ନୂଆଦିଲ୍ଲୀ,୨୦।୧୧: ଦକ୍ଷିଣ ଆଫ୍ରିକା ଗସ୍ତରେ ଲଗାତାର ଦୁଇଟି ଅପରାଜିତ ଶତକ ହାସଲ କରିଥିବା ଯୁବ ବାମହାତୀ ବ୍ୟାଟର ତିଲକ ବର୍ମା ଟି -୨୦ ମାନ୍ୟତା ତାଲିକାରେ ଝଡ ସୃଷ୍ଟି କରିଛନ୍ତି। ତିଳକ ନିଜ କ୍ୟାରିୟରର ସର୍ବୋଚ୍ଚ ଟି -୨୦ ମାନ୍ୟତା ହାସଲ କରିବା ସହିତ ଭାରତୀୟ ବ୍ୟାଟରମାନଙ୍କ ମଧ୍ୟରେ ସର୍ବୋଚ୍ଚ ତୃତୀୟ ସ୍ଥାନରେ ରହିଛନ୍ତି। ଏହି ୪ ମ୍ୟାଚ୍ ବିଶିଷ୍ଟ ସିରିଜରେ ୨ ଶତକ ମାରି ତିଲକ ୨୮୦ ରନ୍ ସଂଗ୍ରହ କରିଥିଲେ।
ଏହି ପ୍ରଦର୍ଶନ ଆଧାରରେ ସେ ୬୯ ଟି ସ୍ଥାନ ଉପରକୁ ଉଠିଛନ୍ତି। ଏହି ସିରିଜରେ ତିଲକ ପ୍ଲେୟାର ଅଫ୍ ଦି ସିରିଜ୍ ଟାଇଟଲ୍ ମଧ୍ୟ ଜିତିଥିଲେ। ର଼୍ୟାଙ୍କିଙ୍ଗରେ ଏବେ ସେ ଅଧିନାୟକ ସୂର୍ୟ୍ୟକୁମାର ଯାଦବଙ୍କୁ ମଧ୍ୟ ପଛରେ ପକାଇ ଦେଇଛନ୍ତି ଯିଏ ବର୍ତ୍ତମାନ ଚତୁର୍ଥ ସ୍ଥାନକୁ ଖସି ଆସିଛନ୍ତି।
ଏହା ବ୍ୟତୀତ ଷ୍ଟାର ଖେଳାଳି ହାର୍ଦ୍ଦିକ ପାଣ୍ଡ୍ୟା ମଧ୍ୟ ଅଲରାଉଣ୍ଡର ମାନ୍ୟତାରେ ବଡ଼ ଲମ୍ଫ ମାରିଛନ୍ତି। ସେ ବର୍ତ୍ତମାନ ଅଲରାଉଣ୍ଡର ମାନ୍ୟତାରେ ପ୍ରଥମ ସ୍ଥାନରେ ପହଞ୍ଚିଛନ୍ତି। ପାଣ୍ଡ୍ୟା କ୍ରମାଗତ ଭାବେ ଏହି ସିରିଜରେ ସଫଳ ହୋଇଥିଲେ ଏବଂ ଦ୍ୱିତୀୟ ଟି -୨୦ ମ୍ୟାଚରେ ଅପରାଜିତ ୩୯ ରନ୍ ସ୍କୋର କରି ସେ ଭାରତୀୟ ଇନିଂସକୁ ସ୍ଥିର କରିଥିଲେ। ଏହା ବ୍ୟତୀତ ସମ୍ପୂର୍ଣ୍ଣ ସିରିଜରେ ଚମତ୍କାର ବୋଲିଂ କରିଥିଲେ।
ଟି -୨୦ ଅଲରାଉଣ୍ଡର ମାନ୍ୟତାରେ ପାଣ୍ଡ୍ୟା ଦ୍ୱିତୀୟଥର ପାଇଁ ଏକ ନମ୍ବର ହୋଇଛନ୍ତି। ଏହାପୂର୍ବରୁ ସେ ଚଳିତ ବର୍ଷ ଆରମ୍ଭରେ ଆଇସିସି ପୁରୁଷ ଟି -୨୦ ବିଶ୍ୱକପ ପରେ ର଼୍ୟାଙ୍କିଙ୍ଗ ହାସଲ କରିଥିଲେ।
ଏହି ଦୁଇଜଣଙ୍କ ବ୍ୟତୀତ ସଞ୍ଜୁ ସାମସନ, ଅନ୍ୟ ଜଣେ ଖେଳାଳି ଯିଏ କ୍ରମାଗତ ଭାବରେ ଭାରତ ପାଇଁ ଭଲ ପ୍ରଦର୍ଶନ କରିଛନ୍ତି, ସମାନ ସିରିଜରେ ଦୁଇ ଶତକ ସ୍କୋର କରିବା ପରେ ଟି -୨୦ ବ୍ୟାଟ୍ସମ୍ୟାନ୍ ତାଲିକାରେ ୧୭ ସ୍ଥାନ ଉପରକୁ ଉଠି ୨୨ ତମ ସ୍ଥାନକୁ ଉନ୍ନୀତ ହୋଇଛନ୍ତି। ବୋଲିଂ ବିଭାଗରେ ଭାରତୀୟ ଦ୍ରୁତ ବୋଲର ଅର୍ଶଦୀପ ସିଂ କ୍ୟାରିୟରର ଶ୍ରେଷ୍ଠ ନବମ ସ୍ଥାନକୁ ଉନ୍ନୀତ ହୋଇଛନ୍ତି।