ରାଜକନିକା,୩ା୪ (ଡି.ଏନ୍.ଏ.): କାଳ ବୈଶାଖୀ ପ୍ରଭାବରେ ୩ଦିନ ଧରି ଲାଗି ରହିଥିବା ଲଗାଣ ବର୍ଷାରେ ଅମଳ ହେବାକୁ ଥିବା ଶତାଧିକ ଏକର ଡାଳୁଅ ଧାନ ଉଜୁଡ଼ି ଯାଇଥିବା ଚାଷୀ ଅଭିଯୋଗ କରିଛନ୍ତି। ଏମିତି ଅବସ୍ଥା ଦେଖିବାକୁ ମିଳିଛି ରାଜକନିକା ତହସିଲ ଅଧୀନ ହାଟସାହି ଓ ନହୁଣୀ ପଞ୍ଚାୟତରେ। ଚାଷୀମାନେ ହାତଉଧାରୀ, ବ୍ୟାଙ୍କ ଓ ସମିତିରୁ ଋଣ କରି ଡାଳୁଅ ଭଳି ବ୍ୟୟ ବହୁଳ ଧାନ ଚାଷ କରିଥିଲେ। ଧାନ ମୁଠେ ପାଇଥିଲେ ସଂସାରର ଗୁଜୁରାଣ ସାଙ୍ଗକୁ ପିଲାଙ୍କ ପାଠପଢା ଖର୍ଚ୍ଚରେ ଲାଗିଥାନ୍ତା। ଠିକ୍ ଅମଳ ସମୟରେ କାଳ ବୈଶାଖୀ ପ୍ରଭାବରେ ଲଗାଣ ବର୍ଷା ଯୋଗୁଁ ଧାନ ବିଲରେ ଆଣ୍ଠୁଏ ଲେଖାଏ ପାଣି ଜମିବା ସାଙ୍ଗକୁ ଧାନ କେନ୍ଦାରୁ ଧାନ ଝଡ଼ିଯିବା ସହ ଗଛ ଗୁଡ଼ିକ ପାଣିରେ ଲୋଟି ଥିବା ଦେଖିବାକୁ ମିଳିଛି। କିଛି କିଛି ଧାନ ଗଜା ହୋଇଯାଇଥିବା ଦେଖିବାକୁ ମିଳିଛି। ଖବର ସଂଗ୍ରହ ସମୟରେ ନହୁଣୀ ଓ ହାଟସାହି ପଞ୍ଚାୟତର ସରପଞ୍ଚଙ୍କ ସହ ବର୍ଷା ଜଳ ଓ ଡାଳୁଅ ଧାନ କ୍ଷୟକ୍ଷତି ବାବଦରେ ପଚାରିବାରୁ ସେମାନଙ୍କ ସୂଚନା ମୁତାବକ, ନହୁଣୀ ପଂଚାୟତର ପ୍ରାୟ ୬୦ ଏକର ଓ ହାଟସାହିରେ ପ୍ରାୟ ଶହେ ଏକର ଡାଳୁଅ ଧାନ ଚାଷ ହୋଇଥିବା ଜମିରେ ବର୍ଷାଜଳ ଏବେ ବି ଜମି ରହିଛି। ଚାଷୀମାନଙ୍କ କହିବାନୁଯାୟୀ, ଶାରଦ ଚାଷ ଉପରେ ଆମେ ନିର୍ଭରଶୀଳ ହୋଇ ନ ଥାଉ। ଡାଳୁଅ ଚାଷରୁ ହିଁ ପରିବାର ପ୍ରତିପୋଷଣ ହେବା ସହ ପିଲାମାନଙ୍କ ପାଠପଢା ଖର୍ଚ୍ଚ ସହ ତେଲଲୁଣ ସଂସାର ଚାଲେ। ବର୍ଷକର ଦାନା ଛଡ଼େଇ ନେଇଛି କାଳବୈଶାଖୀ ବର୍ଷା। ଆମେ କେମିତି ପିଲାଛୁଆ ସଂସାର ସମ୍ଭାଳିବୁ, କେମିତି କରିଥିବା ଋଣ ଶୁଝିବୁ, ଏ ନେଇ ଚିନ୍ତାରେ ପଡିଛୁ। ତୁରନ୍ତ ତହସିଲଦାର, ରାଜସ୍ବ ନିରୀକ୍ଷକଙ୍କ ଦ୍ୱାରା କ୍ଷୟକ୍ଷତି ଆକଳନ କରି କ୍ଷତିଗ୍ରସ୍ତ ଚାଷୀମାନଙ୍କୁ ସରକାରୀ ସହାୟତା ଯୋଗାଇ ଦେବାକୁ ଚାଷୀ ତ୍ରିଲୋଚନ ବିଶ୍ୱାଳ, ରବୀନ୍ଦ୍ର ସାହୁ, ଶ୍ରୀକାନ୍ତ ବିଶ୍ୱାଳ, ଟୁଅଁା ବିଶ୍ୱାଳ, ଶ୍ରୀବଚ୍ଛ ମଳିକ, ମାନସ ବେହେରା, ସୁଜିତ୍ ବେହୁରିଆ ପ୍ରମୁଖ ଗୁହାରୀ କରିଛନ୍ତି। ଏ ସମ୍ପର୍କରେ ତହସିଲଦାର ଅଶୋକ କୁମାର ଦେହୁରୀଙ୍କୁ ପଚାରିବାରୁ ସେ ତୁରନ୍ତ ଏ ବାବଦରେ ପଦକ୍ଷେପ ନେବେ ବୋଲି କହିଛନ୍ତି।