ବେଙ୍ଗାଲୁରୁ,୨ା୩: ଓମେନ୍ସ ପ୍ରିମିୟର ଲିଗ୍ରେ ଗୁଜରାଟ ଜାଏଣ୍ଟ୍ସକୁ ୬ ଉଇକେଟରେ ହରାଇ ଦ୍ୱିତୀୟ ବିଜୟ ହାସଲ କରିଛି ୟୁପି ଓ୍ବାରିଅର୍ଜ। ପ୍ରଥମେ ବ୍ୟାଟିଂ କରି ଗୁଜରାଟ ୨୦ ଓଭରରେ ୫ ଉଇକେଟ ହରାଇ ୧୪୨ ରନ୍ କରିଥିଲା। ଜବାବରେ ୧୫.୪ ଓଭରରେ ୪ ଉଇକେଟ ହରାଇ ଆବଶ୍ୟକ ରନ୍ କରି ନେଇଥିଲା ୟୁପି।
ଟସ୍ ହାରି ବ୍ୟାଟିଂ କରିଥିବା ଗୁଜରାଟ ପକ୍ଷରୁ ବେଥ୍ ମୁନି(୧୬) ଓ ଲୌରା ଓଲ୍ଭାଡର୍ଟ(୨୮) ପ୍ରଥମ ଉଇକେଟରେ ୪୦ ରନ୍ ଯୋଡିଥିଲେ। ପରବର୍ତ୍ତୀ ବ୍ୟାଟର ହରଲିନ୍ ଦେଓଲ ୨୪ ବଲ୍ ଖେଳି ୧୮ ରନ୍ କରିବାରୁ ଦଳର ରନହାର ଧୀମେଇ ଯାଇଥିଲା। ତେବେ ଫିବ୍ ଲିଚଫିଲ୍ଡ(୩୫) ଓ ଆସ୍ଲେ ଗାର୍ଡନର (୩୦) ଦ୍ରୁତ ବ୍ୟାଟିଂ କରିବାରୁ ଦଳୀୟ ସ୍କୋର ୧୪୦ ପାର କରିଥିଲା। ଲିଚଫିଲ୍ଡ ୨୬ ବଲ ଖେଳଳି ୪ ଚୌକା ଓ ୧ ଛକା ମାରିଥିଲେ। ଅନ୍ୟ ପକ୍ଷରେ ଗାର୍ଡନର ମାତ୍ର ୧୭ ବଲ୍ ଖେଳି ୪ ଚୌକା ଓ ୧ ଛକା ମାରିଥିଲେ। ୟୁପି ପକ୍ଷରୁ ସୋଫି ଏକେଲଷ୍ଟୋନ ଚମତ୍କାର ବୋଲିଂ କରି ୨୦ ରନ୍ରେ ୩ ଉଇକେଟ ନେଇଥିଲେ। ରାଜେଶ୍ୱରୀ ଗାଏକ୍ୱାଡ ଗୋଟିଏ ସଫଳତା ହାସଲ କରିଥିଲେ।
୧୪୩ ରନ୍ ଲକ୍ଷ୍ୟର ପିଛା କରୁଥିବା ୟୁପି ପକ୍ଷରୁ ଆଲିସା ହିଲି(୩୩) ଓ କିରନ ନଭଗିରେ (୧୨) ପ୍ରଥମ ଉଇକେଟରେ ୪୨ ରନ୍ ଯୋଡିଥିଲେ। ୩ ନମ୍ବରରେ ବ୍ୟାଟିଂ କରିଥିବା ଚମାରି ଅଟ୍ଟାପଟ୍ଟୁ ୧୭ ରନ୍ କରି ଆଉଟ ହୋଇଥିବା ବେଳେ ଗ୍ରେସ୍ ହାରିସ୍ ଅପରାଜିତ ୬୦ ରନ୍ କରି ଚମତ୍କାର ଅର୍ଦ୍ଧଶତକ ହାସଲ କରିଥିଲେ। ୩୩ ବଲ୍ ଖେଳି ସେ ୯ ଚୌକା ଓ ୨ ଛକା ମାରିଥିଲେ। ଦୀପ୍ତି ଶର୍ମା(୧୭*)ଙ୍କ ସହ ମିଶି ଦଳକୁ ବିଜୟୀ କରିଥିଲେ ହାରିସ୍। ଗୁଜରାଟ ପକ୍ଷରୁ ତନୁଜା କଓ୍ବଁର ୨ ଉଇକେଟ ନେଇଥିବା ବେଳେ ମେଘନା ସିଂ ଓ କାଥରିନ୍ ବ୍ରାଇସ୍ ଗୋଟିଏ ଲେଖାଏ ସଫଳତା ହାସଲ କରିଥିଲେ। ହ୍ୟାଟ୍ରିକ ପରାଜୟ ହାସଲ କରିଥିବା ଗୁଜରାଟ ଏହାର ପଏଣ୍ଟ ଖାତା ଖୋଲିପାରି ନାହିଁ।