ସୋସିଆଲ ମିଡିଆ ଆଜିକାଲି ଯୁବପିଢ଼ିଙ୍କ ପାଇଁ ବରଦାନ ସାଜିଛି। ଏଥିରୁ ବେଶ୍ ଅର୍ଥ ରୋଜଗାର କରୁଛନ୍ତି ଯୁବପିଢ଼ି। ବିଶେଷକରି ୟୁଟ୍ୟୁବ୍ରୁ ମୋଟା ଅଙ୍କର ଅର୍ଥ ରୋଜଗାର କରୁଛନ୍ତି। ମାତ୍ର ମହାରାଷ୍ଟ୍ରର ଜଣେ ୭୦ ବର୍ଷୀୟା ବୃଦ୍ଧାଙ୍କ ୟୁଟ୍ୟୁବ ଚ୍ୟାନେଲ ଏବେ ଚର୍ଚ୍ଚାରେ ରହିଛି। ବୃଦ୍ଧା ଜଣଙ୍କ ଘରୋଇ ବ୍ୟଞ୍ଜନ ପ୍ରସ୍ତୁତ କରି ୟୁଟ୍ୟୁବ୍ରେ ଅପଲୋଡ୍ କରୁଛନ୍ତି। କେବଳ ଲୋକ ତାଙ୍କ ଚ୍ୟାନେଲ ଦେଖୁଛନ୍ତି ତାହା ନୁହେଁ, ଦିନକୁ ଦିନ ସବ୍ସ୍କ୍ରାଇବର ମଧ୍ୟ ବୃଦ୍ଧି ପାଉଛନ୍ତି। ଏପରିକି ୟୁଟ୍ୟୁବ୍ ପକ୍ଷରୁ ତାଙ୍କୁ ସିଲଭର୍ ବଟନ ମଧ୍ୟ ମିଳିଛି।
ମହାରାଷ୍ଟ୍ରର ଏକ ଗ୍ରାମୀଣ ଅଞ୍ଚଳର ୭୦ ବର୍ଷୀୟା ବୃଦ୍ଧା ସୁମନ ଧାମନେ। ନିଜର ରୋଷେଇ ପାଇଁ ଜାତୀୟ ଗଣମାଧ୍ୟମରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ୟୁଟ୍ୟୁବ୍ରେ କ’ଣ ହୁଏ ସେ ଜାଣି ନାହାନ୍ତି। ମାତ୍ର ଏଥିରେ ରୋଷେଇ ପୋଷ୍ଟ କରିବା ପରେ ଲୋକଙ୍କ ଆଗ୍ରହ ବଢ଼ିଛି। ତେଣୁ ଲୋକଙ୍କ ଚାହିଦାକୁ ଦେଖି ସେ ରୋଷେଇ ପୋଷ୍ଟ କରୁଛନ୍ତି ବୋଲି ସୁମନ କୁହନ୍ତି।
ସୁମନ ପାରମ୍ପରିକ ସ୍ବାଦିଷ୍ଟ ଖାଦ୍ୟ ଘରେ ପ୍ରସ୍ତୁତ କରିଥାନ୍ତି। ଏଥିସହିତ ମରାଠୀ ବ୍ୟଞ୍ଜନ ତିଆରି କରିଥାନ୍ତି। ସୁମନଙ୍କ ନାତି ୟଶ୍ ପାଠକ ଜେଜେ ମା’ଙ୍କ ରୋଷେଇ ଶୈଳୀରେ ବେଶ୍ ପ୍ରଭାବିତ ହୋଇଥିଲେ। ତେଣୁ ପ୍ରଥମେ ୟୁଟ୍ୟୁବରେ ଭିଡିଓ ପୋଷ୍ଟ କରିବା ଆଇଡିଆ ସେ ହିଁ ଦେଇଥିଲେ। ପ୍ରଥମେ ପାଓ ଭାଜିରୁ ଆରମ୍ଭ ହୋଇଥିଲା ଜେଜେ ମା’ଙ୍କ ଷ୍ଟାର ଡମ ଯାତ୍ରା। ପରେ କଲରା ଜୁସ୍, ମହାରାଷ୍ଟ୍ରୀ ମିଠା, ବାଦାମ ଚଟଣୀ, ଶାଗଭଜା ଆଦି ରୋଷେଇ ବେଶ୍ ଲୋକପ୍ରିୟତା ହାସଲ କରିଥିଲା। ତେବେ ଲୋକେ ଆଉ ଜେଜେ ମା’ଙ୍କ ବ୍ୟଞ୍ଜନ ପ୍ରସ୍ତୁତି ଦେଖୁନାହାନ୍ତି ସିଧା ତାଙ୍କ ଘରେ ପହଞ୍ଚି ଖାଦ୍ୟ ନେଉଥିବା କହିଛନ୍ତି ସୁମନ।