଣ ମାଛ ଅପେକ୍ଷା ଦେଖିବାକୁ ସମ୍ପୂର୍ଣ୍ଣ ଅଲଗା। ଏହାର ୨ଟି ବଡ ବଡ ପର ଭଳି ଡେଣା ରହିଥିବା ବେଳେ ଓଜନ ପ୍ରାୟ ୫ କିଲୋ ହେବ। ଏହା ଏକ ଔଷଧୀୟ ମାଛ ବୋଲି ସ୍ଥାନୀୟ ଲୋକେ କହିଛନ୍ତି। ଏହାର ମୂଲ୍ୟ ୨୦ରୁ ୩୦ ହଜାର ଟଙ୍କା ହେବ ବୋଲି ଜଣାପଡିଛି। ମାଛଟି ଜାଲରେ ପଡିବା ପ୍ରଚାର ହେବା ପରେ ତାକୁ ଦେଖିବାକୁ ନଦୀ କୂଳରେ ପ୍ରବଳ ଜନଗହଳି ହୋଇଥିଲା। ନଦୀରେ ବନ୍ୟା ଆସିଥିବାରୁ ଏହି ବିରଳ ପ୍ରଜାତିର ମାଛ ସମୁଦ୍ରରୁ ଉଠି ଆସିଥିବା କୁହାଯାଇଛି।