କଟକ ଅଫିସ,୨୬।୨: ଗାନ୍ଧିଜୀଙ୍କ ଓଡ଼ିଶା ଆଗମନର ଶତବାର୍ଷିକୀ ପାଳନ ନିମନ୍ତେ କଟକ ଜିଲାପାଳଙ୍କ ସମ୍ମିଳନୀ କକ୍ଷରେ ଏକ ପ୍ରସ୍ତୁତି ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ଏଥିରେ ଏମ୍ପି ଭର୍ତ୍ତୃହରି ମହତାବ ଯୋଗଦେଇ କହିଥିଲେ, ଗାନ୍ଧିଜୀଙ୍କ ଓଡ଼ିଶା ଆଗମନର ଶତବାର୍ଷିକୀ ପାଳନ ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ କାର୍ଯ୍ୟକ୍ରମ କରାଯିବ। ଏହା ମଧ୍ୟରେ କଟକ ରେଳ ଷ୍ଟେଶନଠାରୁ ଶୋଭାଯାତ୍ରା ବାହାରି କାଠଯୋଡିସ୍ଥିତ ବେଲଭ୍ୟୁ ଛକ ପର୍ଯ୍ୟନ୍ତ ଯାତ୍ରା କରିବ। ଏହି ଶୋଭାଯାତ୍ରାରେ ନଦିଆ ସଙ୍କୀର୍ତ୍ତନ ମଣ୍ଡଳୀ, ଖ୍ରୀଷ୍ଟ ସମାଜ, ବିଭିନ୍ନ ହିନ୍ଦୁ ସଙ୍ଗଠନ ସାମିଲ ହେବ। ଏଥିସହିତ ଗାନ୍ଧିଜୀଙ୍କ ଚରଖା ବ୍ୟବହାର, ଅହିଂସା ଓ ସମ୍ପ୍ରଦାୟିକ ସଦ୍ଭାବକୁ ନେଇ ଏକ ପ୍ରଜ୍ଞାପନ ମେଢ ୨୦ଟି ସ୍ଥାନ ଦେଇ ସହର ଅତିକ୍ରମ କରିବ। ବେଲଭ୍ୟୁସ୍ଥିତ ନଦୀଶଯ୍ୟାରେ ଗାନ୍ଧିଜୀଙ୍କ ଆଗମନର ଦୃଶ୍ୟ ସହ ତାଙ୍କର ଏକ ପ୍ରତିମୂର୍ତ୍ତି ସ୍ଥାପନ କରାଯିବ ା ସେହିପରି ପାର୍କ, ଏମ୍ଫି ଥିଏଟରର ବ୍ୟବସ୍ଥା କରାଯାଉଛି ବୋଲି ଏମ୍ପି କହିଥିଲେ। ବୈଠକରେ ପୂର୍ବତନ ବିଧାୟକ ପ୍ରଭାତ ତ୍ରିପାଠୀ ଯୋଗଦେଇ ଶୋଭାଯାତ୍ରା ସୂଚାରୁରୂପେ ଆୟୋଜନ ସମ୍ପର୍କରେ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ। ଏହି ଅବସରରେ ଜଷ୍ଟିସ ମନୋରଞ୍ଜନ ମହାନ୍ତି ଉତ୍କଳ ଗାନ୍ଧୀ ଶାନ୍ତି ପ୍ରତିଷ୍ଠାନ ଦ୍ୱାରା ସଂଗୃହୀତ ସୂଚନା ପୁସ୍ତିକା ଉପସ୍ଥାପନ କରିଥିଲେ। ଏତଦ୍ବ୍ୟତୀତ ରାମଧୁନ, ଖଦି ପରିଧାନ ତଥା ଗାନ୍ଧୀବାଣୀ ସମ୍ବନ୍ଧୀୟ ସଂକ୍ଷିପ୍ତ ବିବରଣୀ ପୁସ୍ତିକା ବଣ୍ଟନ କରାଯିବ ବୈଠକରେ ନିଷ୍ପତ୍ତି ନିଆଯାଇଛି। ଜିଲାପାଳ ଭବାନୀ ଶଙ୍କର ଚୟନୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସିଏମ୍ସି କମିଶନର ଅନନ୍ୟା ଦାସ, ମଧୁସୂଦନ ସାହୁ, ଗିରିବାଳା ବେହେରା, ଅମରେନ୍ଦ୍ର ମହାନ୍ତି, ଧର୍ମେଶ ନାୟକ, ନୟନ ମହାନ୍ତି, ରଞ୍ଜନ ବିଶ୍ୱାଳ, ସନ୍ତୋଷ ପତି ପ୍ରମୁଖ ଉପସ୍ଥିତ ଥିଲେ। ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଅଶୋକ ଷଡଙ୍ଗୀ ଧନ୍ୟବାଦ ଦେଇଥିଲେ।
