ନୂଆଦିଲ୍ଲୀ: ଶିଳ୍ପ ଶ୍ରମିକଙ୍କ ଲାଗି ଖାଉଟି ମୂଲ୍ୟ ସୂଚୀ(ସିପିଆଇ-ଆଇଡବ୍ଲ୍ୟୁ)ର ନୂଆ ସିରିଜକୁ କେନ୍ଦ୍ର ଶ୍ରମମନ୍ତ୍ରୀ ସନ୍ତୋଷ ଗଙ୍ଗଓ୍ବାର ଗୁରୁବାର ଶୁଭାରମ୍ଭ କରିଛନ୍ତି। ଏହି ସିରିଜକୁ ବ୍ୟବହାର କରି ନୀତି ନିର୍ଦ୍ଧାରକମାନେ ମହଙ୍ଗା ଭତ୍ତା ନିର୍ଦ୍ଧାରଣ କରିଥାନ୍ତି। ନୂଆ ସିରିଜରେ ୨୦୨୦ ସେପ୍ଟେମ୍ବର ପାଇଁ ଶିଳ୍ପ ଶ୍ରମିକଙ୍କ ଲାଗି ଖାଉଟି ମୂଲ୍ୟ ସୂଚୀ ୧୧୮ ରହିଛି। ପୂର୍ବରୁ ସିପିଆଇର ମୂଳବର୍ଷ ଭାବେ ୨୦୦୧କୁ ବିଚାର କରାଯାଉଥିଲା। ବର୍ତ୍ତମାନ ମୂଳ ବର୍ଷ ୨୦୧୬କୁ ପରିବର୍ତ୍ତନ କରାଯାଇଛି। ପୂର୍ବର ମୂଳ ବର୍ଷକୁ ଧରିଲେ ଅଗଷ୍ଟ ମାସରେ ସିପିଆଇ ୩୩୮ ସ୍ତରରେ ରହିଥିଲା। ନୂଆ ସିରିଜ ଲାଗୁ ହେବା ପରେ ମହଙ୍ଗା ଭତ୍ତା ଉପରେ କୌଣସି ପରିବର୍ତ୍ତନ ହେବ ନାହିଁ ବୋଲି ଜଣାପଡିଛି। ସରକାରୀ କର୍ମଚାରୀଙ୍କ ଏବଂ ଶିଳ୍ପ ଶ୍ରମିକଙ୍କ ମହଙ୍ଗା ଭତ୍ତା ନିର୍ଦ୍ଧାରଣ କରିବାରେ ଏହି ସିରିଜ ଡାଟା ପ୍ରମୁଖ ଭୂମିକା ଗ୍ରହଣ କରିଥାଏ। ମୁଦ୍ରାସ୍ଫୀତିକୁ ବିଚାର କରି ମହଙ୍ଗା ଭତ୍ତା(ଡିଏ)ରେ ପରିବର୍ତ୍ତନ କରାଯାଇଥାଏ। ସେହିଭଳି ନ୍ୟୁନତମ ବେତନ ଧାର୍ଯ୍ୟ ଏବଂ ପରିବର୍ତ୍ତନ କ୍ଷେତ୍ରରେ ଏହି ସିରିଜ ଡାଟାକୁ ବିଚାର କରାଯାଏ। ସେହିଭଳି ଅଗଷ୍ଟ ୨୦୨୧ ସୁଦ୍ଧା କୃଷି ଏବଂ ଗ୍ରାମାଞ୍ଚଳ ଶ୍ରମିକଙ୍କ ଲାଗି ସିପିଆଇ ମୂଳ ବର୍ଷକୁ ପରିବର୍ତ୍ତନ କରିବା ଲାଗି ଶ୍ରମ ମନ୍ତ୍ରଣାଳୟ ଲେବର ବ୍ୟୁରୋକୁ କହିଛି। ନୂଆ ଶ୍ରମ କୋଡକୁ ନଜରରେ ରଖି ବ୍ୟୁରୋ ପକ୍ଷରୁ ଡାଟା ସଂଗ୍ରହ କରାଯିବ ବୋଲି ସୂଚନା ଦେଇଛନ୍ତି।