ଅଙ୍କାରା,୨୮।୧: ତୁର୍କୀ ଏବଂ ବୁର୍ସା ଆକାଶରେ ଏକ ବିରଳ ବାଦଲ ସୃଷ୍ଟି ହୋଇଛି, ଯାହା ଅଜଣା ଉଡ଼ନ୍ତା ବସ୍ତୁ (ୟୁଏଫ୍ଓ) ସଦୃଶ ଦେଖାଯାଉଛି। ଗୁରୁବାର ସକାଳେ ଆଖି ସଦୃଶ ଏହି ବିଚିତ୍ର ବାଦଲକୁ ଦେଖିବା ପରେ ଇଣ୍ଟରନେଟରେ ଏହାକୁ ନେଇ ଜୋର୍ଦାର ଚର୍ଚ୍ଚା ହୋଇଥିଲା। ଏହି ବାଦଲ ପ୍ରାୟ ଘଣ୍ଟାଏ ପର୍ଯ୍ୟନ୍ତ ଆକାଶରେ ଦୃଶ୍ୟ ହୋଇଥିଲା। ଅନେକ ଇଣ୍ଟରନେଟ୍ ୟୁଜର ଉକ୍ତ ବିରଳ ଦୃଶ୍ୟକୁ ସେମାନଙ୍କ ଫୋନ୍ରୁ ଉଠାଇ ଶେୟାର କରିଛନ୍ତି। ସୂର୍ଯ୍ୟୋଦୟ ସମୟରେ ଉକ୍ତ ବାଦଲ ସୃଷ୍ଟି ହୋଇଥିଲା, ଯାହାର ମଧ୍ୟଭାଗରେ ଏକ ଗର୍ତ୍ତ ରହିଥିଲା। ତୁର୍କୀରେ ସକାଳ ସମୟ ଅସାଧାରଣ ଥିଲା। ବିରଳ ପ୍ରାକୃତିକ ଅଦ୍ଭୁତ ଘଟଣାର ଫଟୋକୁ ୟୁଏଫ୍ଓ ଲେଣ୍ଟିକୁଲାର କୁହାଯାଉଥିବା ଜଣେ ୟୁଜର ଲେଖିଛନ୍ତି। ଏହି ବିଚିତ୍ର ବାଦଲର ଫଟୋ ସାରା ବିଶ୍ୱରେ ଭାଇରାଲ ହୋଇଛି। ତେବେ ଏହା ସାଧାରଣ ଭାବେ ଲେଣ୍ଟିଲ ଭଳି ଦେଖାଯାଉଥିବା ବାଦଲ ବୋଲି ତୁର୍କୀର ପାଣିପାଗ ସେବା ବିଭାଗ ରିପୋର୍ଟରେ କୁହାଯାଇଛି। ଏଭଳି ବାଦଲ ବର୍ତ୍ତୁଳାକାର ଏବଂ ଏକ ପ୍ଲେଟ୍ ଭାସିଲା ଭଳି ଦେଖାଯାଇଥାଏ। ଏଗୁଡ଼ିକ ସାଧାରଣତଃ ୨,୦୦୦ରୁ ୫,୦୦୦ ମିଟର ଉଚ୍ଚତାରେ ଦୃଶ୍ୟ ହୋଇଥାଏ। ବାୟୁ ସ୍ଥିର ଓ ଆର୍ଦ୍ର ଥିବାବେଳେ ପାହାଡ଼ ପର୍ବତ ଉପରେ ବାୟୁ ବେଗରେ ଅସ୍ଥିରତା ଯୋଗୁ ଏଭଳି ବାଦଲ ସୃଷ୍ଟି ହୋଇଥାଏ ବୋଲି ଏକ ଗଣମାଧ୍ୟମରେ ପ୍ରକାଶ ପାଇଛି।
