ବଲିଉଡ୍ରେ ନେଗେଟିଭ୍ ଭୂମିକାରେ ସୁନାମ ଅର୍ଜନ କରିଥିବା ଲଳିତା ପାୱାରଙ୍କୁ କୌଣସି ପରିଚୟର ଆବଶ୍ୟକତା ନାହିଁ । ମାତ୍ର ୯ ବର୍ଷ ବୟସରେ ଇଣ୍ଡଷ୍ଟ୍ରିରେ ପ୍ରବେଶ କରିଥିବା ଲଲିତା ୭୦୦ରୁ ଅଧିକ ବିଭିନ୍ନ ଭାଷା ଚଳଚ୍ଚିତ୍ରରେ କାମ କରି ଏକ ରେକର୍ଡ ସୃଷ୍ଟି କରିଥିଲେ। କିନ୍ତୁ ଲଲିତାଙ୍କ ଜୀବନ ସଂଘର୍ଷରେ ପରିପୂର୍ଣ୍ଣ ଥିଲା। ଏକ ଚାପୁଡ଼ା ତାଙ୍କ ହିରୋଇନ ହେବାର ସ୍ବପ୍ନକୁ ଭାଙ୍ଗି ଦେଇଥିଲା ଏବଂ ତା’ପରେ ପ୍ରକୃତ ଭଉଣୀ ପ୍ରତାରଣା କରି ତାଙ୍କ ସ୍ବାମୀଙ୍କୁ ଛଡ଼ାଇ ନେଇଥିଲେ। ଫଳରେ ସେ ନିଜ ଭଉଣୀର ସଉତୁଣୀ ସାଜିଥିଲେ।
୧୯୪୨ ମସିହାରେ ଜଙ୍ଗ-ଏ-ଆଜାଦି ଚଳଚ୍ଚିତ୍ରର ଶୁଟିଂ ସମୟରେ ଲଳିତାଙ୍କ ସହ-କଳାକାର ଭଗବାନ ଦାଦା ତାଙ୍କୁ ଚାପୁଡ଼ା ମାରିଥିଲେ। କିନ୍ତୁ ଏତେ ଭୟଙ୍କର ଥିଲା ଯେ ତାଙ୍କ କାନ ପରଦା ଫାଟି ଯାଇଥିଲା। ଚିକିତ୍ସା ସମୟରେ ଡାକ୍ତର ଭୁଲ ଔଷଧ ଦେଇଥିଲେ, ଯେଉଁ କାରଣରୁ ଶରୀରର ଅଧା ଅଂଶ ଅଚଳ ହୋଇଯାଇଥିଲା। କିନ୍ତୁ ଲଳିତା ହାର ମାନି ନ ଥିଲେ ଏବଂ ନକାରାତ୍ମକ ଭୂମିକା ଗ୍ରହଣ କରିବା ଆରମ୍ଭ କରିଥିଲେ। ୯୦ ଦଶକରେ ପୌରାଣିକ ଉପରେ ଆଧାରିତ ରାମାୟଣରେ ସେ ମନ୍ଥରା ଚରିତ୍ରରେ ଅଭିନୟ କରି ଘରେ ଘରେ ପରିଚିତ ହାସଲ କରିଥିଲେ। ଲଳିତା ପାୱାର ଗଣପତି ରାଓଙ୍କୁ ବିବାହ କରିଥିଲେ। କିନ୍ତୁ ବିବାହ ପରେ ତାଙ୍କ ନିଜ ଭୁଉଣୀ ତାଙ୍କୁ ଧୋକା ଦେଇ ଗଣପତିଙ୍କୁ ବିବାହ କରିଥିଲେ। ଏହା ପରେ ଲଳିତା ଦ୍ୱିତୀୟ ଥର ଚଳଚ୍ଚିତ୍ର ନିର୍ମାତା ରାଜକୁମାର ଗୁପ୍ତାଙ୍କୁ ବିବାହ କରିଥିଲେ। ଉଭୟଙ୍କର ଏକ ପୁଅ ଅଛି, ଯାହାର ନାମ ଜୟ ପାୱାର।
ଲଳିତାଙ୍କ ଶେଷ ଦିନ ମଧ୍ୟ ଅନେକ ଅସୁବିଧାରେ ଗତି କରିଥିଲା। ତାଙ୍କୁ ପାଟି କର୍କଟ ରୋଗ ହୋଇଥିଲା। ଯେତେବେଳେ ତାଙ୍କର ମୃତ୍ୟୁ ହୋଇଥିଲା ସେତେବେଳେ ସ୍ବାମୀ ହସ୍ପିଟାଲରେ ଭର୍ତ୍ତି ହୋଇଥିଲେ ଏବଂ ପୁଅ ଦିଲ୍ଲୀରେ ଥିଲେ। ପୁଅ ଫୋନ କଲାବେଳେ ଲଳିତା ଫୋନ ନ ଉଠାଇବାରୁ ସେ ଘରକୁ ଆସି କବାଟ ଖୋଲିବା ପରେ ଜଣାପଡିଥିଲା ଯେ ସେ ୩ ଦିନ ପୂର୍ବରୁ ମୃତ୍ୟୁବରଣ କରିଛନ୍ତି।