ଫୁଲବାଣୀ ଅଫିସ୍, ୮ା୧୧: କନ୍ଧମାଳ ଜିଲାର ଏନ୍. ପ୍ରତ୍ୟୁଷ କୁମାର ଚୌଧୁରୀଙ୍କ ଦ୍ୱାରା ଚକ୍ ଖଡ଼ିରେ ଖୋଦିତ ଜଗନ୍ନାଥଙ୍କ କ୍ଷୁଦ୍ରାକୃତି ରଥ ଏସିଆ ବୁକ୍ ଅଫ ରେକର୍ଡସ ଓ ଇଣ୍ଡିଆ ବୁକ୍ ଅଫ ରେକର୍ଡରେ ସ୍ଥାନ ପାଇଛି। ଫୁଲବାଣୀ ସହର ନଦୀଖଣ୍ଡି ସାହିର ପ୍ରତ୍ୟୁଷ କରିଥିବା ଏହି ରଥର ଆକାର ଦୈଘର୍ୟରେ ୨.୫ ସେ.ମି. ଏବଂ ଉଚ୍ଚତା ୧.୯ ସେ.ମି.। ଗତବର୍ଷ କୋଭିଡ୍ ଲାଗି ହୋଇଥିବା କଟକଣା ଯୋଗୁ ସର୍ବତ୍ର ରଥଟଣା ବନ୍ଦ ରହିଥିଲା। ରଥ ଟାଣି ନ ପାରିବାର ନୈରାଶ୍ୟ ତାଙ୍କୁ ରଥର କଳାକୃତି ସୃଷ୍ଟି କରିବାକୁ ପ୍ରେରିତ କରିଥିଲା। କେବଳ ଚକ୍ ଖଡ଼ିରେ କ୍ଷୁଦ୍ରରଥ ପ୍ରସ୍ତୁତ କରିଥିଲେ ଯୁବ ଭାସ୍କର୍ଯ୍ୟ ପ୍ରତ୍ୟୁଷ। ପରେ ସେ ଏହାକୁ ଆନ୍ତର୍ଜାତିକ ସ୍ବୀକୃତି ପାଇଁ ଆବେଦନ କରିଥିଲେ। ପିଲାବେଳୁ ଚିତ୍ରକଳାରେ ରୁଚି ରଖିଥିବା ପ୍ରତ୍ୟୁଷ ଫୁଲବାଣୀ ପବ୍ଲିକ ସ୍କୁଲରୁ ୧୦ମ ପାସ କରିବା ପରେ କେନ୍ଦ୍ରୀୟ ବିଦ୍ୟାଳୟରୁ ଯୁକ୍ତ ଦୁଇ ପାସ୍ କରିଛନ୍ତି। ଏବେ ସେ ଖଲ୍ଲିକୋଟ ମହାବିଦ୍ୟାଳୟରେ ଆର୍ଟ ଆଣ୍ଡ କ୍ରାଫ୍ଟ ବିଭାଗର ଭିଜୁଆଲ ଆର୍ଟରେ ଶେଷ ବର୍ଷର ଛାତ୍ର। ତାଙ୍କ କଳାକୃତି ରାଜ୍ୟ ଲଳିତକଳା ଏକାଡେମୀକୁ ମନୋନୀତ ହୋଇ ଦୁଇ ଥର ପ୍ରଦର୍ଶିତ ହୋଇଛି। ସେହିପରି ରାଜ୍ୟ ଭିନ୍ନକ୍ଷମ ସଶକ୍ତୀକରଣ ବିଭାଗ ପକ୍ଷରୁ ରାଜ୍ୟସ୍ତରୀୟ ପ୍ରତିଯୋଗିତାରେ ମଧ୍ୟ ସେ ପୁରସ୍କୃତ ହୋଇଛନ୍ତି। ସମସ୍ତ ଶ୍ରେୟ ପ୍ରତ୍ୟୁଷ ତାଙ୍କ ମା’ଙ୍କୁ ଦେଇଛନ୍ତି। ଅନ୍ତର୍ଜାତୀୟ ସ୍ବୀକୃତି ପାଇବାରେ କନ୍ଧମାଳ ଜିଲାପାଳ ଡ. ବୃନ୍ଦା ଡି’ଙ୍କ ସହଯୋଗ ପାଇଁ ସେ ଜିଲା ପ୍ରଶାସନକୁ କୃତଜ୍ଞତା ଜଣାଇଛନ୍ତି।
