ଆଙ୍କାରା,୯ା୨: ଫେବୃୟାରୀ ୬ରେ ତୁର୍କୀ ଏବଂ ସିରିଆରେ ଘଟିଥିବା ଭୟଙ୍କର ଭୂକମ୍ପ ପରେ ଦେଶର ଚେହେରା ପୂରା ବଦଳି ଯାଇଛି। ଖବର ଅନୁଯାୟୀ, ଏହି ଭୟଙ୍କର ଭୂକମ୍ପରେ ୧୫୦୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି। ଅନେକ ଲୋକଙ୍କୁ ଉଦ୍ଧାର କରାଯାଇଛି। ଏହି ଭୟଙ୍କର ଭୂକମ୍ପ ପରେ ବର୍ତ୍ତମାନ ସାଟେଲାଇଟ ଚିତ୍ର ସାମ୍ନାକୁ ଆସିଛି, ଯେଉଁଥିରେ ସମଗ୍ର ସହରର ଧ୍ୱଂସାବଶେଷ ଆବର୍ଜନା ଆକାରରେ ଦୃଶ୍ୟମାନ ହେଉଛି। ବହୁ ଉଚ୍ଚ ଅଟ୍ଟାଳିକା ଭୁଶୁଡି ପଡ଼ିଥିବା ଏଥିରେ ଦେଖିବାକୁ ମିଳିଛି।
ସାଟେଲାଇଟ୍ ଚିତ୍ରରେ ଦେଖାଯାଇଥିବା ଖୋଲା ସ୍ଥାନ ଏବଂ ଷ୍ଟାଡିୟମରେ ରିଲିଫ କାର୍ଯ୍ୟ ପାଇଁ ଶହ ଶହ ଜରୁରିକାଳୀନ ଆଶ୍ରୟସ୍ଥଳ ସ୍ଥାପନ କରାଯାଇଛି। କାହରାମନାରାସ ଏବଂ ଗାଜିଆଣ୍ଟେପ ମଧ୍ୟରେ ଥିବା ଅଞ୍ଚଳଗୁଡିକରେ ସର୍ବାଧିକ ଧ୍ୱଂସାବଶେଷ ଦେଖିବାକୁ ମିଳିଛି। ସହରର ସମସ୍ତ ବ୍ଲକ୍ ଅଳିଆ ଗଦାରେ ପରିଣତ ହୋଇଛି।
ତୁର୍କୀ ଆକଳନ କରିଛି ଯେ, ଅନେକ ସରକାରୀ ଡାକ୍ତରଖାନା ସମେତ ୭ଟି ପ୍ରଦେଶରେ ୩୦୦୦ରୁ ଅଧିକ କୋଠା ଭୁଶୁଡି ପଡ଼ିଛି। ସୂଚନା ଅନୁଯାୟୀ, ୧୩ତମ ଶତାବ୍ଦୀର ଏକ ଐତିହାସିକ ମସଜିଦ ମଧ୍ୟ ଏଥିରେ ଆଂଶିକ ଭୁଶୁଡ଼ି ପଡ଼ିଛି। ବର୍ତ୍ତମାନ ସୁଦ୍ଧା ମୃତ୍ୟୁସଂଖ୍ୟା ୧୫,୩୮୩ରେ ପହଞ୍ଚିଛି। ସେଥିମଧ୍ୟରେ ତୁର୍କୀରେ ୧୨,୩୯୧ ଏବଂ ସିରିଆରେ ୨,୯୯୨ ଜଣ ଅଛନ୍ତି। ଏହା ସହିତ ଉଦ୍ଧାର କାର୍ଯ୍ୟ ଜାରି ରହିଛି। ମୃତ୍ୟୁସଂଖ୍ୟା ବଢ଼ିବାର ଅନୁମାନ କରାଯାଉଛି। ପ୍ରଥମ ଦିନ ଭୂକମ୍ପର ତୀବ୍ରତା ରିକ୍ଟର ସ୍କେଲ୍ରେ ୭.୮ ଥିଲା। ଏହା ପ୍ରାୟ ୧ ମିନିଟ୍ ଧରି ହୋଇଥିଲା। ସୋମବାର ଦ୍ୱିତୀୟ ଦିନ ରିକ୍ଟର ସ୍କେଲରେ ଭୂକମ୍ପର ତୀବ୍ରତା ୭.୫ ଥିଲା। ଏହା ପରେ ଅନେକ ଭୂକମ୍ପ ଘଟିଛି।
ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) କହିଛି, ଭୂକମ୍ପ ଯୋଗୁ ୨୩ ନିୟୁତ ଲୋକ ପ୍ରଭାବିତ ହେବେ। ପ୍ରଭାବିତ ଅଞ୍ଚଳରେ ୭୭ଟି ଜାତୀୟ ତଥା ୧୩ଟି ଅନ୍ତର୍ଜାତୀୟ ଜରୁରିକାଳୀନ ଚିକିତ୍ସା ଦଳ ନିୟୋଜିତ ହୋଇଛନ୍ତି।
