ଛତ୍ରପୁର,୯ା୧୧(ଦିଲ୍ଲୀପ ସାମଲ): ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ସରକାର ବିଭିନ୍ନ ଯୋଜନା କରିଛନ୍ତି। ବୃଦ୍ଧା କାଳକୁ ଚଳିବା ପାଇଁ ବାର୍ଦ୍ଧକ୍ୟ ଭତ୍ତା ବି ପ୍ରଦାନ କରୁଛନ୍ତି। ହେଲେ ସେ ସମସ୍ତ ଯୋଜନା ସଠିକ୍ ଭାବେ ହିତାଧିକାରୀମାନଙ୍କ ନିକଟରେ ପହଞ୍ଚି ପାରୁନି। ପରିଣତ ବୟସରେ ନିଜେ ଚାଲିବାକୁ ବି ସକ୍ଷମ ହୋଇପାରୁ ନ ଥିବା ଗଞ୍ଜାମ ଜିଲା ପାଣ୍ଡିଆ ଗ୍ରାମର ଜଣେ ବୃଦ୍ଧା ଦମ୍ପତି ଗୁରୁବାର ଛତ୍ରପୁରସ୍ଥିତ ଗଞ୍ଜାମ ଜିଲାପାଳଙ୍କ କାର୍ଯ୍ୟାଳୟକୁ ଆସି ଗୁହାରି କରିଛନ୍ତି। ଆଜକୁ ୩୦ ବର୍ଷ ହେଲା ତାଙ୍କ ପୁଅ ତାଙ୍କୁ ପଚାରୁନି। ସ୍ବାମୀଙ୍କ ଭତ୍ତା ଟଙ୍କା ଓ ରାଶନକାର୍ଡରୁ ଯେଉଁ ୫କେଜି ମିଳୁଥିବା ଚାଉଳରେ ହିଁ ସେମାନେ ସେମାନଙ୍କ ପରିବାର ପ୍ରତିପୋଷଣ କରୁଛନ୍ତି। ପାଣ୍ଡିଆ ଗ୍ରାମର ଆଡ୍ଡା ଆମାଇଙ୍କୁ ବୟସ ୭୦ ଟପିଥିଲେ ମଧ୍ୟ ତାଙ୍କୁ ଏ ପର୍ଯ୍ୟନ୍ତ ବାର୍ଦ୍ଧକ୍ୟ ଭତ୍ତା ମିଳିନାହିଁ। ଏନେଇ ସେମାନେ ବାରମ୍ବାର ବ୍ଲକ ପ୍ରଶାସନ ନିକଟରେ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଯାହାଫଳରେ ସେମାନେ ବାଧ୍ୟ ବାର୍ଦ୍ଧକ୍ୟ ଭତ୍ତା ପ୍ରଦାନ କରିବା ପାଇଁ ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ହଠାତ୍ ଛତ୍ରପୁର ଉପଜିଲାପାଳ ଦେବଦତ୍ତ ମହାନ୍ତଙ୍କୁ ଭେଟି କାନ୍ଦି କାନ୍ଦି ନିବେଦନ କରିଛନ୍ତି। ସେ ତାଙ୍କ ସ୍ବାମୀ ଆଡ୍ଡା ଚିନ୍ନାଙ୍କ ବାର୍ଦ୍ଧକ୍ୟ ଭତ୍ତା ଟଙ୍କା ଓ ରାଶନକାର୍ଡରୁ ମିଳୁଥିବା ଚାଉଳରେ ଚଳିବା ସମ୍ଭବପର ହେଉ ନ ଥିବାରୁ ବୃଦ୍ଧ ଦମ୍ପତି ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଛତ୍ରପୁର ଉପଜିଲାପାଳ ଶ୍ରୀ ମହାନ୍ତ ଏ ଦିଗରେ ତୁରନ୍ତ ପଦକ୍ଷେପ ଗ୍ରହଣ କରି ଆଡ୍ଡା ଆମାଇଙ୍କୁ ବାର୍ଦ୍ଧକ୍ୟ ଭତ୍ତା ପ୍ରଦାନ କରିବା ପାଇଁ ପୁରୁଷୋତ୍ତମପୁର ବିଡିଓଙ୍କୁ ନିର୍ଦ୍ଦେଶ ଦେଇଛନ୍ତି।