ପିପିଲି,୬।୯(ସ୍ବ.ପ୍ର./ଡି.ଏନ୍.ଏ.): ଭାର୍ଗବୀ ନଦୀରେ ବନ୍ୟାଜଳ ପ୍ରବାହିତ ପରେ କିଛିଦିନ ହେବ ପିପିଲି ବ୍ଲକ ଅନ୍ତର୍ଗତ ଚନ୍ଦ୍ରାଦେଇପୁର ପଞ୍ଚାୟତ ବ୍ରାହ୍ମଣସାହିରେ ନାଲି ପିମ୍ପୁଡ଼ି ଆତଙ୍କ ଦେଖିବାକୁ ମିଳିଛି। ଏଥିଯୋଗୁ ସାଧାରଣ ଲୋକେ ଭୟଭୀତ ହେଉଥିବା ବେଳେ ଜୀବଜନ୍ତୁଙ୍କ ଉପରେ ମଧ୍ୟ ଏହାର ପ୍ରଭାବ ପଡ଼ିଛି। ଏପରି କି ୩ ପରିବାର ନାଲି ପିମ୍ପୁଡି ଭୟରେ ଘର ଛାଡ଼ି ଅନ୍ୟତ୍ର ରହୁଛନ୍ତି। ଏହି ସମସ୍ୟା ନେଇ ବିଧାୟକ ରୁଦ୍ରପ୍ରତାପ ମହାରଥୀ ପୁରୀ ଜିଲା ପ୍ରଶାସନ ଓ ବ୍ଲକ ପ୍ରଶାସନ ସହିତ ଆଲୋଚନା କରିଛନ୍ତି। ଏ ନେଇ ସୋମବାର ପିପିଲି ବିଡିଓ ରଶ୍ମିତା ନାଥଙ୍କ ନେତୃତ୍ୱରେ ଦୁଇଟି ଟିମ୍ ପିପି ପେଷ୍ଟ କଣ୍ଟ୍ରୋଲର ଭୁବନେଶ୍ୱର ଓ ପୁରୀ ଜିଲା ମୁଖ୍ୟ କୃଷି ବିଭାଗର ୪ଜଣିଆ ସ୍ବତନ୍ତ୍ର ପ୍ରତିନିଧି ଦଳ ଚନ୍ଦ୍ରାଦେଇପୁର ବ୍ରାହ୍ମଣସାହିରେ ପହଞ୍ଚତ୍ଛନ୍ତି। ବିଡିଓ ନାଥଙ୍କ ସହ ଜିଲା ସହକାରୀ କୃଷି ଅଧିକାରୀ ତଥା ଓୟୁଏଟିର ପ୍ରଫେସର ପୀୟୂଷ ପଲ୍ଲବ ପରିଡା ଓ କେନ୍ଦ୍ର କୃଷି ବୈଜ୍ଞାନିକ ଡ. ସଞ୍ଜୟ କୁମାର ମହାନ୍ତି, ଜିଲା କୃଷି ଅଧିକାରୀ ସୁବାସ ଚନ୍ଦ୍ର ବେହେରା, ପିପିଲି ସହକାରୀ କୃଷି ଅଧିକାରୀ ଜୟଲକ୍ଷ୍ମୀ ସାହୁ ପ୍ରମୁଖ ସେଠାରେ ପହଞ୍ଚତ୍ ସ୍ଥାନୀୟ ଲୋକମାନଙ୍କ ସହିତ ଆଲୋଚନା କରିବା ସହିତ ନାଲି ପିମ୍ପୁଡି ଘଉଡ଼ାଇବା ପାଇଁ ୪ପ୍ରକାର ମିଶ୍ରଣର ଔଷଧକୁ ପିପି ପେଷ୍ଟ କଣ୍ଟ୍ରୋଲର ପକ୍ଷରୁ ଗ୍ରାମର ବିଭିନ୍ନ ସ୍ଥାନରେ ସ୍ପ୍ରେ କରାଯାଇଛି। ଆସିଥିବା ଏହି ୪ଜଣିଆ ଦଳ ସହ ସ୍ଥାନୀୟ ଆଶା, ସ୍ବାସ୍ଥ୍ୟ କର୍ମଚାରୀ, ଜିଆର୍ଏସ୍ମାନେ ନାଲି ପିମ୍ପୁଡ଼ି ସମସ୍ୟାରୁ କିପରି ଲୋକମାନଙ୍କୁ ସୁରକ୍ଷା ଦିଆଯିବ ସେନେଇ ଉଚ୍ଚ କର୍ତ୍ତୃପକ୍ଷଙ୍କ ସହ ଫୋନ ଯୋଗେ ଆଲୋଚନା କରିଥିଲେ। ପରେ ପୁରୀ ଜିଲା ଭାଜପା ସଭାପତି ଆଶ୍ରିତ ପଟ୍ଟନାୟକ, ୨୪ ନମ୍ବର ଜିଲା ପରିଷଦ ସଭ୍ୟ ଧରଣୀଧର ସାହୁ, ରାଧାମୋହନ, ସରପଞ୍ଚ ସୁରେନ୍ଦ୍ର ବେହେରା, ସଞ୍ଜୟ ସ୍ବାଇଁ, ୱାର୍ଡମେମ୍ବର ରାଜପ୍ରସାଦ ଦାସ, ବିଶ୍ୱଜିତ ଦାଶ, ଆଦିତ୍ୟ ପ୍ରସାଦ ଭୋଳ ପ୍ରମୁଖ ଗ୍ରାମରେ ପହଞ୍ଚତ୍ ଗ୍ରାମବାସୀଙ୍କ ସହ ଆଲୋଚନା କରି ସମସ୍ୟାର ସମାଧାନ ପାଇଁ ପ୍ରଶାସନିକ ଅଧିକାରୀଙ୍କ ସହିତ ବିଚାରବିମର୍ଶ କରିଛନ୍ତି।
