ଭୁବନେଶ୍ୱର (ବ୍ୟୁରୋ)/ବାରଙ୍ଗ୧୯।୪ (ଡି.ଏନ୍.ଏ.): ଭୁବନେଶ୍ୱରର ଚନ୍ଦକା ଥାନା ଅନ୍ତର୍ଗତ ଗୋଠପାଟଣା ଅଞ୍ଚଳରେ ଥିବା ଏକ ଘରୋଇ ବିଶ୍ୱବିଦ୍ୟାଳୟ ହଷ୍ଟେଲରେ ଜଣେ ଛାତ୍ରୀଙ୍କ ସନ୍ଦେହଜନକ ଅବସ୍ଥାରେ ମୃତ୍ୟୁ ଘଟିଛି। ସେ ହେଲେ କେନ୍ଦୁଝରର ଅର୍ଚ୍ଚନା ଦାଶ (୨୪)। ସେ ଏଠାରେ ବିଏସ୍ସି ଡାଟା ସାଇନ୍ସ ବିଭାଗର ଦ୍ୱିତୀୟ ବର୍ଷର ଛାତ୍ରୀ ଥିଲେ। ସୋମବାର ତାଙ୍କ ମୃତଦେହଟି ଫ୍ୟାନ୍ରେ ଶାଢ଼ି ଦ୍ୱାରା ଝୁଲୁଥିଲା। ସହପାଠିନୀମାନେ ତାଙ୍କୁ ଉଦ୍ଧାର କରି ଏକ ଘରୋଇ ହସ୍ପିଟାଲକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୋଲିସ ଉକ୍ତ ହସ୍ପିଟାଲରୁ ମୃତଦେହକୁ ଜବତ କରି କ୍ୟାପିଟାଲ ହସ୍ପିଟାଲ ପଠାଇଥିଲା। ମଙ୍ଗଳବାର ପରିବାର ଲୋକଙ୍କ ଉପସ୍ଥିତିରେ ମୃତଦେହକୁ ବ୍ୟବଚ୍ଛେଦ କରାଯାଇଛି। ଏନେଇ ପୋଲିସ ଏକ ଅପମୃତ୍ୟୁ ମାମଲା (ନଂ.୨୬/୨୦୨୩) ରୁଜୁ କରି ତଦନ୍ତ ଚଳାଇଛି। ଅପରପକ୍ଷରେ ଉକ୍ତ ହଷ୍ଟେଲ ରୁମ୍ରେ ପୋଲିସ ଉପସ୍ଥିତିରେ ସାଇଣ୍ଟିଫିକ୍ ଟିମ୍ ନମୁନା ସଂଗ୍ରହ କରିଛି। ଥାନାଧିକାରୀ ରାଧାକାନ୍ତ ସାହୁ କହିଛନ୍ତି, ସମସ୍ତଙ୍କୁ ତଦନ୍ତ ପରିସରଭୁକ୍ତ କରାଯାଉ ବୋଲି ପରିବାର ଲୋକ ଦାବି କରିଛନ୍ତି। ପ୍ରାଥମିକ ତଦନ୍ତରୁ ଏହା ଏକ ଆତ୍ମହତ୍ୟା ବୋଲି ଜଣାପଡ଼ିଥିବାବେଳେ ଅଧିକ ସ୍ପଷ୍ଟ ହେବା ପାଇଁ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରାଯାଇଛି। ଏନେଇ ସମସ୍ତଙ୍କୁ ପଚରାଉଚରା କରାଯାଉଛି ବୋଲି ସେ କହିଛନ୍ତି। ଅନ୍ୟପକ୍ଷରେ ଅର୍ଚ୍ଚନାଙ୍କ ବଡ଼ବାପା ଗଣମାଧ୍ୟମ ଆଗରେ ଭିନ୍ନ କଥା କହିଛନ୍ତି। ଅର୍ଚ୍ଚନାଙ୍କ ମୃତ୍ୟୁ ପାଇଁ ଉକ୍ତ କଲେଜର ଛାତ୍ର ଥିବା ତାଙ୍କ ପୁରୁଷବନ୍ଧୁ ହିଁ ଦାୟୀ। ପୁରୁଷବନ୍ଧୁଙ୍କ ନିର୍ଯାତନାରୁ ଝିଅ ଏଭଳି ଚରମ ନିଷ୍ପତ୍ତି ନେଇଥିବା ସେ କହିଛନ୍ତି। ସୂଚନା ଅନୁଯାୟୀ, ଅର୍ଚ୍ଚନା କିଛିଦିନ ହେବ ଘରକୁ ଯାଇଥିଲେ। ରବିବାର ସେ ତାଙ୍କ ମା’ ଓ ସାନ ଭଉଣୀ ସହ ହଷ୍ଟେଲକୁ ଫେରିଥିଲେ। ସୋମବାର ଅର୍ଚ୍ଚନା ପରୀକ୍ଷା ସାରି ହଷ୍ଟେଲକୁ ଆସିଥିଲେ। ଅପରାହ୍ନରେ ଦୀର୍ଘ ସମୟ ପର୍ଯ୍ୟନ୍ତ ତାଙ୍କ ରୁମ୍ର କବାଟ ଖୋଲା ନ ହେବାରୁ ସହପାଠୀମାନେ ସନ୍ଦେହ କରିଥିଲେ। ସେମାନେ ପୋଲିସକୁ ଖବର ଦେବା ସହ ତାଲା ଭାଙ୍ଗି ଦେଖିବା ପରେ ଅର୍ଚ୍ଚନା ଆତ୍ମହତ୍ୟା କରିଥିବା ଜଣାପଡ଼ିଥିଲା।
