ଭୁବନେଶ୍ୱର,୧।୨(ଶର୍ମିଷ୍ଠା ପାଣିଗ୍ରାହୀ)ଏବେ ରାଜଧାନୀର ମୁଖ୍ୟ ଆକର୍ଷଣ ପାଲଟିଛି ଆଦିବାସୀ ମେଳା। ଅପରାହ୍ନଠୁ ନେଇ ରାତି ୯ଟା ଯାଏ ମେଳାରେ ଲୋକଙ୍କ ସମାଗମ ଲାଗି ରହୁଛି। ଆଦିବାସୀ ସଂସ୍କୃତି, ପରମ୍ପରା ସହ ବିଶୁଦ୍ଧ ମସଲା, ଘରକରଣା ସାମଗ୍ରୀ ଏବଂ ସାରେ ସାଂସ୍କୃତିକ ଆସରକୁ ଉପଭୋଗ କରୁଛନ୍ତି ଲୋକେ। ମେଳାରେ ଥିବା ପ୍ରତ୍ୟେକ ଷ୍ଟଲ କହୁଛି ଆଦିବାସୀ ସଶକ୍ତର କାହାଣୀ। ଆଜିର ଆଧୁନିକ ଦୁନିଆରେ ରାଜ୍ୟର ବିକାଶ ଦିଗରେ ସେମାନେ ମଧ୍ୟ ସାମିଲ ହେଉଛନ୍ତି। ବ୍ୟବସାୟଠୁ ନେଇ ଲୋକଙ୍କ ସହ ସୁସମ୍ପର୍କ ସ୍ଥାପନ କରିବାର କୌଶଳ ସେମାନେ ଶିଖିସାରିଛନ୍ତି। ତେବେ ଏଭଳି କିଛି ନୂଆ ଦେଖିବାକୁ, ନୂଆ ଜାଣିବାକୁ ଆଦିବାସୀ ମେଳାକୁ ଧାଡ଼ି ଲାଗିଛି।
କୁଡ଼ିଆ ଦେଖିବାକୁ ଲମ୍ବା ଲାଇନ୍
ଛୋଟ ଛୋଟ ସୁନ୍ଦର କୁଡ଼ିଆ। ହେଲେ କଳା, ସଂସ୍କୃତିରେ ପରିପୂର୍ଣ୍ଣ। ଯିଏ ଦେଖୁଛି ଆଖି ଲାଖି ଯାଉଛି। ଲୋକଙ୍କ ଭିଡ଼ ଜମୁଛି ଏହି ଆଦିବାସୀଙ୍କ ଘରେ। ମେଳାରେ ଟ୍ରାଇବାଲ୍ ଭିଲେଜ୍ ନାମକ ଏକ ଭାଗ ସ୍ଥାନ ରଖାଯାଇଛି। ଯେଉଁଠି ବିଭିନ୍ନ ଆଦିବାସୀଙ୍କ କୁଡ଼ିଆ ଘରସବୁ ଆଦିବାସୀ ଗାଁର ଜୀବନ୍ତ ଚିତ୍ର ପ୍ରଦାନ କରୁଛି। ଛଣ ଆଉ ବାଉଁଶ ଛପର ଥିବା ଏହି ଘର ଚାରିପାଖେ ମଚା, ବଡ଼ମା ଶାଳ, ମାଙ୍କଡ଼ିଆ ଘର, ଛେଳି ଘର ଆଦି ରହିଛି। ସେହିଭଳି ପରିବା ଚାଷ ସହ ଆଦିବାସୀଙ୍କ ପାଇଁ ହୋଇଥିବା ଉନ୍ନୟନ ମୂଳକ ଯୋଜନା ମଧ୍ୟ ସେଠାରେ ସ୍ଥାନିତ କରାଯାଇଛି। ମେଳା ବୁଲିବାକୁ ଆସୁଥିବା ଛୋଟ ପିଲାଙ୍କୁ ସେମାନଙ୍କ ମା’ବାପା ଆଦିବାସୀଙ୍କ ଜୀବନ ଓ ସଂସ୍କୃତି ସମ୍ପର୍କରେ ବୁଝାଉଥିବା ଦେଖିବାକୁ ମିଳୁଛି।
ଆଦିବାସୀଙ୍କ ସହ ସେଲ୍ଫି
ଆଦିବାସୀଙ୍କ ବେଶଭୂଷା ଲୋକଙ୍କୁ ଆକର୍ଷିତ କରୁଛି। ମେଳା ବୁଲିବାକୁ ଆସୁଥିବା ଲୋକମାନେ ନିଜ ମୋବାଇଲ୍ ଫୋନ୍ ଓ କ୍ୟାମେରାରେ ଆଦିବାସୀଙ୍କ ସହ ସେଲ୍ଫି ନେବାକୁ ପସନ୍ଦ କରୁଛନ୍ତି। ସାରେ ନୃତ୍ୟ ପ୍ରଦର୍ଶନ ପାଇଁ ପ୍ରସ୍ତୁତ ହୋଇ ମଞ୍ଚ ପାଖରେ ଥିବା ଆଦିବାସୀ କଳାକାର ଦଳ, ମେଳାରେ ଉପସ୍ଥିତ ଥିବା ଆଦିବାସୀଙ୍କ ସହ ଫଟୋ ଉଠାଇ ଖୁସି ହେଉଛନ୍ତି। ସେହିପରି ସେଠାରେ ଆଦିବାସୀ ଲୋକଙ୍କ ୨ଟି ପୋଷ୍ଟର ରଖାଯାଇଛି, ଯେଉଁଠାରେ ଦର୍ଶକମାନେ ନିଜ ମୁହଁକୁ ରଖି ଫଟୋ ଉଠାଇ ନେଉଥିବା ଦେଖିବାକୁ ମିଳୁଛି।
