ଭୁବନେଶ୍ୱର, ୩।୧୨ (ବ୍ୟୁରୋ) : ଜନଗହଳିପୂର୍ଣ୍ଣ ଭୁବନେଶ୍ୱର ଷ୍ଟେଶନ ପରିସରରେ ଶୁକ୍ରବାର ଜଣେ ଦୋକାନୀଙ୍କୁ ସଂଘବଦ୍ଧ ଆକ୍ରମଣ ହୋଇଛି। ଅନ୍ୟ କେତେଜଣ ଦୋକାନୀ ତାଙ୍କୁ ନିସ୍ତୁକ ମାଡ଼ ମାରିବା ସହ ଗୋଡ଼ାଇ ପିଟିଛନ୍ତି। ପ୍ରଥମେ ଷ୍ଟେଶନ ସମ୍ମୁଖ ରାସ୍ତାରେ ଆକ୍ରମଣ ହେବାରୁ ସେ ଷ୍ଟେଶନକୁ ଦୌଡ଼ି ପଳାଇଥିଲେ। ଦୋକାନୀମାନେ ଗୋଡ଼ାଇ ପିଟିବା ସହ ଘୋଷାରି ନେଇ ବିଧା, ଗୋଇଠା ମାରିବାରୁ ସେ ଅଚେତ ହୋଇପଡିଥିଲେ। ଷ୍ଟେଶନ ଭିତରେ ଦୁର୍ବୃତ୍ତଙ୍କ ଆତଙ୍କରାଜ ଯାତ୍ରୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଥିଲା। ଯାତ୍ରୀମାନେ ଭୟରେ ପାଟି ଖୋଲି ନ ଥିଲେ। ଆଉ ଯେଉଁମାନେ ଆକ୍ରମଣର ଶିକାର ଯୁବକଙ୍କୁ ବଞ୍ଚାଇବାକୁ ଆସୁଥିଲେ ଆକ୍ରମଣକାରୀମାନେ ସେମାନଙ୍କୁ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ଛୁରି ଦେଖାଇ ଡରାଇଥିଲେ। ୨୦ ମିନିଟ ଧରି ଏଭଳି ଅମାନୁଷିକ କାଣ୍ଡ ଘଟି ଚାଲିଥିଲେ ମଧ୍ୟ ବିଳମ୍ବରେ ପୋଲିସ ପହଞ୍ଚତ୍ଲା। ଏହାପରେ ଆକ୍ରମଣକାରୀ ଘଟଣାସ୍ଥଳରୁ ଛତ୍ରଭଙ୍ଗ ଦେଇଥିଲେ। ପୋଲିସ ଆହତ ଯୁବକଙ୍କୁ ଉଦ୍ଧାର କରି ଚିକିତ୍ସା ଲାଗି ହସ୍ପିଟାଲ ପଠାଇଥିଲା। ତେବେ ପ୍ରାଥମିକ ଚିକିତ୍ସା ପରେ ତାଙ୍କୁ ଥାନାକୁ ଆଣି ପଚରାଉଚରା କରିବା ସହ ଆକ୍ରମଣକାରୀଙ୍କୁ ଧରିବାକୁ ଉଦ୍ୟମ ଚଳାଇଛି।
ପୋଲିସ ସୂଚନାନୁସାରେ, ଆହତଙ୍କ ନଁା ଟୁନା। ସେ ରେଳ ଷ୍ଟେଶନ ବାହାରେ ଦୋକାନ ଦେଇଥିଲେ। ଆକ୍ରମଣକାରୀମାନେ ମଧ୍ୟ ସେଠାରେ ଛୋଟମୋଟ ଦୋକାନ ଦେଇଛନ୍ତି। ବ୍ୟବସାୟକୁ ନେଇ ଟୁନା ପ୍ରାୟ ସମୟରେ ଅନ୍ୟ ଦୋକାନୀଙ୍କ ସହ ପାଟିତୁଣ୍ଡ ଓ ଗଣ୍ଡଗୋଳ କରିଥାନ୍ତି। ଶୁକ୍ରବାର ଟୁନା ମଦ୍ୟପାନ କରି ଅନ୍ୟ ଦୋକାନୀଙ୍କ ସହ ଝଗଡା କରିବା ସହ ଗାଳିଗୁଲଜ କରିଥିଲେ। ଏଥିରେ ଉତ୍ତେଜିତ ହୋଇ ଅନ୍ୟ ଦୋକାନୀମାନେ ଏକାଠି ହୋଇ ଆକ୍ରମଣ କରିଥିଲେ।