ଲକ୍ଷ୍ନୌ, ୨୦।୪: ଇଣ୍ଡିଆନ ପ୍ରିମିୟର ଲିଗ୍ର ଶୁକ୍ରବାର ଅନୁଷ୍ଠିତ ଲକ୍ଷ୍ନୌ ସୁପର ଜାଏଣ୍ଟ୍ସ ବିପକ୍ଷ ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ସମ୍ମାନଜନକ ସ୍କୋର କରିଛି। ରବୀନ୍ଦ୍ର ଜାଡେଜାଙ୍କ ଅର୍ଦ୍ଧଶତକ ଏବଂ ମହେନ୍ଦ୍ର ସିଂ ଧୋନୀଙ୍କ ବିସ୍ଫୋରକ ୨୮ ରନ ସହାୟତାରେ ଏହି ଦଳ ୨୦ ଓଭରରେ ୬ ଉଇକେଟ ହରାଇ ୧୭୬ ରନ ସଂଗ୍ରହ କରିଛି। ରିପୋର୍ଟ ପ୍ରସ୍ତୁତ ହେବା ବେଳକୁ ଲକ୍ଷ୍ନୌ ୧୪ ଓଭରରେ କୌଣସି ଉଇକେଟ ନ ହରାଇ ୧୨୧ ରନ କରିଛି।
ଟସ୍ ହାରି ବ୍ୟାଟିଂ ଆମନ୍ତ୍ରଣ ପାଇଥିବା ଚେନ୍ନାଇ ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଓପନର ରାଚିନ ରବୀନ୍ଦ୍ର ଖାତା ଖୋଲିବା ପୂର୍ବରୁ ଦ୍ୱିତୀୟ ଓଭରର ପ୍ରଥମ ବଲ୍ରେ ମହସିନ ଖାଁଙ୍କ ଶିକାର ହୋଇଥିଲେ। କଥା ସେତିକିରେ ସରି ନ ଥିଲା। ନିୟମିତ ବ୍ୟବଧାନରେ ଉଇକେଟ ପତନ ଯୋଗୁ କୌଣସି ଉଇକେଟରେ ବଡ଼ ଭାଗୀଦାରି ହୋଇପାରି ନ ଥିଲା। ଅଧିନାୟକ ଋତୁରାଜ ଗାଏକ୍ୱାର୍ଡ ମାତ୍ର ୧୭ ରନର ଯୋଗଦାନ ଦେଇଥିବାବେଳେ ଅଜିଙ୍କ୍ୟ ରାହାନେ ଭଲ ଆରମ୍ଭ କରିଥିଲେ ହେଁ ୨୪ ବଲ୍ରୁ ୩୬ ରନକରି ପ୍ୟାଭିଲିୟନ ଫେରିଥିଲେ। ମିଡିଲ ଅର୍ଡରରେ ଶିବମ ଦୁବେ ମାତ୍ର ୩ ରନରେ ଆଉଟ ହେବାରୁ ଚେନ୍ନାଇ ଦଳ ରାହାନେଙ୍କ ସ୍ଥାନରେ ସମିର ରିଜ୍ଭିଙ୍କୁ ଇମ୍ପାକ୍ଟ ଖେଳାଳିଭାବେ ପଡ଼ିଆକୁ ଓହ୍ଲାଇଥିଲା। ମାତ୍ର ସେ ମଧ୍ୟ ନିରାଶ କରି ମାତ୍ର ୧ ରନ କରିବାକୁ ସକ୍ଷମ ହୋଇଥିଲେ। ୯୦ ରନରେ ଦଳର ୫ମ ଉଇକେଟ ପଡ଼ିଥିଲା। ରବୀନ୍ଦ୍ର ଜାଡେଜା ଓ ମୋଇନ ଅଲୀ ୬ଷ୍ଠ ଉଇକେଟରେ ୩୩ ବଲ୍ରୁ ୫୧ ରନ ଯୋଗ କରିବାରୁ ଦଳର ସମ୍ମାନ ରହିଥିଲା। ରବି ବିଷ୍ଣୋଇଙ୍କୁ କ୍ରମାଗତ ୩ ଛକା ମାରିବାପରେ ମୋଇନ୍ ୨୦ ବଲ୍ରୁ ୩୦ ରନକରି ଆଉଟ ହେବାରୁ ଯୋଡ଼ି ଭାଙ୍ଗିଥିଲା। ଏହାପରେ ଆସିଥିଲା ଧୋନୀ ସ୍ପେଶାଲ। ମାତ୍ର ୯ଟି ବଲ୍ର ସମ୍ମୁଖୀନ ହୋଇଥିବା ଧୋନୀ ୩ ଚୌକା ଓ ୨ ଛକା ସହାୟତାରେ ୨୮ ରନ କରିବାରୁ ଚେନ୍ନାଇ ସ୍କୋର ୧୭୬ରେ ପହଞ୍ଚତ୍ ଯାଇଥିଲା। ଜାଡେଜା ୪୦ ବଲ୍ରୁ ୫୭ (୫ ଚୌକା, ୧ ଛକା) ରନରେ ଅପରାଜିତ ରହିଥିଲେ। ଦୁହେଁ ଅସମାପ୍ତ ୭ମ ଉଇକେଟରେ ୧୩ ବଲ୍ରୁ ୩୫ ରନ ଯୋଡ଼ିଥିଲେ। ଲକ୍ଷ୍ନୌ ପକ୍ଷରୁ କୃନାଲ ପାଣ୍ଡ୍ୟା ୨ଟି ଏବଂ ମହସିନ ଖାଁ, ୟଶ ଠାକୁର, ରବି ବିଷ୍ଣୋଇ ଓ ମାର୍କୁସ ଷ୍ଟୋଇନିସ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଚେନ୍ନାଇ ସୁପର କିଙ୍ଗ୍ସ ୨୦ ଓଭରରେ ୧୭୬/୬ (ରବୀନ୍ଦ୍ର ଜାଡେଜା-୫୭*, ଅଜିଙ୍କ୍ୟ ରାହାନେ-୩୬, ମୋଇନ ଅଲୀ-୩୦, ମହେନ୍ଦ୍ର ସିଂ ଧୋନୀ-୨୮*, କୃନାଲ ପାଣ୍ଡ୍ୟା-୨/୧୬, ମହସିନ ଖାଁ-୧/୩୭, ୟଶ୍ ଠାକୁର-୧/୪୫, ରବି ବିଷ୍ଣୋଇ-୧/୪୪, ମାର୍କୁସ ଷ୍ଟୋଇନିସ-୧/୭)।